រាជធានីភ្នំពេញ ៖ ក្រោយពីជួបគ្រោះថ្នាក់ចរាចរណ៍ លោក ហ៊ិន រតនា គ្រូកីឡាដ៏ល្បីនៅក្នុងប្រទេសកម្ពុជា ដែលបានវិវត្តខ្លួនក្លាយជាអ្នកបង្វឹកឆ្កែពូជធំៗឱ្យចេះហិតគ្រឿងញៀនរហូតមានការទទួលស្គាល់ពីស្នាដៃនោះ នៅតែស្ថិតក្នុងសភាពធ្ងន់ធ្ងរនៅឡើយ ដោយលោកកំពុងស្ថិតក្នុងបន្ទប់សង្គ្រោះបន្ទាន់ ហើយអាចនឹងមានគ្រោះថ្នាក់ផងប្រសិនបើខ្វះការជួយជ្រោមជ្រែងជាថវិកា នាពេលនេះ ។
យ៉ាងណាមិញ គេឃើញបណ្ដាសប្បុរសជនបានចេញមុខធ្វើសកម្មភាពជួយរៃអង្គាសថវិកាជួយដល់លោកបើទោះជាមិនទាន់ដឹងថា តើថវិកានោះគ្រប់ចំនួនអាចជួយសង្គ្រោះលោកឱ្យល្អប្រសើរបាន ឬមិនបាន ខណៈដែលការសង្គ្រោះបន្ទាន់នៅក្នុងប្រទេសថៃត្រូវគេដឹងថា ចំណាយខ្ពស់។
លោក ហ៊ិន រតនា ត្រូវរថយន្តមួយបុកពេញទំហឹង ហើយជ្រុលល្បឿនកិនបន្ថែមទៀត បណ្ដាលឱ្យលោករងរបួសធ្ងន់ត្រូវបញ្ជូនទៅព្យាបាលនៅក្នុងប្រទេសថៃ ។ បងថ្លៃរបស់លោក ហ៊ិន រតនា គឺលោក ខ្លេង សុខហ៍ បានរៀបរាប់ក្នុងសន្និសីទកាសែតកាលពីព្រឹកថ្ងៃទី១៧ ខែកញ្ញា ឆ្នាំ២០១៨ ឱ្យដឹងថា ប្អូនប្រុសរបស់លោកជាកូនខ្មែរនិងធំដឹងក្ដីនៅអាមេរិកគឺជាគ្រូបង្វឹកសុនខដ៏ល្បីរបស់កម្ពុជា រហូតមានការទទួលស្គាល់ក្នុងកម្រិតអន្តរជាតិលើជំនាញនេះផងដែរ ។ លោកជួបគ្រោះថ្នាក់ចរាចរណ៍ កាលពីថ្ងៃទី ២៥ ខែសីហា ឆ្នាំ២០១៨ ដោយរថយន្តបុក និងកិនបន្ថែមជាហេតុនាំឲ្យរងរបួសធ្ងន់ត្រូវដឹកយកទៅព្យាបាលនៅក្នុងប្រទេសថ ។
គិតមកទល់ម៉ោងនេះ មានការអះអាងថា ការចំណាយលើការព្យាបាលលោក គឺអស់រង្វង់ពី៨ទៅ១០ម៉ឺនដុល្លារហើយ ទើបធ្វើឱ្យលោកប្រឈមនឹងការលំបាករឿងអស់ថវិកាក្នុងការព្យាបាល ។ ក្នុងនោះគ្រួសាររបស់លោកទាំងមូលក៏បានប្រកាសថា ឈានដល់ដំណាក់កាលអស់លទ្ធភាពដើម្បីបន្តការព្យាបាលលោក ហ៊ិន រតនា ទៀតហើយ ដោយសារតែសភាពកិនរបស់រថយន្តក្នុងពេលគ្រោះថ្នាក់ ធ្វើឱ្យលោកបាក់ឆ្អឹងច្រើនអន្លើ ដែលទាមទារឱ្យចំណាយច្រើនទៀតដើម្បីសង្គ្រោះ។
លោក ជី សិលា ដែលត្រូវគេស្គាល់ថាជានាយកប្រតិបត្តិក្រុមហ៊ុនសប្បាយ បានអះអាងថា លោកនឹងចេញធ្វើយុទ្ធនាការប្រមូលថវិកាជួយដល់គ្រូកីឡាខាងផ្នែកបង្វឹកសុនខរូបនេះ ដោយលោកនិយាយថា គឺជារឿងសង្វេគណាស់ប្រសិនបើលោក ហ៊ិន រតនា ត្រូវធ្លាក់ខ្លួនពិការ ឬមានគ្រោះថ្នាក់ដល់ជីវិត ដោយសារតែអស់លទ្ធភាពក្នុងការព្យាបាល ។
លោកថា យុទ្ធនាការដែលខ្លួននឹងធ្វើគឺមានឈ្មោះថា(#ស៊ូស៊ូsusu)ដោយលោកប្រកាសថានឹងអំពាវនាវឱ្យមហាជនបរិច្ចាគជួយដល់លោក ខណៈដែលទឹកប្រាក់របស់មហាជនដែលជួយដល់លោកមានចំនួនប៉ុន្មាន រូបលោកនិងក្រុមហ៊ុនជាដៃគូមួយទៀត ក៏នឹងបរិច្ចាគឱ្យស្មើនឹង២ភាគបន្ថែមដើម្បីឱ្យជំនួយនោះបានច្រើន ។ លោកឧទាហរណ៍ថា បើអ្នកអាណិតលោក ចូលរួមវិភាគទាន១ដុល្លារនោះនឹងបាន២ដុល្លារបន្ថែមទៀតពីក្រុមហ៊ុនរបស់លោក ធនាគារជាដៃគូ ដែលមានន័យថា មហាជនជួយលោកតែ១ដុល្លារ តែលោក ហ៊ិន រតនា ទទួលបាន៣ដុល្លារ។
លោក ប៊ិន ដេវិន នាយកប្រតិបត្តិធនាគារមួយ ដែលបានចាប់ដៃក្នុងគម្រោងយុទ្ធនាការនេះ បានអះអាងថា លោកនឹងស្វែងរកថវិកាឱ្យបានមួយម៉ឺនប្រាំពាន់ដុល្លារ ជួយដល់លោក ហ៊ិន រតនា សម្រាប់ការព្យាបាលក្នុងជំហានដំបូង ហើយប្រសិនបើគ្រូកីឡាដែលល្បីខាងបង្វឹកឆ្កែរូបនេះ នៅតែមានការប្រឈមការខ្វះខាត នោះលោកនឹងធ្វើការពិចារណាពីរឿងជួយរៃអង្គាសថវិកាជួយបន្តទៀត ។
លោកថា យុទ្ធនាការនេះ នឹងតម្រូវឱ្យអ្នកអាណិតស្រឡាញ់លោក វេរជំនួយចូលក្នុងគណនី វីងលេខ ០០៥៤៣៦០១ដែលជាគណនីរបស់លោក ហ៊ិន រតនា ដោយផ្ទាល់ ដើម្បីឱ្យលោកមានថវិកាក្នុងការព្យាបាលបន្ត៕
ចែករំលែកព័តមាននេះ