រាជធានីភ្នំពេញ ៖ រថយន្តកុងតឺន័រមួយគ្រឿងពេលបើកបរបានរបូតគន្លឹះបណ្តាលឱ្យធ្លាក់ទូកុងតឺន័រតាមផ្លូវ បង្កអោយមានការភ្ញាក់ផ្អើលកាលពីវេលាម៉ោង ៩នឹង៣០នាទីយប់ថ្ងៃទី១៣ ខែកញ្ញា ឆ្នាំ២០១៨ នៅតាមបណ្ដោយផ្លូវបេតុងភូមិ ចំការឪឡឹក សង្កាត់កាកាប២…
រាជធានីភ្នំពេញ ៖ រថយន្តកុងតឺន័រមួយគ្រឿងពេលបើកបរបានរបូតគន្លឹះបណ្តាលឱ្យធ្លាក់ទូកុងតឺន័រតាមផ្លូវ បង្កអោយមានការភ្ញាក់ផ្អើលកាលពីវេលាម៉ោង ៩នឹង៣០នាទីយប់ថ្ងៃទី១៣ ខែកញ្ញា ឆ្នាំ២០១៨ នៅតាមបណ្ដោយផ្លូវបេតុងភូមិ ចំការឪឡឹក សង្កាត់កាកាប២ ខណ្ឌពោធិ៍សែនជ័យ ។
រថយន្តកុងតឺន័រខាងលើម៉ាកហ៊ីយ៉ាន់ដាយ ពណ៌សឆ្នូតក្រហម ពាក់ស្លាកលេខ ភ្នំពេញ ៣A-៩៥៣៩បើកបរដោយយុវជនម្នាក់ចេញពីរោងចក្រកាត់ដេរសំលៀកបំពាក់ ខាយ ខាយវើលដ៍ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្តកុងតឺន័រមួយគ្រឿងខាងលើបើកបរចេញពីរោងចក្រកាត់ដេរសំលៀកបំពាក់ ខាយ ខាយវើលដ៍ បានជាង១០ម៉ែត្រ ស្រាប់តែរថយន្តកុងតឺន័រខាងលើបានធ្លាក់ទូកុងតឺន័រលើផ្លូវបេតុង តែមិនបង្កឲ្យគ្រោះថ្នាក់ដល់អ្នកធ្វើដំណើរនោះឡើយ ព្រោះនៅវេលាម៉ោងខាងលើស្ងាត់មិនមាន អ្នកធ្វើដំណើរឆ្លងកាត់ បន្ទាប់មកកម្លាំងនគរបាលប៉ុស្តិ៍កាកាប២បានមកដល់កន្លែងកើតហេតុនិងធ្វើការពិនិត្យមើលរថយន្តកុងតឺន័រខាងលើផងដែរ ដើម្បីចង់ដឹងមូលហេតុថា ទូកុងតឺន័ខាងលើធ្លាក់ដោយសារអ្វី ។
ប្រជាពលរដ្ឋបាននិយាយថា សំណាងល្អធ្លាក់ទូកុងតឺន័រនៅពេលយប់ បើធ្លាក់នៅពេលថ្ងៃវិញមិនដឹងជាមានគ្រោះថ្នាក់ដល់មនុស្សប៉ុន្មាននាក់នោះឡើយ ព្រោះផ្លូវខាងលើមានប្រជាពលរដ្ឋធ្វើដំណើរច្រើនណាស់ហើយពួកគាត់សូមសំណូមពរដល់អ្នកបើកបររថយន្តផ្សេងៗ មុននឹងបើកបរត្រូវពិនិត្យមើលឱ្យបានត្រឹមត្រូវ មុនពេលបើកបរ កុំអោយមានគ្រោះថ្នាក់ដល់អ្នកដទៃ។
ក្រោយពេលកើតហេតុ ប្រមាណជាងមួយម៉ោង ទើបអ្នកបើកបររថយន្តកុងតឺន័រខាងលើបានហៅរថយន្តស្ទូចរបស់ក្រុមហ៊ុនរបស់ខ្លួនមកស្ទូចទូកុងតឺន័រចេញពីកន្លែងកើតហេតុផងដែរ ៕
ចែករំលែកព័តមាននេះ