រាជធានីភ្នំពេញ ៖ បេក្ខជនប្រមាណជាង៨០០០នាក់ បានចុះឈ្មោះប្រឡងក្របខណ្ឌមធ្យមសិក្សាកម្រិត២ ឬបរិញ្ញាបូកមួយ (បរិញ្ញា+១) ជំនាន់ទី២១ ដែលនឹងប្រព្រឹត្តទៅនៅក្នុងសម័យប្រឡងថ្ងៃទី២៥ ខែកញ្ញា ឆ្នាំ២០១៨ នៅតាមមណ្ឌលចំនួន៨ នៅក្នុងរាជធានីភ្នំពេញមានមុខវិជ្ជាគណិត អង់គ្លេស សីលធម៌ពលរដ្ឋ ប្រវត្តិ អក្សរសិល្ប៍ខ្មែរ អគ្គិសនី អេឡិចត្រូនិច គីមីចំណីអាហារជាដើម ។
នេះជាការបញ្ជាក់របស់គណៈកម្មការទទួលខុសត្រូវនៃការប្រឡងដែលបានធ្វើឡើងក្នុងកិច្ចប្រជុំគណៈកម្មការមេប្រយោគនៅវិទ្យាស្ថានជាតិអប់រំនាព្រឹកថ្ងៃទី២៤ ខែកញ្ញា ឆ្នាំ២០១៨ ដែលមានមេប្រយោគប្រមាណ៤០០០នាក់ចូលរួម ។
គណៈកម្មការទទួលខុសត្រូវការប្រឡងបានលើកឡើងនៅចំពោះគណៈមេប្រយោគមកពីមណ្ឌលទាំងអស់ ចំនួន៨ថា ការទទួលពាក្យចាប់ផ្តើមពីថ្ងៃទី០២ ខែកក្កដា ដល់ថ្ងៃទី៨ កញ្ញា២០១៨ ។ ចំនួនបេក្ខជនបានដាក់ពាក្យចំនួនជាង៨០០០នាក់ (ស្រី៤១០០នាក់) និស្សិតសុទ្ធសាធមានជាង៥០០០នាក់ ស្រីជាង២៧០០នាក់ និងបុគ្គលិកអប់រំមានជាង២៨០០នាក់ ស្រីជាង២០០០នាក់ ។ ក្នុងចំណោមបេក្ខជនទាំងអស់មានតែបេក្ខជនជាង៨០០នាក់ ត្រូវជ្រើសរើស ។ មុខវិជ្ជាអក្សរសិល្ប៍ខ្មែរត្រូវប្រឡងនៅមណ្ឌលវិទ្យាស្ថានជាតិអប់រំជាង១៨០០នាក់ ជ្រើសរើសតែ៩៦នាក់ (៧.៤៣%) មណ្ឌលវិទ្យាល័យជាស៊ីមសន្ធរមុខ បេក្ខជនជាង១៤០០នាក់ មុខវិជ្ជាភាសាអង់គ្លេសជ្រើសរើស៨១នាក់ ។ មណ្ឌលអនុវិទ្យាល័យចតុមុខមានបេក្ខជនជាង១២៥០០នាក់ មានមុខវិជ្ជាចំនួនពីរដែលត្រូវប្រឡង គឺមុខវិជ្ជាសីលធម៌ -ពលរដ្ឋ មានបេក្ខជនជាង៩០០នាក់ ជ្រើសរើស៩៧នាក់ និងប្រវត្តិវិទ្យាមានបេក្ខជនជាង៣៥០នាក់ ជ្រើសរើស៥០នាក់ ។
ចំពោះមណ្ឌលវិទ្យាល័យបាក់ទូកមានបេក្ខជនជាង១២៣០នាក់ មានបីមុខវិជ្ជាដែលត្រូវប្រឡងនៅមណ្ឌលនេះមាន គឺមុខវិជ្ជាសេដ្ឋកិច្ច មានបេក្ខជនជាង១១៧០នាក់ ជ្រើសរើស២០នាក់ មុខវិជ្ជានេះមានការប្រកួតប្រជែងខ្លាំង ដោយសារបេក្ខជនច្រើនជ្រើសរើសតិច ។ មុខវិជ្ជាអគ្គិសនីមានបេក្ខជន៤៤នាក់ ជ្រើសរើស១១នាក់ ។ មុខវិជ្ជាអេឡិចត្រូនិចមានបេក្ខជន១២នាក់ ជ្រើសរើស៨នាក់ ។ មណ្ឌលវិទ្យាល័យវត្តកោះមានបួនមុខវិជ្ជា គឺគណិតវិទ្យា ប្បសុ ផែនដី និងភាសាបារាំង ។ មុខវិទ្យាគណិតវិទ្យាមានបេក្ខជនប្រមាណ៩០០នាក់ ជ្រើស១១២នាក់ មុខវិជ្ជាប្បសុមានបេក្ខជនជាង១០០ជ្រើសរើស៤.៥០% ផែនដីបេក្ខជនជាង១០០នាក់ ជ្រើសរើស៥៣នាក់ ភាសាបារាំងមានបេក្ខជន៥៦នាក់ ជ្រើសរើស១០នាក់ ។ មុខវិជ្ជាមេកានិចមានបេក្ខជន៨នាក់ជ្រើសរើស១២នាក់ មានតែមុខវិជ្ជានេះទេ មានបេក្ខជនតិចជាងការជ្រើសរើស ។ រីឯមណ្ឌលវិទ្យា ល័យ ព្រះស៊ីសុវត្ថិមានបេក្ខជនជា១០០០នាក់មានមុខវិជ្ជាចំនួនបីត្រូវប្រឡង គឺមុខវិជ្ជាជីវវិទ្យាមានបេក្ខជនជាង៥០០នាក់ មុខវិជ្ជារូបវិទ្យាមានបេក្ខជនជាង៣០០នាក់ និងមុខសេតសាស្ត្របេក្ខជនជាង២០០នាក់ ។ មណ្ឌលបឋមសិក្សាបាក់ទូកមានមុខវិជ្ជា៥០បន្ទប់ មានមុខវិជ្ជា៥ ។
ទោះបីយ៉ាងណាគណៈកម្មការទទួលខុសត្រូវបានបញ្ជាក់ការប្រឡងនេះក្រសួងអប់រំបានអនុវត្តន៍ស្តង់ដាដូចការ ប្រឡងសញ្ញាបត្របាក់ឌុបដែរ គឺអនុវត្តគោលការណ៍«អ្នកចេះ គឺជាប់»ហើយអ្នកមិនជាប់ខំបន្ថែមទៀត ។ ការប្រឡងនេះក្រសួងបានបង្កើតវិញ្ញាសាចេញពីវិទ្យាស្ថានជាតិអប់រំ ដោយផ្ទាល់ដោយមានវិញ្ញា សាឯកទេស និងវប្បធម៌ទូទៅដំណើរការចាប់ផ្តើមពីម៉ោង៧ព្រឹកដល់១១និង៤៥នាទី ។ បេក្ខជន និងគណៈកម្មការអនុរក្សត្រូវទៅដល់មណ្ឌលប្រឡងរយៈពេលយ៉ាងតិច១ម៉ោងមុនដំណើរការវិញ្ញាសាសរសេរ ៕
ចែករំលែកព័តមាននេះ