រាជធានីភ្នំពេញ ៖ ភាគីកម្ពុជានិងជប៉ុនបានសន្យារួមគ្នាបន្តធ្វើឲ្យប្រសើរឡើងនូវវិស័យសំណង់នៅក្នុងប្រទេសកម្ពុជា ។ នេះបើតាមការលើកឡើងក្នុងជំនួបពិភាក្សាការងាររវាងមន្ត្រីជាន់ខ្ពស់ក្រសួងការងារ និងមន្ត្រីជាន់ខ្ពស់ជប៉ុន ។
ក្រោយបញ្ចប់ជំនួបការងារ រវាងលោក អុិតសំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ និងលោក ជីរ៉ូ កាវ៉ាសាគី( Jiro KAWASAKI) សមាជិកសភា និងជាអតីតរដ្ឋមន្ត្រីក្រសួងសុខាភិបាល ការងារ និងសុខុមាលភាពជប៉ុន និងគណ:ប្រតិភូសភាជប៉ុន ទទួលបន្ទុកលើសកម្មភាពអង្គការអន្តរជាតិខាងការងារ វិស័យសុខភាព និងសុវត្តិភាពការងារ នាព្រឹកថ្ងៃទី២៧ ខែកញ្ញា នៅទីស្តីការក្រសួង លោក ឡេង តុង ប្រធាននាយកដ្ឋានពេទ្យការងារ បានប្រាប់ក្រុមអ្នកយកព័តមានថា គោលបំណងសំខាន់នៃជំនួបនាពេលនេះ គឺដើម្បីពិគ្រោះយោបល់បន្ថែមលើគម្រោងក៏ដូចជាយន្តការដទៃទៀត ដើម្បីសម្រេចឲ្យបាននូវការរំពឹងទុករបស់គម្រោងខាងលើ និងការរៀបចំក្របខណ្ឌច្បាប់ និងបទដ្ឋានគតិយុត្តបន្ថែមទាក់ទងនឹងសុខភាពការងារនិងសុវត្ថិភាពការងារ ។ ពិសេសវិស័យសំណង់ដែលកំពុងជួបបញ្ហាប្រឈមលើកិច្ចសហការរវាងនិយោជកនិងកម្មករ ដែលទាមទារឲ្យមានការរៀបចំបន្ថែមនូវយន្តការគណៈកម្មការត្រីភាគី ក្នុងនោះមានអន្តរក្រសួង ពិសេសជាមួយក្រសួងរៀបចំដែនដី នគរូបនីយកម្ម និងសំណង់ ដើម្បីធ្វើការរួមគ្នាសម្រេចគោលដៅនេះ ។
លោក ឡេង តុង បញ្ជាក់ថា ទាក់ទងនឹងគម្រោងនេះ គឺផ្តល់នូវការបណ្តុះបណ្តាលខាងសុវត្ថិភាពការដ្ឋានសំណង់ ដែលបង្រៀនឲ្យគាត់យល់ដឹងអំពីការការពារសុវត្ថិភាពនៅកន្លែងណាដែលមានគ្រោះថ្នាក់ និងបង្រៀនអំពីរបៀបដឹកជញ្ជូនសម្ភារជាដើម ។ ការបណ្តុះបណ្តាលនេះធ្វើឡើងចំពោះគ្រូបង្គោល ដើម្បីអនុវត្តបន្តដល់កម្មករក្នុងការដ្ឋានសំណង់ ដោយគិតរហូតមកទល់ពេលនេះ ក្រុមការងារបណ្តុះបណ្តាលគ្រូបង្គោលបានកើនឡើងរហូតដល់ពាន់នាក់ហើយនៅតាមរាជធានី ខេត្ត ។
ទន្ទឹមនឹងនេះ លោក ឡេង តុង បានអំពាវនាវដល់អ្នកម៉ៅការ ក៏ដូចជានិយោជកទាំងអស់ខាងផ្នែកសំណង់ មុននឹងប្រើប្រាស់កម្មករត្រូវតែមានការបណ្តុះបណ្តាលឲ្យយល់ដឹងពីសុវត្ថិភាពជាមុនសិន ព្រោះថាគ្រប់កម្មករទាំងអស់គឺជាទ្រព្យរបស់ក្រុមហ៊ុន ។
សូមជម្រាបថា វិស័យសំណង់នៅក្នុងប្រទេសកម្ពុជាបាននិងកំពុងរីកចម្រើនយ៉ាងខ្លាំង ។ ទន្ទឹមនឹងការរីកចម្រើន ក៏មានបញ្ហាគ្រោះថ្នាក់ចំពោះកម្មករសំណង់ដែលគ្មានជំនាញដែរ ៕
ចែករំលែកព័តមាននេះ