សម្តេច​តេ​ជោ​៖ មរណភាព​ប្រធានរដ្ឋសភា​វៀតណាម គឺជា​ការ​បាត់បង់​មិត្ត​ដ៏​ល្អ​របស់​កម្ពុជា


រាជធានី​ភ្នំពេញ ៖ សម្តេច​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​បញ្ជាក់​ថា ការ​មរណភាព​ប្រធានរដ្ឋសភា​សង្គមនិយម​វៀតណាម គឺជា​ការ​បាត់បង់​មិត្ត​ដ៏​ល្អ របស់​កម្ពុជា ។

ការ​បញ្ជាក់​របស់​សម្តេច​តេ​ជោ ខណៈ​ដែល​សម្តេច​បាន​អញ្ជើញ​គោរព វិញ្ញាណក្ខន្ធ​សព​លោក ត្រាន់​ដាយ​ក្វា​ង ប្រធាន​រដ្ឋ​នៃ​សាធារណរដ្ឋ​សង្គមនិយម​វៀតណាម នៅ​ព្រឹក​ថ្ងៃ​ទី​២៦ កញ្ញា ២០១៨ ។ យោង​តាម​បណ្តាញ​សង្គម​ផ្លូវការ​របស់​សម្តេច​តេ​ជោ​បាន​សរសេរ​យ៉ាង​ដូច្នេះ​ថា ភ្លាម​ៗ​បន្ទាប់​ពី​ទទួល​បាន​នូវ​ដំណឹង​ដ៏​ក្រៀមក្រំ​បំផុត​នោះ គឺ​នៅ​ថ្ងៃ​ទី​២១ កញ្ញា​នោះ​ដែរ ប្រមុខ​រាជរដ្ឋាភិបាល​កម្ពុជា​សម្តេច​តេ​ជោ​នាយក​រដ្ឋមន្ត្រី​បាន​ផ្ញើ​សារ​នូវ​លិខិត​ចូលរួម​មរណៈទុក្ខ​ជូន លោកនាយក​រដ្ឋមន្ត្រី​វៀតណាម ង្វៀ​ន ស៊ុន​ហ្វួ​ក ចំពោះ​ការ​បាត់បង់ លោក​ប្រធាន​រដ្ឋ​វៀតណាម​ដែល​នេះ គឺជា​ការ​បាត់បង់​ដ៏​ធំធេង​នៃ​ថ្នាក់ដឹកនាំ​ដ៏​ល្អ និង​គួរ​ឱ្យ​កោតសរសើរ​ម្នាក់​របស់​ប្រ ទេស និង​ប្រជាជន​វៀតណាម និង​ក៏​ជា​ការ​បាត់បង់​មិត្ត​ដ៏​ល្អ​របស់​កម្ពុជា ។

ប្រភព​បញ្ជាក់​ថា «​តាង​នាម​រាជរដ្ឋាភិបាល និង​ប្រជាជន​កម្ពុជា​សម្តេច​សូម​សម្តែង​នូវ​សមានចិត្ត និង​ការ​ចូលរួម​រំលែក​ទុក្ខ​ដ៏​ក្រៀមក្រំ​បំផុត​ជូន​ចំពោះ​រដ្ឋាភិបាល និង​ប្រជាជន​វៀតណាម​ក៏​ដូច​ជា ជូន​ចំពោះ​ក្រុម​គ្រួសារ​សព ចំពោះ​ការ​បាត់បង់​មនុស្ស​ជាទី​ស្រលាញ់​នេះ​» ។ នៅ​ក្នុង​ពិធី​គោរព​វិញ្ញាណក្ខន្ធ​ផ្លូវការ​នោះ​ដែរ សម្តេច​តេ​ជោ​នាយក​រដ្ឋមន្ត្រី​ប្រមុខ​នៃ​រាជរដ្ឋាភិបាល​កម្ពុជា អញ្ជើញ​ចុះហត្ថលេខា​លើ​សៀវភៅ​ក្រាំងមាស​មរណៈទុក្ខ​របស់​រដ្ឋ​វៀតណាម​ដែល​មាន​ខ្លឹមសារ​ជា​អាទិ៍​ថា «​ខ្ញុំ​សូម​ចូលរួម​រំលែក​ទុក្ខ​ដ៏​ក្រោម​ក្រំ​បំផុត​ក្នុង​នាម​គណបក្ស​ប្រជាជន​កម្ពុជា រាជរដ្ឋាភិបាល និង​ប្រជាជន​កម្ពុជា ជូន​ចំពោះ​គណបក្ស​កុម្មុយនីស្ត​វៀតណាម រាជរដ្ឋាភិបាល និង​ប្រជាជន​វៀតណាម ចំពោះ​មរណភាព​លោក ត្រាន់ ដាយ​ក្វា​ង ប្រធាន​រដ្ឋ​នៃ​សាធារណរដ្ឋ​សង្គមនិយម​វៀតណាម កាលពី​ថ្ងៃ​ទី​២១ កញ្ញា​កន្លង​ទៅ​» ។

