រាជធានីភ្នំពេញ ៖ បុណ្យទន្លេលើកទី៥ ឆ្នាំក្រោយនេះ នឹងត្រូវប្រារព្ធធ្វើនៅអំឡុងខែមីនា ក្នុងខេត្តកំពង់ឆ្នាំងដែលជាខេត្តវ័យចំណាស់មួយរបស់ព្រះរាជាណាចក្រកម្ពុជា ។ ដោយឆ្លងកាត់បទពិសោធន៍នៃការរៀបចំបុណ្យទន្លេទទួលបានជោគជ័យអស់៤លើករួចមកហើយនោះ ពេលនេះក្រសួងទេសចរណ៍កំពុងត្រៀមរៀបចំបុណ្យទន្លេលើកទី៥នេះឲ្យកាន់តែអធិអធមថែមទៀត ពិសេសដើម្បីបង្ហាញពីសក្តានុពលទេសចរណ៍ នៅខេត្តកំពង់ឆ្នាំង និងតាមដងទន្លេនៃប្រទេសកម្ពុជា ។
ប្រធាននាយកដ្ឋានអភិវឌ្ឍន៍ទេសចរណ៍នៃក្រសួងទេសចរណ៍ លោក ជុក ជំនោរ បានប្រាប់អ្នកសាព័ត៌មាន នាព្រឹកថ្ងៃទី១១ ខែកញ្ញា ថា មន្ត្រីជំនាញក្រសួងទេសចរណ៍បានចុះទៅសិក្សា និងបើកកិច្ចប្រជុំជាមួយមន្ត្រីសាលាខេត្តកំពង់ឆ្នាំងជាបន្តបន្ទាប់ ដើម្បីរៀបចំកម្មវិធីមួយចំនួនក្នុងការរៀបចំបុណ្យទន្លេនេះឲ្យកាន់តែមានភាពទាក់ទាញថែមទៀត ហើយឆាប់ៗខាងមុខនេះ លោករដ្ឋមន្ត្រីថោង ខុន នឹងដឹកនាំក្រុមការងារក្រសួងចុះទៅបើកិច្ចប្រជុំសម្រេចផែនការចុងក្រោយនៃការរៀបចំដំណើរការបុណ្យទន្លេនៅខេត្តកំពង់ឆ្នាំងនេះ ។
លោក ជុក ជំនោរ បានបញ្ជាក់ថា ៖« ក្រសួងទេសចរណ៍ទទួលបានបទពិសោធន៍ជោគជ័យពីការរៀបចំបុណ្យទន្លេលើកទី៤នៅខេត្តកណ្តាលកន្លងមក ដូចជាការពង្រឹងសន្តិសុខល្អ, ការរៀបចំព្រឹត្តិការណ៍កីឡាលើទឹក, ការតាំងពិព័រណ៍ផលិតផលខ្មែរ និងការថែរក្សាបរិស្ថានជាដើម ។ ដូច្នេះយើងសង្ឃឹមថា បុណ្យទន្លេលើទី៥នេះ នឹងទទួលបានជោគជ័យត្រចះត្រង់ថែមទៀត »។
លោកបញ្ជាក់បន្ថែមថា ៖« បុណ្យទន្លេមិនត្រឹមតែជួយទាក់ទាញទេសចរប៉ុណ្ណោះទេ តែក៏បានជួយផ្សព្វផ្សាយផលិតផល កសិផល និងវប្បធម៌ខ្មែរផងដែរ »។
លោក សេង សាលី ប្រធានមន្ទីរទេសចរណ៍ ខេត្តកំពង់ឆ្នាំង មានប្រសាសន៍ថា ក្រុមការងារជំនាញបានរៀបចំកែលម្អហេដ្ឋារចនាសម្ព័ន្ធនានានៅក្នុងខេត្តដូចជា ផ្លូវថ្នល់ ច្រាំងទន្លេ សួនច្បារ សម្រេចបាន៦០%ហើយ ដែលគ្រោងនឹងបញ្ចប់នៅដំណាច់ឆ្នាំ២០១៨នេះ ដើម្បីត្រៀមស្វាគមន៍ការមកដល់នៃភ្ញៀវទេសចរ ។
