ខេត្តកំពង់ស្ពឺ ៖ ជនសង្ស័យម្នាក់កំពុងជិះម៉ូតូដើរលក់ថ្នាំញៀន ពេលជិះមកដល់លើខ្នងប្រឡាយ១កន្លែង ត្រូវសមត្ថកិច្ចក្របួចជាប់ព្រមទាំងដកហូតបានថ្នាំញៀន និងមធ្យោបាយធ្វើដំណើរ១គ្រឿង។ ករណីបង្ក្រាបមុខសញ្ញាចែកចាយថ្នាំញៀនទាំងកណ្តាលថ្ងៃនេះ បានកើតឡើងនៅម៉ោង១២ ថ្ងៃត្រង់ ថ្ងៃទី១៩…
ខេត្តកំពង់ស្ពឺ ៖ ជនសង្ស័យម្នាក់កំពុងជិះម៉ូតូដើរលក់ថ្នាំញៀន ពេលជិះមកដល់លើខ្នងប្រឡាយ១កន្លែង ត្រូវសមត្ថកិច្ចក្របួចជាប់ព្រមទាំងដកហូតបានថ្នាំញៀន និងមធ្យោបាយធ្វើដំណើរ១គ្រឿង។
ករណីបង្ក្រាបមុខសញ្ញាចែកចាយថ្នាំញៀនទាំងកណ្តាលថ្ងៃនេះ បានកើតឡើងនៅម៉ោង១២ ថ្ងៃត្រង់ ថ្ងៃទី១៩ ខែកញ្ញា ឆ្នាំ២០១៨ ស្ថិតលើខ្នងប្រឡាយទឹកក្នុងភូមិបាក់ចិញ្ចៀន ឃុំត្រពាំងគង ស្រុកសំរោងទង។ ជនសង្ស័យឈ្មោះ គុជ ចាន់ណាមេ ភេទប្រុស អាយុ២៣ឆ្នាំ រស់នៅភូមិលំពែងព្រះរាម ឃុំត្រពាំងគង ស្រុកសំរោងទង។
ប្រភពព័ត៌មានពីសមត្ថកិច្ចបានឲ្យដឹងថា មុនឈានដល់ចុះបង្ក្រាប មុខសញ្ញាចែកចាយថ្នាំញៀនម្នាក់នេះ សមត្ថកិច្ចស្រុកសំរោងទង បានទទួលព័ត៌មានពីប្រជាពលរដ្ឋ ក្នុងភូមិកើតហេតុបានរាយការណ៍ថា មានជនសង្ស័យមកលក់ជាមុខសញ្ញាចាស់ កំពុងជិះម៉ូតូដើរលក់ និងចែកចាយថ្នាំញៀនក្នុងភូមិ។ ក្រោយទទួលព័ត៌មាននេះច្បាស់រួច លោកអធិការបានចាត់កម្លាំងជំនាញ ចុះបង្ក្រាបហើយបានប្រទះឃើញជនសង្ស័យ កំពុងជិះម៉ូតូ១គ្រឿងម៉ាកស្មាស ពណ៌ខ្មៅ ពាក់ស្លាកលេខ ភ្នំពេញ ១AQ-២៩៥០ មកដល់លើខ្នងប្រឡាយ ក៏ស្ទាក់ឆែកឆេរ លើខ្លួនដកហូតបានថ្នាំញៀនប្រភេទ ទឹកកកចំនួន១១កញ្ចប់ និងទូរស័ព្ទដៃ១គ្រឿង។
បច្ចុប្បន្នជនសង្ស័យ និងវត្ថុតាង ត្រូវសមត្ថកិច្ចយកមកអធិការដ្ឋាន ដើម្បីកសាងសំណុំរឿង បញ្ជូនទៅការិយាល័យជំនាញគ្រឿងញៀន ដើម្បីចាត់ការតាមច្បាប់។ មហាជនបានលើកឡើងផងដែរថា ជាទូទៅសមត្ថកិច្ចបានធ្វើការបង្ក្រាប ក្រុមជនសង្ស័យជាមុខសញ្ញាជួញដូរថ្នាំញៀនបានច្រើននាក់បញ្ជូនទៅតុលាការជាហូរហែ តែឆ្ងល់ថា ហេតុអ្វីបានជាចាប់មិនចេះអស់សោះចឹង។ ទោះយ៉ាងណាក៏មហាជនបានសរសើដល់សមត្ថកិច្ច ដែលបានចំណាយកម្លាំងក្នុងការតាមប្រមាញ់ក្រុមមនុស្សក្រៅសង្គមទាំងនេះបានជាបន្តបន្ទាប់៕
ចែករំលែកព័តមាននេះ