សម្តេច​តេ​ជោ​បាន​បញ្ជាក់​ទៀត​ថា «​មរណភាព​របស់​លោក​ត្រាន់ ដាយ​ក្វា​ង គឺជា​ការ​បាត់បង់​មិត្ត​ដ៏​ល្អ​របស់​កម្ពុជា និង​ជា​មិត្ត​ដ៏​ល្អ​របស់​សម្តេច ដែល​ធ្លាប់​មាន​អនុស្សាវរីយ៍​ដ៏​ជិត​ស្និទ្ធ ជាមួយ​គ្នា ។ យើង​នឹង​ចង​ចាំ​ជា​និច្ច​នូវ​ការ​ខិតខំ​ប្រឹងប្រែង​របស់​លោក ត្រាន់ ដាយ​ក្វា​ង ដើម្បី​លើកកម្ពស់ ចំណងទាក់ទង​ជា​ភាត​រៈរ​វាង​កម្ពុជា និង​វៀតណាម​ក៏​ដូច​ជា នាំ​មក​នូវ​សុភមង្គល និង​ការ​រីក​ចម្រើន​ជឿនលឿន​ថែម​ទៀត​របស់​ប្រជាជាតិ​វៀតណាម​» ។

នៅ​ព្រឹក​ថ្ងៃ​ទី​២៦ កញ្ញា​នេះ​សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ក៏​ដូច​ជា បណ្តា​មេដឹកនាំ និង​គណៈប្រតិភូ​នៃ​ប្រទេស​ជា​មិត្ត​នានា​របស់​វៀតណាម​ចំនួន​១១​ប្រទេស​ផ្សេង​ទៀត រួម​មាន​ប្រទេស​ឡាវ សិង្ហ​បុរី ម៉ូ​សំ​ប៊ិ​ច បេឡា​រ៉ុ​ស សាធារណរដ្ឋ​កូរ៉េ ជប៉ុន គូ​បា ឥណ្ឌូ​នេ​ស៊ី ចិន ម៉ា​ឡេ​ស៊ី និង​រុ​ស្សី បាន​អញ្ជើញ​ទៅ​ដល់ទី​ក្រុង​ហាណូយ សាធារណរដ្ឋ​សង្គមនិយម​វៀតណាម ដើម្បី​អញ្ជើញ​គោរព​វិញ្ញាណក្ខន្ធ​សព លោក​ប្រធាន​រដ្ឋ​វៀតណាម ត្រាន់ ដាយ​ក្វា​ង ដែល​បាន​ទទួលមរណភាព កាលពី​វេលា​ម៉ោង​១០​និង​៥​នាទី​ព្រឹក​ថ្ងៃ​ទី​២១ កញ្ញា​កន្លង​ទៅ​ថ្មី​ៗ​នេះ ក្នុង​ជន្មាយុ​៦១​ឆ្នាំ ដោយ​ជំងឺ​ដ៏​ធ្ងន់ធ្ងរ ។

សព​របស់​ប្រធាន​រដ្ឋ​វៀតណាម​បាន​ប្រារព្ធ​ពិធី​តម្កល់​ជា​ផ្លូវការ រយៈពេល​២​ថ្ងៃ គឺ​នៅ​ថ្ងៃ​ទី​២៦-២៧​កញ្ញា នៅ​បញ្ជាការដ្ឋាន​កងទ័ព​ប្រជាជន​វៀតណាម ក្នុង​ទីក្រុង​ហាណូយ ដើម្បី​អនុញ្ញាត​ឲ្យ​គណៈប្រតិភូ​បរទេស​នានា អញ្ជើញ​ចូល​គោរព​វិញ្ញាណក្ខន្ធ​សព ។ យោង​តាម​ការ​បញ្ជាក់​រដ្ឋ​របស់​ប្រទេស​វៀតណាម ប្រធាន​រដ្ឋ ត្រាន ដាយ​ក្វា​ង បាន​ទទួលមរណភាព​ដោយ​ជំងឺ​យ៉ាងធ្ងន់ធ្ងរ​ដែល​បាន​ទទួលមរណភាព​នៅ​ម៉ោង​១០​និង​០៥​នាទី​នៅ​មន្ទីរពេទ្យ​យោធា​ក្នុង​ទីក្រុង​ហាណូយ ៕

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