លោកបញ្ជាក់ថា ៖« អាជ្ញាធរខេត្តកំពង់ឆ្នាំងមិនត្រឹមតែរៀបចំសោភ័ណភាពទីក្រុងឲ្យកាន់តែស្រស់ស្អាតប៉ុណ្ណោះទេ ប៉ុន្តែថែមទាំងសម្រិតសម្រាំងកម្មវិធីកម្សាន្តសប្បាយជាច្រើន ដូចជាការរៀបតាំងផលិតផលធ្វើអំពីបំពង់ឫស្សី ស្លឹកត្នោត ការប្រគំតន្ត្រី ការសម្តែងទស្សនីយភាព សិល្បៈបុរាណសម័យដើម្បីទាក់ទាញភ្ញៀវទេសចរជាតិ និងអន្តរជាតិមកលេងកម្មវិធីបុណ្យនេះឲ្យបាន១លាននាក់ »។
កំពង់ឆ្នាំង ជាខេត្តដែលគេស្គាល់ច្បាស់តាមរយៈការធ្វើឆ្នាំងដីដ៏ល្បីល្បាញជាយូរមកហើយ និងប្រវត្តិនៃភ្នំនាងកង្រី ។ ប្រជាជនក្នុងខេត្តនេះចូលចិត្តធ្វើឆ្នាំង ថូ និងប្រភេទរបស់របរធ្វើពីសេរ៉ាមិកផ្សេងទៀត បន្ទាប់ពីច្រូតកាត់រួច ។
ខេត្តមានកន្លែងទស្សនាគួរឲ្យចាប់អារម្មណ៍ជាច្រើន ដូចជា ភូមិបណ្ដែតទឹកចំនួនពីរ និងភូមិតូចៗដែលល្បីល្បាញខាងធ្វើឆ្នាំងជាដើម ។
ក្រៅពីសិប្បកម្មផលិតឆ្នាំង ខេត្តនេះនៅមានសក្ដានុពលទេសចរណ៍ជាច្រើនទៀត ដូចជាការជិះទូកទៅទស្សនាភូមិបណ្ដែតទឹក, រមណីយដ្ឋានទេសចរណ៍ប្រវត្តិសាស្ត្រ និងតំបន់ទេសចរណ៍ធម្មជាតិជាច្រើនទៀត ។
យោងតាមរបាយការណ៍ពីមន្ទីរទេសចរណ៍ខេត្ត ក្នុងរយៈពេល៦ខែដើមឆ្នាំនេះ កំណើនភ្ញៀវទេសចរចូលមកទស្សនាក្នុងទឹកដីខេត្តកំពង់ឆ្នាំង ទាំងជាតិនិងអន្តរជាតិ មានការថយចុះ ក្នុងនោះភ្ញៀវជាតិថយចុះប្រមាណ៥០% និងអន្តរជាតិថយចុះប្រមាណ១០% ។
ការថយចុះនេះ ដោយសារតែពេលនេះជារដូវវស្សា មានភ្លៀង និងខ្យល់ធ្លាក់ខ្លាំង។
ម្យ៉ាងទៀត ភ្ញៀវបរទេសមួយចំនួន ដល់ពេលវិលត្រឡប់ទៅកាន់ប្រទេសរបស់ខ្លួនវិញ។
ទោះយ៉ាងនេះក្ដី ភ្ញៀវនឹងត្រឡប់មកវិញ ចាប់ពីដើមខែសីហា រហូតដល់ខែមេសា ឆ្នាំ២០១៩ ។ នេះបើតាមការបញ្ជាក់ពីលោក សេង សាលី ប្រធានមន្ទីរទេសចរណ៍ខេត្ត ។
សូមបញ្ជាក់ថា ព្រះរាជាណាចក្រកម្ពុជា បានរៀបចំបុណ្យទន្លេ៤លើករួចមកហើយ ដោយលើកទី៤បានរៀបចំនៅក្រុងតាខ្មៅ ខេត្តកណ្តាល ដែលទទួលបានអ្នកចូលទស្សនាជាង១លាននាក់ ៕
ចែករំលែកព័តមាននេះ