ខេត្តសៀមរាប ៖ នៅព្រឹកថ្ងៃទី២៤ ខែកញ្ញា ឆ្នាំ២០១៨ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាបសហការជាមួយមន្ទីរជំនាញដោយមានការចូលរួមពីសំណាក់អស់លោក លោកស្រី…
ខេត្តសៀមរាប ៖ នៅព្រឹកថ្ងៃទី២៤ ខែកញ្ញា ឆ្នាំ២០១៨ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាបសហការជាមួយមន្ទីរជំនាញដោយមានការចូលរួមពីសំណាក់អស់លោក លោកស្រី ជាថ្នាក់ដឹកនាំ អាជ្ញាធរក្រុង សង្កាត់ បានប្រគល់ប័ណ្ណវិញ្ញាបនបត្រសម្គាល់ម្ចាស់អចលនវត្ថុចំនួន១៣០៩ប័ណ្ណជូនដល់បងប្អូនប្រជាពលរដ្ឋរស់នៅភូមិបន្ទាយចាស់ សង្កាត់ស្លក្រាម ក្រុងសៀមរាប ប្រមាណជាង៥០០នាក់ ។
លោក ឃឹម ប៊ុនសុង អភិបាលនៃគណៈអភិបាលខេត្តសៀមរាបបានមានប្រសាសន៍ថា ដោយមានការយកចិត្តទុកដាក់របស់ប្រមុខរាជរដ្ឋាភិបាលក្នុងការចេញប័ណ្ណកម្មសិទ្ធិជូនប្រជាពលរដ្ឋ ដែលជាម្ចាស់ដី និងអ្នកកាន់កាប់ដីទាំងឡាយដែលបានបំពេញគ្រប់លក្ខខ័ណ្ឌ និងបទដ្ឋានបច្ចេកទេសតាមច្បាប់នៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប គឺត្រូវបានទទួលវិញ្ញាបនបត្រសម្គាល់អចលនវត្ថុ តែចំពោះម្ចាស់ក្បាលដីណាដែលមិនបានបំពេញនូវលក្ខខ័ណ្ឌគ្រប់គ្រាន់តាមនីតិវិធីទេនោះ គឺខាងមន្ទីរជំនាញ និងគណៈកម្មាធិការមិនអាចចេញ វិញ្ញាបនបត្រសម្គាល់អចលនវត្ថុជូនបានឡើយ ។
លោក ឃឹម ប៊ុនសុង ក៏បានលើកផងដែរថា ដោយខេត្តសៀមរាបជាតំបន់ទេសចរណ៍វប្បធម៌ និងសេដ្ឋកិច្ច ប្រមុខរាជរដ្ឋាភិបាលកម្ពុជាក៏ដូចអាជ្ញាធរខេត្តបានយកចិត្តទុកដាក់លើការកែលម្អរនូវគ្រប់ហេដ្ឋារចនាសម្ព័ន្ធក្នុងក្រុង ក្នុងការឆ្លើយតបនូវតម្រូវការចាំបាច់របស់ក្រុងប្រវត្តិសាស្ត្រមួយនេះ អាជ្ញាធរខេត្តបានរៀបចំផែនការអភិវឌ្ឍន៍ច្បាស់ លាស់សម្រាប់រយៈពេលយូរអង្វែង និងប្រកបដោយនិរន្តរភាពខ្ពស់ ។
លោកក៏បានជម្រុញដល់មន្ទីរជំនាញធ្វើការពន្លឿនការធ្វើប័ណ្ណកម្មសិទ្ធិជូនដល់ប្រជាពលរដ្ឋ ដែលនៅសេសសល់ ចំណែកប័ណ្ណកម្មសិទ្ធដែលបាននាំមកប្រគល់ជូនបងប្អូននាពេលនេះ បងប្អូននឹងមានសិទ្ធយកទៅប្រើបាស់ទៅតាមតម្រូវការក្នុងការទ្រទ្រង់ជីវភាពក្នុងក្រុមគ្រួសាររបស់ខ្លួនផងដែរ ៕
ចែករំលែកព័តមាននេះ