រាជធានីភ្នំពេញ ៖ ក្នុងរយៈពេលជាង៣ម៉ោង ក្លិបរាត្រីមួយកន្លែងបានក្លាយជាផេះផង់ទាំងព្រលឹមអុរ និងបានបង្កឱ្យមានការភ្ញាក់ផ្អើលយ៉ាងខ្លាំង ដល់កម្លាំងមានសមត្ថកិច្ចមូលដ្ឋានរាប់សិបនាក់ ដឹកនាំដោយលោក សុខ ពេញវុធ អភិបាលខណ្ឌដូនពេញ លោក នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យក្រសួង មហាផ្ទៃ លោកព្រហ្ម យ៉ន នាយការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញជាច្រើននាក់ រួមទាំងមានរថយន្តពន្លត់អគ្គិភ័យ រហូតទៅដល់ចំនួន៤២គ្រឿង និងអេស្កាវ៉ាទ័រ១គ្រឿង ចុះមកបុកទម្លុះជញ្ជាំង និងបាញ់ទឹកពន្លត់ ទើបអាចបង្ក្រាបអណ្តាតភ្លើងឱ្យរលត់បាន ។
ករណីអគ្គិភ័យនេះ បានកើតឡើងនៅវេលាម៉ោង៦ និង១៥នាទីព្រឹកថ្ងៃទី១១ កញ្ញា នៅក្លិបឌីស្កូតែកយីហោ២អិនឌី (2ND) ដែលមានទីតាំងលេខ១៧៥ ផ្លូវលេខ៥១ (ផ្លូវប៉ាស្ទ័រ) កែងនិងផ្លូវលេខ២៥៤ ក្នុងសង្កាត់ចតុមុខ ខណ្ឌដូនពេញ ។
លោក ឈឹម វ៉ាន់ដេត អាយុ៣២ឆ្នាំ ដែលជាអ្នកមើលការខុសត្រូវក្លិបរាត្រីនេះ បានរៀបរាប់ឱ្យដឹងថា មុនពេលកើតហេតុ លោកបានស្ថិតនៅក្នុងក្លិប រហូតដល់ម៉ោង៣រំលងអធ្រាត្រ ឈានចូលថ្ងៃទី១១ កញ្ញា បុគ្គលិកដែលបម្រើការងារក្នុងក្លិប បាននាំគ្នាចេញទៅផ្ទះរៀងខ្លួនអស់ ។ លុះដល់ម៉ោង៣ និង៣០នាទី ទើបលោកចេញតាមក្រោយ និងបានចាក់សោរទ្វារជុំវិញយ៉ាងត្រឹមត្រូវ ដោយមានបុគ្គលិកប្រុសម្នាក់ឈ្មោះ រ៉ា ណូ ឱ្យយាមនៅខាងក្រៅជាមួយសន្តិសុខម្នាក់ទៀត ។
តាមប្រភពដដែលបានបន្តទៀតថា លុះដល់ម៉ោង៦ និង៤០នាទីព្រឹក ស្រាប់តែរូបលោកបានទទួលទូរស័ព្ទពីបុគ្គលិកឈ្មោះ រ៉ា ណូ បានទូរស័ព្ទមកប្រាប់ថា «មានការទុស្សេចរន្តនៅក្នុងបន្ទប់ភ្លើង» ។ ភ្លាមៗនោះ រូបលោក ក៏បានវិលត្រឡប់មកវិញ ក៏បានឃើញមានភ្លើងកំពុងតែឆេះ នៅខាងក្នុងក្លិបពេញបន្ទុកទៅហើយ និងគ្មានបុគ្គលិកណាម្នាក់នៅខាងក្នុងទេ ។
តាមប្រភពព័ត៌មានពីនគរបាលមូលដ្ឋានបានប្រាប់ឱ្យដឹងថា មុនពេលកើតហេតុ គេបានឃើញមានផ្សែងខ្មៅ ហុយឃ្មួលខ្មាញ់ចេញពីកន្លែងចុងភៅចម្អិនម្ហូបអាហារ ដែលនៅខាងក្រោយ បានហុយចេញមកខាងក្រៅ ក៏បង្កឱ្យមានការភ្ញាក់ផ្អើល កើតឡើងទៅដល់បងប្អូនប្រជាពលរដ្ឋដែលនៅក្បែរខាង និងអ្នកដំណើរតាមផ្លូវដែលឆ្លងកាត់ទីនោះមានការភ្ញាក់ផ្អើល ខណៈភ្លើងកំពុងតែឆេះនៅខាងក្នុងក្លិបសន្ធោសន្ធៅទើបភ្ញាក់ផ្អើល ដល់កម្លាំងមានសមត្ថកិច្ចមូលដ្ឋានច្រើននាក់ចុះមកដល់ទីតាំងកើតហេតុ ។
