ADផ្ទាំងផ្សព្វផ្សាយពាណិជ្ជកម្ម

ទីបំផុតនគរបាលឃាត់ខ្លួនជនដៃដល់៣នាក់ ក្នុងការចាប់យុវតីម្នាក់កោរសក់

5 ឆ្នាំ មុន

ភ្នំពេញ
១៤ ខែ កញ្ញា ឆ្នាំ ២០១៨ ម៉ោង ២៣:៣៧

រាជធានីភ្នំពេញ ៖ ទីបំផុតកម្លាំងនគរបាលផ្នែកព្រហ្មទណ្ឌខណ្ឌពោធិ៍សែនជ័យ បានសហការណ៍ជាមួយ កម្លាំង នគរបាលប៉ុស្តិ៍ចោមចៅ៣ បានបើកប្រតិបត្តិការស្រាវជ្រាវទៅលើសកម្មភាពអ្នកផ្សារព្រៃទាដែលបានចាប់ យុវតីម្នាក់ កោរសក់ក្បាល និងវាយដំច្រំធាក់ដោយបានចោទប្រកាន់ថា ជាចោរចូលទៅក្នុងផ្ទះមួយប៉ុនប៉ងលួចទូរស័ព្ទ និងលុយកាក់ពួកគាត់។ នៅវេលាម៉ោង១២ថ្ងៃត្រង់ ថ្ងៃទី១៤ ខែកញ្ញា ឆ្នាំ២០១៨ នគរបាលប៉ុស្តិ៍ខាងលើ បានហៅបុរស៣នាក់ និងស្ត្រីម្នាក់ដែលវាយដំ និងចាប់យុវតីសង្ស័យកោរសក់ក្បាលទៅធ្វើការសាកសួរ នៅប៉ុស្តិ៍ដើម្បីបំភ្លឺជុំវិញរឿងរ៉ាវនោះ។

ស្រាប់តែអ្នកផ្សារជាង៣០នាក់ទៀតបានលើកគ្នាទៅកាន់ប៉ុស្តិ៍នគរបាលដែរ ដើម្បីគាំទ្រដល់មនុស្ស៣នាក់ដែលត្រូវបានកម្លាំងនគរបាលហៅទៅធ្វើការសួរនាំនោះ។ រហូតដល់វេលាល្ងាច ថ្ងៃដដែល លោកព្រះរាជអាជ្ញាអមសាលាដំបូងរាជធានីភ្នំពេញ សម្រេចឲ្យនគរបាលឃាត់ខ្លួនបុរស២នាក់ និងស្ត្រីម្នាក់ដែលអ្នកទាំង៣ត្រូវជាប្ដីប្រពន្ធ ឪពុកម្ដាយ និងកូនដែលត្រូវបានសមត្ថកិច្ចចាត់ទុកថា ជាជនដៃដល់ ចំណែកម្នាក់ទៀតបានរួចខ្លួន និងបានវិលត្រឡប់ទៅផ្ទះវិញ។

នគរបាលបានឲ្យដឹងថា អ្នកដែលត្រូវបានឃាត់ខ្លួន ទាំង៣នាក់នោះរួមមាន ១,ឈ្មោះ សុង ហេង ជាអ្នកដៃដល់ក្នុងការវាយ និងកោរសក់យុវតីម្នាក់ដែលជាជន សង្ស័យ។ ២,ឈ្មោះ ណាំង ណារិទ្ធ ត្រូវជាឪពុក ៣,ឈ្មោះ ហុក គឹមហ៊ន ត្រូវជាម្ដាយ និងអះអាងថា ជាម្ចាស់ទូរស័ព្ទដែលយុវតីម្នាក់លួចតែយកបានមកវិញ។ ចំណែកទី៤, ឈ្មោះ ឈួរ គឹមឡេង គ្រាន់ជាសាក្សី បំភ្លឺត្រូវបាននគរបាលអនុញ្ញាតឲ្យវិលត្រឡប់ទៅផ្ទះវិញហើយ។ នគរបាលដដែលបានឲ្យដឹងបន្តទៀតថា នៅពេលចាប់ខ្លួនយុវតីនោះបាន អ្នកទាំង៣នាក់ឪពុក ម្ដាយ និងកូននោះមិនបានរាយការណ៍ប្រាប់ឲ្យដឹង នោះឡើយ បែរជានាំគ្នាធ្វើទារុណកម្មនាងដោយការវាយដំ និងចាប់កោរសក់ក្បាលជាការបំពានលើសិទ្ធិបុគ្គល។

បន្ទាប់ពីបានទទួលដំណឹងនោះភ្លាម កម្លាំងក៏បានចុះទៅកាន់កន្លែងកើតហេតុនោះភ្លាមៗដែរ ប៉ុន្តែពេលទៅដល់យុវតីដែលជាជនសង្ស័យត្រូវបានអ្នកទាំង៣នាក់នោះដោះលែងផុតបាត់ទៅហើយ។ លុះពេលកម្លាំងសួរនាំត្រូវអ្នកជិតខាងប្រាប់ថា នាងសង្ស័យម្នាក់នោះមិនទាន់លួចបានអ្វីនៅឡើយ ដោយគ្រាន់តែដើរចូលទៅក្នុងផ្ទះមួយកន្លែង និងសង្ស័យថា ប៉ុនប៉ងលួចទូរស័ព្ទប៉ុណ្ណោះ ហើយបន្ទាប់ពីសួរដឹងរឿង ទើបកម្លាំងត្រឡប់មកប៉ុស្តិ៍វិញ។

លុះក្រោយមកស្រាប់តែបានលេចធ្លាយរូបភាពវីដេអូរតាមបណ្ដាញសង្គម ហ្វេសប៊ុក ពីសកម្មភាពអ្នកទាំង៣នាក់ចាប់នាងកោរសក់ក្បាល និងវាយដំច្រំធាក់បង្កការរិះគន់យ៉ាងខ្លាំង ទើបថ្នាក់លើបានបញ្ជាឲ្យបើកការស្រាវជ្រាវ ហើយនគរបាលប៉ុស្តិ៍ក៏បានហៅមនុស្ស៤នាក់មកសួរនាំ បន្ទាប់មក៣នាក់ត្រូវឃាត់ខ្លួន និងម្នាក់មានសំណាងបានរួចខ្លួនវិលត្រឡប់ទៅផ្ទះវិញ៕