ទីក្រុងសេអ៊ូល ៖ កាលពីថ្ងៃចន្ទកន្លងមក នេះ រដ្ឋមន្ត្រីកសិកម្មរបស់ប្រទេសកូរ៉េខាងត្បូងបានបង្ហាញក្តីសង្ឃឹមទៅលើការសហការលើ គម្រោងជាច្រើនជាមួយនឹងកូរ៉េខាងជើងពេលដែលកិច្ចប្រជុំអន្តរកូរ៉េបើកផ្លូវសម្រាប់កិច្ចសហប្រតិបត្តិការសេដ្ឋកិច្ចឆ្លងព្រំដែន ។ លោក Lee Gae-ho…
ទីក្រុងសេអ៊ូល ៖ កាលពីថ្ងៃចន្ទកន្លងមក នេះ រដ្ឋមន្ត្រីកសិកម្មរបស់ប្រទេសកូរ៉េខាងត្បូងបានបង្ហាញក្តីសង្ឃឹមទៅលើការសហការលើ គម្រោងជាច្រើនជាមួយនឹងកូរ៉េខាងជើងពេលដែលកិច្ចប្រជុំអន្តរកូរ៉េបើកផ្លូវសម្រាប់កិច្ចសហប្រតិបត្តិការសេដ្ឋកិច្ចឆ្លងព្រំដែន ។
លោក Lee Gae-ho ដែលគ្រប់គ្រងផ្នែកអាហារ និងកិច្ចការជនបទ នៃក្រសួងកសិកម្ម របស់កូរ៉េខាងត្បូង បាននិយាយកាលពីខែមុនថា ការិយាល័យរបស់លោកនឹងស្វែងរកវិធីក្នុងការសហការជាមួយនឹងកូរ៉េខាងជើងពេលដែលអ្នកដឹកនាំប្រទេសទាំងពីរសម្រេចបានកិច្ចព្រមព្រៀងសន្តិភាពអំឡុងពេលនៃកិច្ចប្រជុំនៅកូរ៉េខាងជើងនាសប្តាហ៍ក្រោយនេះ ។
កិច្ចប្រជុំខាងមុខនេះ នឹងផ្តោតសំខាន់លើការលុបបំបាត់អាវុធនុយក្លេអ៊ែររបស់កូរ៉េខាងជើង ប៉ុន្តែលោក Lee បាននិយាយថា ប្រទេសទាំងពីរក៏អាចពិភាក្សាពីកិច្ចសហប្រតិបត្តិការលើកសិកម្មនិងអាហារដែរ ប្រសិនបើពួកគេអាចឆ្លងដល់ដំណាក់កាលមួយទៀត ។
មន្ត្រីផ្នែករុក្ខាប្រមាញ់បានជួបគ្នានៅភូមិ Panmunjom ជាប់ព្រំដែនកាលពីខែកក្កដា ដើម្បីពិភាក្សាពីការសហការក្នុងផ្នែករុក្ខាប្រមាញ់ និងបរិស្ថានផងដែរ ។
លោក Lee បាននិយាយថា ៖« ខ្ញុំលឺថាកូរ៉េខាងជើងមានចំណាប់អារម្មណ៍យ៉ាងខ្លាំងលើការសហការក្នុងផ្នែកកសិកម្ម ។ ពួកយើងកំពុងតែត្រួតពិនិត្យពីវិធីក្នុងការធ្វើដូច្នេះ ប៉ុន្តែក្របខ័ណ្ឌសម្រាប់ការផ្លាស់ប្តូរអន្តរកូរ៉េ គួរតែស្របទៅនឹងការដាក់ទណ្ឌកម្មអន្តរជាតិ (លើកូរ៉េខាងជើង) »។
គួរបញ្ជាក់ដែរថា កូរ៉េខាងជើងបានជួបប្រទះនឹងកង្វះអាហារយ៉ាងធ្ងន់ធ្ងរ ហើយស្ថានការណ៍នេះកាន់តែធ្ងន់ធ្ងរទៅទៀតព្រោះតែការដាក់ទណ្ឌកម្មអន្តរជាតិ ។
កូរ៉េខាងត្បូងនាំចេញអង្ករទៅកាន់កូរ៉េខាងជើងក្រោមការគ្រប់គ្រងរបស់លោក Roh Moo-hyun និង Kim Dae-jing ដែលជាផ្នែកមួយនៃគម្រោងឆ្លងព្រំដែន ប៉ុន្តែជំនួយអាហារត្រូវបានបញ្ចប់នៅឆ្នាំ ២០១០ ក្រោមរដ្ឋាភិបាលលោក Lee Myung-bak ៕
ចែករំលែកព័តមាននេះ