រាជធានីភ្នំពេញ ៖ ខ្មាន់កាំភ្លើងមិនស្គាល់មុខបានបាញ់សម្លាប់បុរសម្នាក់ កាលពីវេលាព្រឹកព្រលឹមថ្ងៃទី២៣ ខែកញ្ញា នៅក្បែរផ្សារនាគមាស ស្ថិតក្នុងខណ្ឌទួលគោក ។ តាមអ្នកស្គាល់អត្តសញ្ញាណបុរសដែលត្រូវខ្មាន់កាំភ្លើងបាញ់ស្លាប់នេះបានប្រាប់ថា គឺជាមនុស្សបែកថ្នាំដែលតែងបង្កការឆាឆៅនៅចំណុចខាងលើ…
រាជធានីភ្នំពេញ ៖ ខ្មាន់កាំភ្លើងមិនស្គាល់មុខបានបាញ់សម្លាប់បុរសម្នាក់ កាលពីវេលាព្រឹកព្រលឹមថ្ងៃទី២៣ ខែកញ្ញា នៅក្បែរផ្សារនាគមាស ស្ថិតក្នុងខណ្ឌទួលគោក ។ តាមអ្នកស្គាល់អត្តសញ្ញាណបុរសដែលត្រូវខ្មាន់កាំភ្លើងបាញ់ស្លាប់នេះបានប្រាប់ថា គឺជាមនុស្សបែកថ្នាំដែលតែងបង្កការឆាឆៅនៅចំណុចខាងលើ ។
បើតាមប្រភពពីសមត្ថកិច្ចបានឱ្យដឹងថា ករណីបាញ់សម្លាប់នេះ បានកើតឡើងនាវេលាម៉ោង០៥និង១៥នាទីព្រឹកព្រលឹមថ្ងៃទី២៣ ខែកញ្ញា នៅផ្លូវលេខ២៣៤ ខាងជើងផ្សារនាគមាស ជិតផ្លូវលេខ២៣១ ដែលការបាញ់ប្រហារនោះមាន៤គ្រាប់ បណ្តាលឱ្យស្លាប់នៅនឹងកន្លែង ។
ប្រភពដដែលបន្តថា ជនរងគ្រោះឈ្មោះ ធី ធូ ជាមនុស្សប្រើប្រាស់គ្រឿងញៀន ហើយត្រូវសាលាសង្កាត់ចាប់បញ្ចូនទៅមន្ទីរសង្គមកិច្ច រាជធានីភ្នំពេញ កាលពីល្ងាចថ្ងៃទី២២ ខែកញ្ញា ។ តាមប្រភពថា មន្ត្រីខាងមន្ទីរសង្គមកិច្ចបានរាយការណ៍ថា ជននេះ បានគាស់ខ្នោះដៃហើយរត់ចេញពីមណ្ឌលកែប្រែនៅអំឡុងម៉ោង៣ទៀបភ្លឺ ថ្ងៃទី២៣ កញ្ញា ។
សមត្ថកិច្ចដែលទៅធ្វើការត្រួតពិនិត្យសព មិនទាន់សន្និដ្ឋានបែបណានោះទេ ដោយប្រាប់ថា សពត្រូវបានដឹកទៅតម្កល់នៅវត្តស្ទឹងមានជ័យ ដើម្បីឱ្យបងប្អូនយកទៅធ្វើបុណ្យ ។ រីឯខ្មាន់កាំភ្លើងបានគេចខ្លួនបាត់ មិនទាន់កំណត់មុខសញ្ញាបាននៅឡើយទេ ៕
ចែករំលែកព័តមាននេះ