ខេត្តកំពង់ឆ្នាំង ៖ អាជ្ញាធរខេត្តបានឲ្យដឹងថា នៅថ្ងៃទី១ ខែតុលា ខាងមុខនេះ អាជ្ញាធរខេត្តនឹងធ្វើបន្លាស់ទីផ្ទះបណ្តែតទឹករបស់ជនជាតិវៀតណាមជិត១ពាន់គ្រួសារ ដែលរស់នៅក្នុងបឹងទន្លេសាប ក្នុងក្រុងកំពង់ឆ្នាំងឲ្យមករស់នៅលើគោកវិញឲ្យអស់ នៅចុងឆ្នាំ២០១៨នេះ ។
លោក ស៊ុន សុវណ្ណរិទ្ធ អភិបាលរងខេត្តបានឱ្យដឹងថា នៅថ្ងៃទី២៤ ខែកញ្ញា អាជ្ញាធរខេត្តបានផ្សព្វផ្សាយសេចក្តីជូនដំណឹងពីផែនការខាងលើនេះ ដល់ប្រជាពលរដ្ឋដែលកំពុងរស់នៅលើផ្ទះបណ្តែតទឹកក្នុងទន្លេ ដើម្បីចូលរួមអនុវត្តផែនការ៥ឆ្នាំរបស់ខេត្ត គឺពីឆ្នាំ២០១៥ ដល់ឆ្នាំ២០១៩ ឲ្យទទួលបានជោគជ័យ ។
លោកបន្តថា នៅក្នុងផែនការនេះ អាជ្ញាធរខេត្តបានបង្កើតគណៈកម្មការ៦ក្រុមគឺ ក្រុមទី១ ដឹកនាំដោយរូបលោកផ្ទាល់ធ្វើបំលាស់ទីផ្ទះបណ្តែតទឹកនៅក្នុងក្រុងកំពង់ឆ្នាំង ឲ្យឡើងមករស់នៅលើកគោកឲ្យអស់នៅត្រឹមចុងឆ្នាំ២០១៨នេះ ។ ចំណែកគណៈកម្មការ៥ក្រុមទៀត គឺមានលោកស្នងការនគបាលខេត្តជាប្រធាន និង
អភិបាលស្រុកពាក់ព័ន្ធ ជាអនុប្រធាន ដោយត្រូវធ្វើបំលាស់ទីផ្ទះបណ្តែតទឹកទាំងអស់ដែលមានទាំងវៀតណាម ទាំងខ្មែរ និងទាំងខ្មែរអ៊ិស្លាមមានចំនួនជាង២ពាន់គ្រួសារ នៅតាមស្រុកក្នុងខេត្តកំពង់ឆ្នាំង ឲ្យឡើងមករស់នៅលើគោកទាំងអស់នៅក្នុងឆ្នាំ២០១៩ ។
ប្រជាពលរដ្ឋជាង២ពាន់គ្រួសារនោះ បានផ្តិតមេដៃយល់ព្រម ហើយអាជ្ញាធរខេត្តក៏បានបញ្ជូនរបាយការណ៍នេះជូនរាជរដ្ឋាភិបាលរួចហើយដែរ ។ លោកអភិបាលរងខេត្តបន្ថែមថា នៅក្រុងកំពង់ឆ្នាំងមានផ្ទះបណ្ដែតទឹករបស់ជនជាតិវៀតណាមចំនួន៩៩៦គ្រួសារ ដែលត្រូវបំលាស់ទីឲ្យឡើងមករស់នៅលើគោក នៅលើដីទំហំជាង៤០ហិកតា ក្នុងឃុំស្វាយជ្រំ ស្រុករលាប្អៀរដែលអាជ្ញាធរខេត្តបានធ្វើគម្រោងសុំអនុប្រ
យោគពីរាជរដ្ឋាភិបាល សុំកាត់ចេញពីតំបន់ដីលិចទឹក ។
ក្នុងវគ្គ១ ត្រូវធ្វើបំលាស់ទីផ្ទះបណ្តែតទឹកដែលគ្មានបែចិញ្ចឹមត្រីឲ្យឡើងមកមុនគេ និងវគ្គ២ តម្រូវឲ្យអ្នកមានបែត្រីឡើងមកក្រោយគេ គឺអនុញ្ញាតឲ្យទុកបែត្រីនៅក្នុងទន្លេនៅចំណុចទឹកជ្រៅ ដែលខេត្តនិងអ្នកជំនាញបានកំណត់ តែមិនអនុញ្ញាតឲ្យធ្វើបង្គន់អនាម័យស្នាក់នៅលើបែត្រីនោះឡើយ ៕
ចែករំលែកព័តមាននេះ