រាជធានីភ្នំពេញ ៖ បុរសម្នាក់ជិះម៉ូតូឌុបប្រពន្ធទៅលេងផ្ទះបងប្អូន ដោយចាក់ទុកយ៉ាងត្រឹមត្រូវ ស្រាប់តែត្រូវជនសង្ស័យ២នាក់លួច ហើយត្រូវប្អូនឭសំឡេងស្រែកដេញចាប់ម្នាក់ភ្លាមៗ ហេតុការណ៍នេះបង្កឱ្យការភ្ញាក់ផ្អើលកាលពីម៉ោង១២និង៣០នាទីថ្ងៃត្រង់ ថ្ងៃទី១៧ ខែកញ្ញា ឆ្នាំ២០១៨…
រាជធានីភ្នំពេញ ៖ បុរសម្នាក់ជិះម៉ូតូឌុបប្រពន្ធទៅលេងផ្ទះបងប្អូន ដោយចាក់ទុកយ៉ាងត្រឹមត្រូវ ស្រាប់តែត្រូវជនសង្ស័យ២នាក់លួច ហើយត្រូវប្អូនឭសំឡេងស្រែកដេញចាប់ម្នាក់ភ្លាមៗ ហេតុការណ៍នេះបង្កឱ្យការភ្ញាក់ផ្អើលកាលពីម៉ោង១២និង៣០នាទីថ្ងៃត្រង់ ថ្ងៃទី១៧ ខែកញ្ញា ឆ្នាំ២០១៨ នៅចំណុចផ្ទះជួលលេខ ៤២Eo ផ្លូវលេខ៣៣៨ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន។
តាមប្រភពពីនគរបាលប៉ុស្តិ៍ប្រាប់ឱ្យដឹងថា ជនសង្ស័យដែលចាប់ខ្លួនឈ្មោះ ហុង ឧត្តម អាយុ១៦ឆ្នាំ ជាកម្មករលីសែងនៅផ្សារនាគមាស មានទីលំនៅមិនពិតប្រាកដ។ ចំណែកឯជនរងគ្រោះឈ្មោះ វួន ម៉េងលី ភេទប្រុស អាយុ២៧ឆ្នាំ មុខរបរបើកបររថយន្ត ស្នាក់នៅផ្ទះជួលម្តុំលូប្រាំ ក្នុងសង្កាត់ស្ទឹងមានជ័យ ខណ្ឌមានជ័យ។
នគរបាលប៉ុស្តិ៍បន្តថា មុនកើតហេតុជនរងគ្រោះជិះម៉ូតូម៉ាកហុងដា C125 ស៊េរីឆ្នាំ២០១៨ ពាក់ស្លាកលេខពោធិ៍សាត់ ១H-៩៧០៦ មួយគ្រឿងដោយឌុបប្រពន្ធមកលេងផ្ទះជួលរបស់ប្អូនប្រុសម្នាក់នៅចំណុចកើតហេតុដោយចាក់សោ.ក និងសោរជន្ទល់ទុកខាងក្រោម ។
ក្រោយមកទាំង២នាក់ប្តីប្រពន្ធនាំគ្នាដេកលក់អស់ នៅសល់តែប្អូនប្រុសអង្គុយលេងហ្គេមទូរស័ព្ទក៏ឭសំឡេង «ក្រេកក្រុក» ខាងក្រោមក៏ចុះមកមើល ស្រាប់តែឃើញជនសង្ស័យ ម្នាក់កំពុងលួចយកម៉ូតូ ម្នាក់ទៀតកំពុងតែឈរមើលផ្លូវក្បែរម៉ូតូរបស់គេមួយគ្រឿងម៉ាកស្មាស់ ពណ៌ខ្មៅ ពាក់ស្លាកលេខពាក់ភ្នំពេញ ១G-៧៩២៤ មួយគ្រឿងនៅខាងក្រៅ។
ប្រភពដដែលបន្តទៀតថា ពេលនោះរូបគេក៏ស្រែកថា «ចោរៗ» រត់ចុះក្រោមដេញតាមធ្វើឱ្យមានការភ្ញាក់ផ្អើលកើតឡើង និងចាប់ក្របួចជាប់ជនសង្ស័យម្នាក់ ជាចាំមើលផ្លូវ រួមនឹងម៉ូតូមួយគ្រឿងនោះ ចំណែកឯជនសង្ស័យជាអ្នកលួចម៉ូតូរត់គេចខ្លួនបាត់ស្រមោលបាត់ទៅ។
ក្រោយពេលកើតហេតុ ម៉ូតូរបស់ជនរងគ្រោះត្រូវបានប្រគល់ទៅឱ្យ ម្ចាស់ដើមវិញ ចំណែកឯ ជនសង្ស័យ រួមទាំងម៉ូតូជិះធ្វើសកម្មភាពក៏នាំមកកាន់នគរបាលប៉ុស្តិ៍ទួលស្វាយព្រៃទី១ ដើម្បីសាកសួរ និងនាំខ្លួនបន្តទៅកាន់អធិការនគរបាលខណ្ឌចំការមនចាត់ការតាមផ្លូវច្បាប់៕
ចែករំលែកព័តមាននេះ