ខេត្តមណ្ឌលគិរី ៖ តាមសេចក្តីរាយការណ៍បឋមបានឲ្យដឹងថា កាំភ្លើងកែច្នៃ៤ដើម ត្រូវបានមន្ត្រីឧទ្យានុរក្ស ដែនជម្រកភ្នំណាមលៀរចាប់បង្ក្រាប ខណៈក្រុមព្រានព្រៃនាំយកទៅបរបាញ់សត្វព្រៃ ករណីនេះកើតឡើង នៅល្ងាចថ្ងៃទី១៦ ខែកញ្ញា ២០១៨ ចំណុចអូរប៉ាលែត ភូមិពូឡេះ ឃុំដាក់ដាំ ស្រុកអូររាំង ខេត្តមណ្ឌលគិរី ។
សេចក្តីរាយការណ៍បន្ត លោក វុធ សារុំ នាយកដែនជម្រកការពារសត្វព្រៃណាមលៀរឲ្យដឹងថា មន្ត្រីរបស់លោកប្រចាំនៅស្នាក់ការកង់ឡង់ទួលស្វាយបានដេញចាប់ជនសង្ស័យចំនួន០៨នាក់ ដែលជិះម៉ូតូ០៤គ្រឿង ហើយមានកាំភ្លើង០៤ដើម ជាប្រភេទកាំភ្លើងកែច្នៃប្រើខ្យល់ ។ ពេលនោះជនសង្ស័យមានការភ័យខ្លាំងក៏បានបោះកាំភ្លើងចោលទាំងអស់ នៅចំណុចអូរប៉ាលែត ហើយរត់ទៅចូលព្រៃបាត់ស្រមោល ។
លោកនាយកដែនជម្រកបន្តថា ក្រុមការងារបានវត្ថុតាងមករក្សាទុកនៅស្នាក់ការកង់ឡង់ ដើម្បីចាត់វិធានការតាមច្បាប់ ៕
ចែករំលែកព័តមាននេះ