ខេត្តស្ទឹងត្រែង ៖ ចម្ងាយប្រមាណជាង៥០គីឡូម៉ែត្រ ពីទីរួមខេត្តស្ទឹងត្រែងឆ្ពោះទៅទិសនិរតីជាព្រំប្រទល់នៃប្រទេសកម្ពុជាជាប់នឹងប្រទេសឡាវ ។ គេអាចធ្វើដំណើរតាមផ្លូវទឹកភូមិអូរស្វាយ ក្នុងស្រុកថាឡាបរិវ៉ាត់ និងផ្លូវជាតិលេខ៧ ឆ្លងកាត់ស្ពានសេកុងសង្កាត់សាមគ្គីក្រុងស្ទឹងត្រែង ដើម្បីទៅទីនោះ ។
ភូមិអូរស្វាយមានព្រំប្រទល់ជាប់នឹងភូមិឧបសម្ព័ន្ធឃុំអូរស្វាយ ស្រុកថាឡាបរិវ៉ាតិ ទល់នឹងសង្កាត់សាមគ្គី ក្រុងស្ទឹងត្រែង និងទល់ភូមិវើុនខាមព្រំប្រទល់ ប្រទេសឡាវ ។ ការធ្វើដំណើរគេត្រូវចំណាយពេលចន្លោះពីប្រមាណជា៤៥គីឡូទៅ៥០គីឡូម៉ែត្រ ពីទីរួមខេត្តស្ទឹងត្រែងទៅដល់ឃុំអូរស្វាយ ។
ឃុំអូរស្វាយជាតំបន់យុទ្ធសាស្ត្រមួយដែលសម្តេចព្រះបាទនរោត្តម សីហនុ បានលើកទឹកចិត្តប្រជាពលរដ្ឋទៅរស់នៅការពារបូរណភាពទឹកដីជាប់ព្រំដែលប្រទេសឡាវចាប់តាំងពីសម័យឆ្នាំ១៩៦២មកម្លេ៉ះ ហើយបានសាងសង់ស្កូបអនុស្សាវរីយ៍មួយដែលមានព្រះឆាយាលក្ខណ៍ព្រះអង្គនៅក្នុងភូមិនោះ ។
ការប្រឹក្សាយោបល់មួយបានធ្វើឡើង កាលពីដើមខែកញ្ញា ២០១៨បានវែកញែកលើកឡើងពីផលវិជ្ជមានមួយចំនួនដែលនឹងដាក់បញ្ចូលការស្នើរទៅរដ្ឋាភិបាលបង្កើតជាស្រុកមួយទៀត(ដែលមានឈ្មោះថាស្រុកបុរីអូរស្វាយ)បន្ថែមលើស្រុកក្រុងចំនួន៥ដែលមានរួចជាស្រេច ។
លោកសាយ កុសល អភិបាលក្រុងស្ទឹងត្រែងបានប្រាប់កោះសន្តិភាពកាលពីពេល ថ្មីៗកន្លងមកថា អាជ្ញាធរខេត្ត ក្រុង សង្កាត់កំពុងឱ្យភូមិបាលស្រុកសិក្សាលើព្រំប្រទល់ដែលមានស្រាប់ថានឹងត្រូវចុចយកចំណុចគោលដៅណាទៅគោលដៅណាដើម្បីខាន់ចែកជាព្រំប្រទល់ ។ ការសិក្សារៀបចំគម្រោងបង្កើតស្រុកទី៦ថ្មីនោះ គឺជាភូមិសាស្ត្រដែលនៅជាប់នឹងព្រំប្រទល់នៃទឹកដីប្រទេសឡាវ ។
លោកដួង ពៅ អភិបាលរងខេត្តបានលើកឡើងថាស្រុកបង្កើតថ្មីនេះត្រូវកាត់យកភូមិឃុំមួយចំនួន ក្នុងស្រុកសៀមប៉ាង ស្រុកសេសាន ស្រុកថាឡាបរិវ៉ាត់ សង្កាត់សាមគ្គី ក្រុងស្ទឹងត្រែងដែលមានប្រជាពលរដ្ឋរស់នៅជិត៥ពាន់គ្រូសារ ។
លោកអភិបាលរងថ្លែងថា« គោលបំណងនេះដោយសារមើលឃើញចំនួនប្រជាពលរដ្ឋមានការកើនឡើងច្រើន ហើយភូមិ ឃុំទាំងនោះនៅឆ្ងាយពីទីរួមស្រុក ទើបខេត្តរៀបចំផែនទីពង្រាង ដើម្បីស្នើសុំទៅក្រសួងមហាផ្ទៃ និង ប្រមុខរាជរដ្ឋាភិបាល បង្កើតតំបន់រដ្ឋបាលថ្មី ដើម្បីជាប្រយោជន៍ងាយស្រួលដល់ការផ្តល់សេវាសាធារណៈជូនប្រជាពលរដ្ឋឱ្យបានប្រសើរឡើងជាងមុន »។
លោកជា ម៉ាលី ចៅសង្កាត់សាមគ្គីក្រុងស្ទឹងត្រែងបានគាំទ្រដល់ការបង្កើតតំបន់រដ្ឋបាលថ្មីព្រោះសង្កាត់សាមគ្គី ក៏មានភូមិមួយចំនួននៅចម្ងាយឆ្ងាយពីសាលាសង្កាត់រហូតដល់ជាង៥០គីឡូម៉ែត្រ ហើយមានភាពលំបាកក្នុងការទៅមក ការទាក់ទងការងារ ផ្សេងៗជាមួយប្រជាពលរដ្ឋ ។
លោកសេក ម៉ៅ មេឃុំអូរស្វាយបញ្ជាក់ថា «ប្រជាពលរដ្ឋនៅឃុំនេះក៏មានបំណងដូចគ្នាដែរព្រោះបច្ចុប្បន្នឃុំមិនទាន់មានសេវាសម្រាប់បំពេញតម្រូវការជូនប្រជាពលរដ្ឋបានគ្រប់គ្រាន់នៅឡើយទេ ដូចជាសេវាសុខាភិបាល ផ្នែកទឹកស្អាត និងទីផ្សារលក់ដូរកសិផលជាដើម ។
នៅពេលមានទីរួមស្រុកជិតព្រំដែន ខេត្តស្ទឹងត្រែងកាន់តែមានកម្លាំងគ្រប់គ្រាន់ក្នុងការលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្តិសុខសាធារណៈ និងការជំរុញឱ្យមានការអភិវឌ្ឍមូលដ្ឋានបានកាន់តែលឿនឆាប់រហ័ស» ៕
ចែករំលែកព័តមាននេះ