រថយន្តពន្លត់អគ្គិភ័យជាច្រើនគ្រឿងរបស់ ស្នងការដ្ឋាននគរបាលរាជធានីភ្នំពេញ ត្រូវបានហៅមកធ្វើអន្តរាគមន៍បាញ់ទឹកពន្លត់ ។ តាមប្រភពបានប្រាប់បន្តទៀតថា ដោយសារតែអណ្តាតភ្លើងឆេះ កាន់តែខ្លាំងឡើងៗ នៅខាងក្នុងក្លិប ធ្វើឱ្យរថយន្តពន្លត់អគ្គិភ័យ មានការលំបាកដោយសារការបាញ់ទឹកពន្លត់ចូលមិនដល់ខាងក្នុងគឺបានតែខាងក្រៅ ។
ម្យ៉ាងទៀត ក្លិបត្រូវបានគេចាក់សោជាប់ពីខាងក្នុង មិនអាចបាញ់ទឹកចូលទៅខាងក្នុងបាន ទើបសមត្ថកិច្ចបានសម្រេច ប្រើញញួរវាយបំបែកកញ្ចក់ទ្វារ បង្អួច និងយកគ្រឿងចក្រអេស្កាវ៉ាទ័រមួយគ្រឿងមកវាយទម្លុះជញ្ជាំងបាញ់ទឹកចូលទៅខាងក្នុងក្លិប ដើម្បីពន្លត់ភ្លើង តែមិនអាចពន្លត់បានភ្លាមៗនោះឡើយ ។ រហូតទៅដល់រយៈពេលជាង៣ម៉ោង (ម៉ោង៩និង៣៥នាទី) ព្រឹកថ្ងៃដដែល ទើបអាចគ្រប់គ្រងស្ថានការណ៍បាននិងធ្វើឱ្យភ្លើងរលត់ មិនអាចឆេះរាលដាលទៅដល់ផ្ទះអ្នកក្បែរខាង ។ ប៉ុន្តែសម្រាប់ក្លិបរាត្រីនេះ ក៏បានក្លាយជាផេះផង់ផងដែរ ដោយការឆេះគ្រឿងក្នុងក្នុងអស់គ្មានសល់ និងអគារក្លិបរងការខូចខាតអស់ទាំងស្រុងតែម្តង តែមិនបង្កឱ្យមនុស្សណាម្នាក់រងគ្រោះថ្នាក់ឡើយ ។
ពាក់ព័ន្ធទៅនឹងករណីអគ្គិភ័យឆេះក្លិបរាត្រីខាងលើនេះដែរ កម្លាំងមានសមត្ថកិច្ចមិនទាន់បានដឹងច្បាស់ថា កើតឡើងដោយសារតែការឆ្លងចរន្តអគ្គិសនី ឬក៏យ៉ាងណាឡើយ ដោយរង់ចាំបង្កើតគណៈកម្មការចុះទៅធ្វើការ ត្រួតពិនិត្យ និងស្រាវជ្រាវជាក្រោយ ។ ក្នុងការពន្លត់ព្រះអគ្គីនេះ កម្លាំងមានសមត្ថកិច្ចបានប្រើប្រាស់រថយន្តពន្លត់អគ្គិភ័យដែលមកពីបណ្តារអង្គភាពផ្សេងៗជាច្រើនគ្រឿងមានដូចជា រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន២៣គ្រឿង របស់ក្រសួងមហាផ្ទៃចំនួន៧គ្រឿង កងរាជអាវុធហត្ថចំនួន៥គ្រឿង មកពីជ្រោយចង្វាចំនួន៥គ្រឿង និងទីក្រុងកោះពេជ្រចំនួន២គ្រឿង ។ សរុបរហូតទៅដល់ចំនួន៤២គ្រឿង និងប្រើប្រាស់ទឹកអស់ចំនួន១២០រថយន្ត ទើបបង្ក្រាបភ្លើងឱ្យរលត់ទាំងស្រុង ៕
ចែករំលែកព័តមាននេះ