ខេត្តព្រះសីហនុ ៖ បុរស-ស្ត្រី៣នាក់បានស្លាប់នៅនឹងកន្លែង និង៥នាក់ទៀតរងរបួសស្រាលនិងធ្ងន់ នៅក្នុងហេតុការណ៍គ្រោះថ្នាក់រថយន្តបុកបន្តកន្ទុយគ្នា កាលពីវេលាម៉ោងប្រមាណ១០ព្រឹកថ្ងៃទី២២ ខែកញ្ញា នៅខាងមុខស្ថានីយប្រេងឥន្ធនៈសូគីមុិច ចំណុចផ្លូវបំបែកស្ថានីយរថភ្លើង ក្នុងភូមិ៣ សង្កាត់លេខ៣ ក្រុងព្រះសីហនុ ។ ភ្លាមៗ អ្នករងរបួសត្រូវបានរថយន្តគ្លីនិកដឹកយកទៅព្យាបាល ។
មន្ត្រីនគរបាលការិយាល័យចរាចរណ៍ផ្លូវគោកខេត្ត បានឲ្យដឹងថា នាវេលាម៉ោងប្រមាណ១០ព្រឹកថ្ងៃនោះ មានរថយន្តបែនដឹកដីមួយគ្រឿងម៉ាកនីស្សាន់ ពណ៌ស គ្មានផ្លាកលេខ បើកបរចុះមកពីចំណោតលោកយាយម៉ៅក្នុងល្បឿនលឿន ។ ដោយសារមានបញ្ហាជាន់ហ្វ្រាំងមិនសុី ក៏ជ្រុលទៅបុករថយន្តដែលកំពុងធ្វើដំណើរនៅខាងមុខ បណ្តាលឲ្យមានការបុករះបន្តកន្ទុយគ្នាជាច្រើនគ្រឿង ដែលមាន ៖
១-រថយន្តមែរសឺដេស ពណ៌ខ្មៅ ពាក់ផ្លាកលេខ ភ្នំពេញ ២L-០៨៥៨ ជារថយន្តរបស់លោក អ៊ុក កាលីន ប្រធានច្រកកំពង់ផែសេដ្ឋកិច្ចទំនប់រលកនៃសាលាខេត្តព្រះសីហនុ
២-រថយន្តទួរីសចំណុះ១២កៅអី ពណ៌សលាយប្រផេះ ពាក់ផ្លាកលេខ ភ្នំពេញ ៣D-៤៨៧៦
៣-រថយន្តហាយឡែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ ២C-៩៩៦៣
៤-រថយន្តហុីយ៉ាន់ដាយ ពណ៌ស មិនមានផ្លាកលេខ និង
៥-រថយន្តកូរ៉េ ពណ៌ស ពាក់ផ្លាកលេខ ព្រះសីហនុ ២A-៩៣៨៦ ។
ជាមួយនេះ បណ្តាលឲ្យខូចខាតម៉ូតូ២គ្រឿង ដែល១គ្រឿងម៉ាកវ៉េវ អាល់ហ្វា ជាម៉ូតូជនរងគ្រោះដែលស្លាប់បាត់បង់ជីវិត រងការខូចខាតទាំងស្រុង និង១ទៀតម៉ាកហុងដាសេ១២៥ ស៊េរីឆ្នាំ២០១៧ ពណ៌ខ្មៅ បុកដាច់ផ្លាកលេខបាត់ ។ ជនរងគ្រោះដែលស្លាប់បាត់បង់ជីវិតនៅមិនទាន់ស្គាល់អត្តសញ្ញាណនៅឡើយទេ ហើយត្រូវបាននគរបាលដឹកយកទៅតម្កល់ទុកនៅវត្តក្រោមហៅវត្តឥន្ទញ្ញាណ រង់ចាំសាច់ញាតិយកទៅធ្វើ
បុណ្យទៅតាមប្រពៃណី ។ ដោយឡែក រថយន្តទាំង៥គ្រឿង ត្រូវបាននគរបាលការិយាល័យចរាចរណ៍ផ្លូវគោកខេត្ត ស្ទូចយកទៅរក្សាទុករង់ចាំការដោះស្រាយនៅពេលក្រោយ ។
សូមបញ្ជាក់ថា នៅវេលាម៉ោងប្រមាណ១០ព្រឹកថ្ងៃនោះដែរ ក៏មានករណីគ្រោះថ្នាក់រថយន្តបុកម៉ូតូនៅចំណុចអតីតដីក្រុមហ៊ុនអារីស្តុន ក្នុងភូមិ៤ សង្កាត់លេខ៤ ក្រុងព្រះសីហនុ បណ្តាលឲ្យអ្នកបើកបរម៉ូតូស្លាប់ភ្លាមនៅនឹងកន្លែងកើតហេតុដែរ ៕
ចែករំលែកព័តមាននេះ