រាជធានីភ្នំពេញ ៖ ស្ត្រីជាកម្មការិនីរោងចក្រម្នាក់បានជ្រុលជ្រួសប្រគល់ខ្លួនប្រាណឲ្យបុរសកម្មករសំណង់រហូតមានផ្ទៃពោះជិតគ្រប់ខែ ហើយដើររកប្តីមិនឃើញ ថែមទាំងអត់លុយទៅស្រុកកំណើតវិញទៀត ក៏ជិះម៉ូតូទៅប៉ុស្តិ៍ចោមចៅជួយសោហ៊ុយទៅស្រុកកំណើត ហេតុការណ៍នេះកាលពីម៉ោង៦ល្ងាច ថ្ងៃទី១៦ ខែកញ្ញា ឆ្នាំ២០១៨ ស្ថិតនៅប៉ុស្តិ៍វនគរបាលចោមចៅទី៣ ខណ្ឌពោធិ៍សែនជ័យ ។
ស្ដ្រីពោះធំខាងលើអាយុ២៥ឆ្នាំ មុខរបរអតីតកម្មកររោងចក្រ រស់នៅខេត្តស្វាយរៀង ចំណែកបុរសជាប្តីឈ្មោះ ថន ពៅ អាយុ៣៤ឆ្នាំ សំណង់នៅកំពង់សោម នៅខេត្តកំពត ។
តាមសំដីស្ត្រីពោះធំខាងលើនិយាយថា រូបគាត់មានទំនាក់ទំនងស្នេហាជាមួយប្រុសស្នេហ៍ខាងលើរយៈពេលជាង៣ឆ្នាំមកហើយ ដោយបុរសជាប្តីរបស់គាត់ជាកម្មករសំណង់នៅកំពង់សោម ចំណែកគាត់ធ្វើការនៅរោងចក្រ ។ ហើយគាត់បានរួមរស់ជាមួយគ្នាតែពុំមានរៀបចំសែនព្រេនអ្វីនោះឡើយ លុះនៅពេលគាត់មានផ្ទៃពោះ៣ខែ គាត់ចាញ់កូនតែងតែឈឺជាញឹកញាប់ ក៏សុំប្តីទៅស្រុកវិញ ។
ស្ត្រីខាងលើបន្តថា ក្រោយពេលចេញពីប្តីទៅប្រមាណ៣ទៅ៤ខែ ប្តីនាងមិនបានផ្ញើលុយកាសឱ្យនាងទាល់តែសោះ ខណៈមានផ្ទៃពោះ៨ខែហើយក៏ដាច់ចិត្តចេញពីស្រុកកំណើតទៅរកប្តីនៅកំពង់សោម ។ ពេលទៅដល់កន្លែងធ្វើការនាងសួររកប្តីគេប្រាប់ថា ប្តីនាងឈប់ធ្វើការនៅទីនោះហើយ ទៅរកការងារធ្វើនៅឯភ្នំពេញ ។ បន្ទាប់មកនាងក៏ទៅរកប្តីនៅភ្នំពេញបន្តទៀត តែរកពុំឃើញប្តី ដោយអស់លុយពីខ្លួនរលីងមិនដឹងទៅឯណាបានក៏សម្រេចចិត្តជិះម៉ូតូទៅប៉ុស្តិ៍នគរបាលចោមចៅ៣ ឲ្យជួយសោហុយធ្វើដំណើរទៅស្រុកកំណើតវិញ ។
ក្រោយពេលកើតហេតុនាងបានមកប៉ុស្តិ៍នគរបាលចោមចៅ៣ ដោយលោកថេង កុសល ជាមេប៉ុស្តិ៍ចោមចៅ៣ មានទឹកចិត្តអាណិតអាសូរ បានជួយសោហ៊ុយចំនួន១០ម៉ឺនរៀល និងឱ្យថ្លៃម៉ូតូឌុបជូនទៅដាក់នៅចំណតរថយន្ត ដើម្បីធ្វើដំណើរទៅស្រុកកំណើតវិញ ៕
ចែករំលែកព័តមាននេះ