ខេត្តព្រះសីហនុ ៖ តាមសេចក្តីរាយការណ៍បឋមបានឱ្យដឹងថា គ្រោះថ្នាក់ចរាចរណ៍រវាងរថយន្តមានដឹកត្រីសមុទ្រមួយគ្រឿងបុកជាមួយម៉ូតូមួយគ្រឿង ហើយបន្តទៅបុកជាមួយគ្រឿងទៀតមានដឹកកម្មករសំណង់ បណ្តាលឱ្យមនុស្សម្នាក់ស្លាប់ និងរបួសធ្ងន់ស្រាលចំនួន៧នាក់ ស្ថិតនៅផ្លូវជាតិលេខ៤ ឃុំបិតត្រាង កាលពីល្ងាចថ្ងៃទី១៥ ខែកញ្ញា២០១៨ ។
ជនរងគ្រោះទាំង៨នាក់ខាងលើរួមមាន អ្នកបើកបរម៉ូតូមិនទាន់ស្គាល់អត្តសញ្ញាណ ភេទប្រុស បានស្លាប់នៅនឹងកន្លែងកើតហេតុ ចំណែកអ្នកបើកបររថយន្តដឹកត្រីឈ្មោះ តួន ស៊ីសាវ៉ែន ភេទប្រុស បានរងរបួសធ្ងន់ ។
អ្នករួមដំណើរដែលជិះលើរថយន្តដឹកត្រីសមុទ្រចំនួន៥នាក់រួមមាន ៖ ១-ឈ្មោះ ឆេង ស្រីអែម ភេទស្រី អាយុ៣២ឆ្នាំ មុខរបរកម្មករសំណង់ រងរបួសធ្ងន់ ២-ឈ្មោះ ចាម សុជាតិ ភេទប្រុស អាយុ២២ឆ្នាំ មុខរបរកម្មករសំណង់ រងរបួស មធ្យម ៣-ឈ្មោះ មឿន មាក់ ភេទប្រុស អាយុ១៦ឆ្នាំ មុខរបរកម្មករសំណង់ រងរបួសធ្ងន់ ៤-ឈ្មោះ ឈឹម នឿន ភេទ ស្រី អាយុ៦៥ឆ្នាំ មុខរបរកម្មករសំណង់ បានរងរបួសធ្ងន់ ៥-ឈ្មោះ ស៊ុម មានិត ភេទប្រុស អាយុ២៩ឆ្នាំ មុខរបរកម្មករសំណង់ រងរបួសមធ្យម និង៦-ជាអ្នករួមដំណើរជិះលើរថយន្តដឹកកម្មករសំណង់ឈ្មោះ ផាត់ ញ៉ូ ភេទប្រុស អាយុ១១ឆ្នាំ ជាសិស្ស បានរងរបួសស្រាល ។
របាយការណ៍នគរបាលបញ្ជាក់ថា គ្រោះថ្នាក់ចរាចរណ៍នេះបង្កដោយរថយន្តដឹកត្រីសមុទ្រ១គ្រឿងម៉ាក ហ៊ីយ៉ាន់ដាយ ពណ៌ស ពាក់ផ្លាកលេខ ព្រះសីហនុ ៣A-៣៩៨២ បើកបរដោយឈ្មោះ តួន ស៊ីសាវ៉ែន ភេទ ប្រុស អាយុ ៣៧ឆ្នាំ ទីលំនៅក្នុងខេត្តកំពត បើកបរក្នុងទិសដៅចេញពីខេត្តព្រះសីហនុ បានបុកពីខាងក្រោយម៉ូតូមួយគ្រឿងម៉ាកស្គូពី ពណ៌ស គ្មានស្លាកលេខ ដែលអ្នកបើកបរដោយបុរសម្នាក់ (មិនទាន់ស្គាល់អត្តសញ្ញាណ ) ធ្វើដំណើរក្នុងទិសដៅស្របគ្នា ។
ប្រភពដដែលបានបន្តថា បន្ទាប់មករថយន្តខាងលើបានបន្តទៅមុខបុករថយន្តកូរ៉េមានដឹកកម្មករសំណង់១គ្រឿងទៀតម៉ាក ហ៊ីយ៉ាន់ដាយ ពណ៌ស ពាក់ផ្លាកលេខ កំពត ២A-១១៣០ បើកបរដោយឈ្មោះ ផុត ផេន ភេទ ប្រុស អាយុ ២៦ឆ្នាំ មានទីលំនៅភូមិ១ សង្កាត់លេខ៣ ក្រុងព្រះសីហនុ ក្នុងទិសដៅស្របគ្នា បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ ចំណែកអ្នកបើកបររថយន្តដឹកត្រីសមុទ្រនិងអ្នករួមដំណើរដឹកត្រីសមុទ្រ និងអ្នករួមដំណើរលើរថយន្តដឹកកម្មកររងរបួសធ្ងន់ស្រាលចំនួន៧នាក់ ត្រូវបានគេដឹកយកទៅសង្គ្រោះនៅមន្ទីរពេទ្យ ។
រីឯវត្ថុតាង រថយន្តចំនួន២គ្រឿង និងម៉ូតូ១គ្រឿងបានរងការខូចខាតធ្ងន់ធ្ងរ បានយកមករក្សាទុកនៅការិយាល័យនគរបាលចរាចរណ៍ផ្លូវគោកដើម្បីដោះស្រាយជាបន្តទៀត ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