ខេត្តព្រះសីហនុ ៖ សេចក្តីរាយការបឋមឲ្យដឹងថា កាលពីវេលាម៉ោង៣រសៀលថ្ងៃទី២៣ កញ្ញា ២០១៨ មានករណីជនជាតិចិនចាប់ឃុំបង្ខាំង ជនជាតិចិនដូចគ្នាទុកជំរិតទាប្រាក់ ប៉ុន្តែរយៈពេលប៉ុន្មានម៉ោងក្រោយមក ក្រុមជនសង្ស័យត្រូវបានសមត្ថកិច្ចចាប់ឃាត់ខ្លួនចំនួន២នាក់ និងរំដោះជនរងគ្រោះម្នាក់ ។
សេចក្តីរាយការណ៍បន្តថា នៅថ្ងៃទី២៣ កញ្ញា ២០១៨ មាននារីជនជាតិចិនម្នាក់ បានទៅរាយការណ៍ប្រាប់សមត្តកិច្ចថា មានមិត្តប្រុសរបស់ខ្លួនម្នាក់ត្រូវបានជនជាតិចិនមួយក្រុមចាប់ឃុំទុកក្នុងបន្ទប់លេខ១០៩ ស្ថិតនៅជាន់ទី២ នៃកាស៊ីណូប៉ាវទូ ភូមិ៣ សង្កាត់២ ក្រុងព្រះសីហនុ ខេត្តព្រះសីហនុ ។
បន្ទាប់ពីសមត្ថកិច្ចទទួលបានរបាយការណ៍ផ្ទាល់មាត់ លោកឧត្តមសេនីយ៍ទោ ជួន ណារិន្ទ ស្នងការនគរ
បាលខេត្តព្រះសីហនុ បានចាត់តាំងកម្លាំងនគរបាលជំនាញព្រហ្មទណ្ឌជាបន្ទាន់ឲ្យចុះសហការជាមួយកម្លាំងនគរបាលមូលដ្ឋានសង្កាត់លេខ២ បើកប្រតិបត្តិការណ៍ រំដោះជនរងគ្រោះ និងចាប់ខ្លួនជនសង្ស័យ២នាក់ ។
ជនសង្ស័យ២នាក់ដែលសមត្ថកិច្ចចាប់ខ្លួន ម្នាក់ឈ្មោះ LIANG WEI ភេទប្រុស អាយុ៣៣ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខ EB៨០៦៩៤៩៧ មានទីលំនៅ ក្រុមទី៧ ភូមិ៣ សង្កាត់លេខ២ ក្រុងព្រះសីហនុ ខេត្តព្រះសីហនុ និងម្នាក់ទៀតឈ្មោះ LIU YING XIAO ភេទប្រុស អាយុ៣៧ឆ្នាំ ជនជាតិចិន ជាអ្នកទេសចរណ៍ ទីលំនៅមិនពិតប្រាកដ ។ ដោយឡែកជនរងគ្រោះឈ្មោះ LIU FENG ភេទប្រុស អាយុ៤២ឆ្នាំ ជនជាតិចិន ជាអ្នកទេសចរណ៍ លិខិតឆ្លងដែនលេខ E៩៩២៩២០១០ ស្នាក់នៅ ភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ។
វត្ថុតាងចាប់យករួមមាន ទូរស័ព្ទដៃចំនួន៤គ្រឿង ម៉ាក honor ពណ៌ខ្មៅ ម៉ាក Iphone 6 ពណ៌ទឹកមាស ម៉ាក mi ពណ៌ស និង ម៉ាក SAMSUNG ពណ៌ទឹកមាស អត្តសញ្ញាណប័ណ្ណចិន២សន្លឹក លិខិតឆ្លងដែន៣ច្បាប់ ប័ណ្ណចិន១ច្បាប់ វ៉ាលីសំលៀកបំពាក់១ ពណ៌ខ្មៅ កាបូបសំលៀកបំពាក់១ ពណ៌ខ្មៅ ។
តាមសំដីជនរងគ្រោះបានប្រាប់សមត្ថកិច្ចឲ្យដឹងថា ករណីខាងលើនេះដំបូងជនរងគ្រោះ បានទៅលេងល្បែងនៅកាស៊ីណូ វ៉ាងឆាវ ស្ថិតនៅ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ នៅពេលលេងល្បែងចាញ់អស់លុយ ក៏បានខ្ចីកាក់ពីក្រុមជនសង្ស័យចំនួន៣០០០ដុល្លារអាមេរិក ដើម្បីលេងបន្ត ។
បន្ទាប់ពីលេងចាញ់អស់លុយ និងគ្មានប្រាក់សងជនសង្ស័យ ជនសង្ស័យក៏បានចាប់ខ្លួនជនរងគ្រោះ ទៅឃុំទុកក្នុងបន្ទប់លេខ១០៩ ស្ថិតនៅជាន់ទី២នៃកាស៊ីណូនោះ ដើម្បីឲ្យជនរងគ្រោះទាក់ទងទៅឪពុកម្តាយ បងប្អូន ឬមិត្តភក្តិ រកប្រាក់មកសងពួកគេវិញ ទើបបានពួកគេដោះលែង ។
ក្រោយពីដឹងថា ជនរងគ្រោះត្រូវរងនូវអំពើចាប់បង្ខាំងជំរិតទារប្រាក់នោះ ត្រូវបានមិត្តស្រីរបស់ជនរងគ្រោះប្តឹងសមត្ថកិច្ច ឈានដល់ការបង្ក្រាបបទល្មើសជាក់ស្តែងនេះ ។
បច្ចុប្បន្ន សមត្ថកិច្ចកំពុងកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្ត ៕
ចែករំលែកព័តមាននេះ