ខេត្តបាត់ដំបង ៖ សេចក្តីរាយការណ៍ឱ្យដឹងថា បន្ទាប់ពីម្ចាស់ផ្ទះបើករថយន្តចេញផុតមិនទាន់បានមួយដង្ហើមចង្រិតផង ស្រាប់តែជនមិនស្គាល់មុខបានចូលផ្ទះទៅគាស់បង្អួចចូលលួចយកទ្រព្យសម្បត្តិនៅក្នុង
ផ្ទះពលរដ្ឋម្នាក់ ដែលគេសង្ស័យអាចកើតឡើងនៅចន្លោះវេលាម៉ោង០៩ ដល់ម៉ោង១២ថ្ងៃត្រង់ ថ្ងៃទី២៧ កញ្ញា ស្ថិតនៅចំណុចភូមិច្រាបវាល ឃុំអន្លង់វិល ស្រុកសង្កែ ។ នេះបើតាមការសន្និដ្ឋានរបស់សមត្ថកិច្ចដែលបានចុះពីពិនិត្យដល់ទីតាំងកើតហេតុ តែសមត្ថកិច្ចហាក់នៅងងិតឈឹងអំពីតម្រុយនៃមុខសញ្ញាជនប្រព្រឹត្តនេះ។
មន្ត្រីនគរបាលស្រុកសង្កែបានឲ្យដឹងថា លំនៅឋានដែលត្រូវជនមិនស្គាល់មុខគាស់ទម្លាយទម្លាយចូលលួចទ្រព្យសម្បត្តិនោះ ម្ចាស់ឈ្មោះលឹម ម៉េងគារ ភេទប្រុស អាយុ៦០ឆ្នាំ រស់នៅចំណុចកើតហេតុខាងលើ ។ មន្ត្រីដដែលបានប្រាប់ថា គេមិនទាន់ដឹងពីចំនួនជនសង្ស័យនៅឡើយទេ តែបានចូលធ្វើសកម្មភាពគាស់
បង្អួចផ្ទះជនរងគ្រោះ បន្ទាប់ពីជនរងគ្រោះបើករថយន្តចេញផុតពីផ្ទះប៉ុន្មានម៉ោងប៉ុណ្ណោះ។ គេមិនបានដឹងជាក់លាក់អំពីពេលវេលា ដែលជនសង្ស័យធ្វើសកម្មភាពទេ ។ ប៉ុន្តែកូនប្រុសម្ចាស់ផ្ទះឈ្មោះលឹម ផល្លី អាយុ៣៣ឆ្នាំ បានដឹងអំពីការគាស់ទំលុះទំលាយនេះ នៅវេលាម៉ោង៣រសៀលថ្ងៃដដែល ទើបមានការភ្ញាក់ផ្អើលនិងរាយការណ៍ប្រាប់សមត្ថកកិច្ចតែម្ដង ។
កូនប្រុសម្ចាស់ផ្ទះ គឺលោកគឹម ផល្លី បាននិយាយប្រាប់សមត្ថកិច្ចថា លោកបានដឹងនៅរសៀលថ្ងៃដដែល ពេលប្រើអ្នកបំរើស្រីម្នាក់ឲ្យទៅយកចំណីអាហារនៅក្នុងផ្ទះឪពុក(ផ្ទះកើតហេតុ)។ គាត់និយាយថា ពេលដែលអ្នកបំរើទៅដល់ចូលក្នុងផ្ទះស្រាប់តែឃើញមានស្នាមគាស់បង្អូចខាងក្រោយ និងមានស្នាមរួសរើក្នុងបន្ទប់ដេកផង ទើបមានការភ្ញាក់ផ្អើល។ ពេលនោះលោកដឹងថា អាចមានចោរចូលផ្ទះ ទើបរាយការណ៍ ប្រាប់សមត្ថកិច្ចភ្លាមៗដែរ។ លោកលឹម ផល្លី បានបញ្ជាក់ថា នៅថ្ងៃកើតហេតុ គឺឪពុកខ្លួនបានបិទទ្វារផ្ទះ រួចបើករថយន្តចេញទៅធ្វើបុណ្យនៅភ្នំពេញតាំងពីព្រឹក លុះនៅរសៀលទើបដឹងរឿងនេះ។
លោកឧត្តមសេនីយត្រី ជេត វណ្ណនី ស្នងការរងខេត្ត បាននិយាយថា បើតាមការពិនិត្យត្រង់ចំណុចកើតហេតុ ជនដៃដល់បានគាស់កញ្ចក់និងចំរឹងដែកបង្អួចខាងក្រោយ ហើយចូលទៅក្នុងផ្ទះរើកកាយក្នុងបន្ទប់ និងទូដែកនៅក្នុងបន្ទប់ដេក ។ លោកបានប្រាប់ថា បើតាមកូនប្រុសម្ចាស់ផ្ទះ ដែលបានប្រាប់សមត្ថកិច្ច គឺមិនមានទ្រព្យសម្បត្តិបាត់បង់ច្រើនទេ ហើយនៅក្នុងទូដែកដែលជនល្មើសបានគាស់ទំលុះនេះ មានតែឯកសារ និងគ្រឿងអលង្ការបន្តិចបន្តូចមានតម្លៃប្រហែល២,០០០ដុល្លារប៉ុណ្ណោះ។ ប៉ុន្តែលោកបានបញ្ជាក់ថា ពេលនេះ កម្លាំងជំនាញកំពុងធ្វើការពិនិត្យ និងស៊ើបអង្កេតលើករណីនេះហើយ តែមិនទាន់មានតម្រុយអំពីមុខសញ្ញាជនដៃដល់នៅឡើយទេ។
មានការកត់សម្គាល់ដែរថា មួយរយះកន្លងទៅនេះអំពើចោរកម្ម ហាក់កំពុងកើតមានយ៉ាងកក្រើកនៅក្នុងក្រុងបាត់ដំបង និងនៅតាមបណ្ដាស្រុកមួយចំនួននៅក្នុងខេត្ត ខណៈការតែងតាំងមុខតំណែងនិងតួរនាទីស្នងការរងខេត្តកើនឡើងជិតដល់៣០រូបហើយ តែហាក់គ្មានភារកិច្ចពិតប្រាកដទេ ដែលមើលទៅគ្រាន់តែសម្រាប់លំអរស្នងការខេត្តឬសម្រាប់តែអង្គុយរុកគួនគ្នាតែប៉ុណ្ណោះ តែមិនអាចធ្វើឲ្យពួកចោរខ្លបខ្លាចឡើយ។ បទល្មើសដែលកើតឡើងស្ទើររាល់ថ្ងៃនាបច្ចុប្បន្ននេះមានដូចជា «ចោរកាច់សោ.កលួចម៉ូតូ ចោរគាស់ទំលុះទំលាយលំនៅឋាន ចោរឆក់ទ្រព្យសម្បត្តិអ្នកដំណើរ និងបទល្មើសគ្រឿងញៀន»។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