រាជធានីភ្នំពេញ ៖ អតីតមន្ត្រីជាន់ខ្ពស់គណបក្សប្រឆាំងលោកមុត ចន្ថា បានអះអាងថា សហភាពអ៊ឺរ៉ុប នៅតែទាមទាឲ្យទម្លាក់ចោលបទចោទប្រកាន់ និងបម្រាមទាំងអស់ប្រឆាំងលើកលោកកឹម សុខា ។
លោកមុត ចន្ថា អតីតជំនួយការលោកកឹម សុខា បានសរសេរលើកបណ្តាញសង្គមនៅថ្ងៃទី២៨ កញ្ញានេះថា លោក Carl Hallegard តំណាងអចិន្ត្រៃយ៍របស់សហភាពអឺរ៉ុបប្រចាំក្រុមប្រឹក្សាសិទ្ធិមនុស្សអង្គការសហប្រជាជាតិបានថ្លែងទៅកាន់សម័យប្រជុំទី៣៥ក្រុមប្រឹក្សាសិទ្ធិមនុស្ស សហភាពអឺរ៉ុបបានបញ្ជូនបេសកកម្មស្វែងរកការពិតនៅកម្ពុជានៅដើមខែកក្កដា ឆ្នាំ២០១៨ ដើម្បីសិក្សាស្រាវជ្រាវការអនុវត្តលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋជាពិសេសសិទ្ធិការងារដែលជាលក្ខខណ្ឌនៃការផ្តល់ប្រព័ន្ធអនុគ្រោះពាណិជ្ជកម្មដល់ប្រទេសកម្ពុជា ។
លោកមុត ចន្ថា ដែមនុស្សជំនិតលោក កឹម សុខា បានលើកឡើងទៀតថា សហភាពអឺរ៉ុបគាំទ្ររបាយការណ៍ស្តីពីស្ថានភាពសិទ្ធិមនុស្សនៅកម្ពុជារបស់អ្នករាយការណ៍ពិសេសសហភាពអឺរ៉ុបព្រួយបារម្ភយ៉ាងខ្លាំងបំផុត ចំពោះដំណើរថយក្រោយនៃលទ្ធិប្រជាធិបតេយ្យដ៏ផុយស្រួយរបស់កម្ពុជា សហភាពអឺរ៉ុបចាត់ទុកថា ការបោះឆ្នោតសភានាខែកក្កដា មិនមានភាពស្រប ច្បាប់ឡើយ ព្រោះការបោះឆ្នោតសភានេះពោរពេញដោយបរិយាកាសគាបសង្កត់ខ្លាំងដែលមិនតំណាងឲ្យឆន្ទៈប្រជាធិបតេយ្យរបស់ប្រជាជនកម្ពុជា ហើយគណបក្សប្រឆាំងដ៏ធំត្រូវបាន គេដកចេញដោយទំនើងចិត្ត ។
លោកបានសរសេរទៀតថា សហភាពអឺរ៉ុបស្នើឲ្យស្តានីតិសម្បទាគណបក្សសង្គ្រោះជាតិឡើងវិញ ។ ជាងនេះសហភាពអឺរ៉ុបរំពឹងឲ្យទម្លាក់ចោលបទចោទប្រកាន់ និងដកចេញនូវបម្រាមទាំងអស់ប្រឆាំងនឹងលោកកឹម សុខា ។ ជាងនេះសហភាពអឺរ៉ុបរំពឹងឲ្យរដ្ឋាភិបាលអនុញ្ញាតិឲ្យអង្គការសង្គមស៊ីវិលបំពេញតួនាទីស្របច្បាប់របស់ខ្លួន ។ ទាក់ទិននឹងការលើកឡើងរបស់អតីតមន្ត្រីជាន់ខ្ពស់គណបក្សប្រឆាំងនេះត្រូវបានអ្នកនាំពាក្យគណបក្សប្រជាជនកម្ពុជាលោក សុខ ឥសាន ធ្លាប់លើកឡើងថា សំណុំរឿងរបស់លោកកឹម សុខា កំពុងស្ថិតក្នុងនីតិវិធីរបស់តុលាការនៅឡើង ។ លោកថា កម្ពុជាមានអធិបតេយ្យភាពមិនអាចប្រទេសផ្សេងលូកដៃចូលកិច្ចការផ្ទៃក្នុងកម្ពុជាបាននោះទេ ។
សូមជម្រាបថា លោកកឹម សុខា ត្រូវបានជាប់ពន្ធនាគារជាង១ឆ្នាំ នៅពន្ធនាគារត្រពាំងផ្លុង ហើយកាលពីថ្ងៃទី១០ វេលាម៉ោង៣ទាបភ្លឺតុលាការសាលាដំបូងរាជធានីភ្នំពេញសម្រេចដោះលែងឲ្យមានសេរីភាព បណ្តោះអាសន្នដោយត្រូវបានឃុំខ្លួននៅក្នុងគេហដ្ឋានលោកស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់ទី២ ខណ្ឌទូលគោល រាជធានីភ្នំពេញ ។
លោកកឹម សុខា មិនត្រូវបានអនុញ្ញាតឲ្យចេញបរិវេណផ្ទះឡើយដូចជា ការជួបជាមួយកម្មជន ថ្នាក់ដឹកនាំគណបក្សសង្គ្រោះជាតិ និងជនបរទេសជាដើម ។ លោកកឹម សុខា ត្រូវបានចោទប្រកាន់ពីបទសន្ធិដ្ឋិភាពជាមួយបរទេសតាមមាត្រា៤៤៣នៃក្រមព្រហ្មទណ្ឌ ។ បទសន្ធិដ្ឋិភាពជាមួយបរទេសជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ។ បទល្មើសនេះអាចត្រូវជាប់ពន្ធនាគារពី១៥ឆ្នាំដល់៣០ឆ្នាំ ។ លោកកឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ ៕
ចែករំលែកព័តមាននេះ