ខេត្តកណ្ដាល ៖ ក្រុមជួញដូរគ្រឿងញៀនយ៉ាងសកម្មប្រចាំនៅក្រុងតាខ្មៅដែលតែងតែបង្កភាពអសន្តិសុខនៅជាប់ប៉ុស្តិ៍រដ្ឋបាលព្រែកហូរត្រូវបាននគរបាលនៃអធិការក្រុងតាខ្មៅសហការជាមួយកម្លាំងអធិការស្រុកកណ្តាលស្ទឹងដោយមានការសម្របសម្រួលនីតិវិធីពីលោក លាវ ស្រេង ព្រះរាជអាជ្ញាអមសាលាដំបូងខេត្តកណ្ដាល និងក្រោមការចង្អុលបង្ហាញពីលោកឧត្តមសេនីយ៍ទោ អ៊ាវ ចំរើន ស្នងការនគបាលខេត្តបានចុះបង្ក្រាបបានមនុស្ស៤នាក់ រួមនឹងថ្នាំញៀនជិត៣០កញ្ចប់ មានកញ្ចប់តូច កញ្ចប់ធំ រួមនឹងវត្ថុតាងមួយចំនួនទៀត ។ ក្នុងហេតុការណ៍ចុះបង្ក្រាបនេះកាលពីវេលាម៉ោង១២និង៣០នាទី ថ្ងៃទី១០ខែកញ្ញា ឆ្នាំ២០១៨ នៅចំណុចផ្ទះឈ្មោះ ដួង រ៉ាវិត ស្ថិតក្នុងភូមិព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្ដាល ។
មិនជនសង្ស័យចំនួន៤នាក់នោះមានទី១-ឈ្មោះ ដួង រ៉ាវិត ហៅក្រៅ វិត ភេទប្រុស អាយុ២៥ឆ្នាំ មុខរបរ មិនពិតប្រាកដស្រុកកំណើត នៅភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល មានទីលំនៅបច្ចុប្បន្ននៅភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល, ទី២-ឈ្មោះ ឡេង រ៉ាវី ហៅក្រៅ វី ភេទប្រុស អាយុ២៧ឆ្នាំ មុខរបរមិនពិតប្រាកដ ស្រុកកំណើតនៅភូមិព្រែកកែវ ឃុំកោះខែល ស្រុកស្អាង ខេត្តកណ្តាល មានទីលំនៅបច្ចុប្បន្ន នៅភូមិព្រែកកែវ ឃុំកោះខែល ស្រុកស្អាង ខេត្តកណ្តាល, ទី៣-ឈ្មោះ ខៀវ សុខល័ក្ខ ហៅក្រៅ ល័ក្ខ ភេទប្រុស អាយុ២៩ឆ្នាំ មុខរបរមិនពិតប្រាកដ ស្រុកកំណើតនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោរ រាជធានីភ្នំពេញ ទីលំនៅបច្ចុប្បន្ននៅភូមិព្រែកកំពឹស សង្កាត់ព្រែកកំពឹស ខណ្ឌដង្កោរ រាជធានីភ្នំពេញ និងទី៤-ឈ្មោះ ជេត ភក្តី ហៅយ៉ា ភេទប្រុស អាយុ២១ឆ្នាំ មុខរបរមិនពិតប្រាកដ ស្រុកកំណើតនៅភូមិព្រែកកែវ ឃុំកោះខែល ស្រុកស្អាង ខេត្តកណ្តាល ទីលំនៅបច្ចុប្បន្ននៅភូមិព្រែកកែវ ឃុំកោះខែល ស្រុកស្អាង ខេត្តកណ្តាល ។
នគរបាលបានអោយដឹងថា នៅថ្ងៃខែឆ្នាំវេលាម៉ោងកើតហេតុខាងលើកម្លាំងសមត្ថកិច្ចអធិការដ្ឋាននគរបាលក្រុងតាខ្មៅសហការណ៏ជាមួយកម្លាំសមត្ថកិច្ចអធិការដ្ឋាននគរបាលស្រុកកណ្តាលស្ទឹងដោយមានការរាយការណ៏ពីមហាជនល្អហើយកម្លាំងសមត្ថកិច្ចក៏បានចុះទៅឆែកឆេរនៅផ្ទះជនសង្ស័យឈ្មោះ ដួង រ៉ាវិត រកឃើញសារធាតុញៀនម៉ាទឹកកក(ICE)ប្រភេទមេតំហ្វេតាមីនដែលមានចំនួន២៤កញ្ចប់ ហើយក៏ឃាត់ខ្លួនបញ្ជូនទៅកាន់អធិការដ្ឋាននគរបាលក្រុងតាខ្មៅតែម្តង ។
នៅចំពោះមុខសមត្ថកិច្ចជនសង្ស័ឈ្មោះ ដួង រ៉ាវិត បានឆ្លើយសារភាពថា ក្នុងចំណោមថ្នាំញៀនចំនួន២៤កញ្ចប់នោះ មាន១៩កញ្ចប់តូចពិតជារបស់ខ្លួនមែន រីឯថ្នាំញៀន៣កញ្ចប់ធំល្មម និង២កញ្ចប់ធំទៀតមិនមែនជារបស់ខ្លួនទេ គឺរបស់ឈ្មោះ ខ្វាន់ ភេទប្រុស ដែលមានទីលំនៅ នៅចាក់អង្រែរក្រោម ។
ចំណែកជនសង្ស័យចំនួនបីនាក់ទៀតដែលមានឈ្មោះ ឡេង រ៉ាវី, ខៀវ សុខល័ក្ខ និង ឈ្មោះ ជេត ភក្តី បានសារភាពថា ខ្លួនពិតជាបានទៅជក់នៅផ្ទះរបស់ឈ្មោះ ដួង រ៉ាវិត ពិតប្រាកដមែន ។ ចំពោះជនសង្ស័យរួមនឹងវត្ថុតាងត្រូវបានបញ្ជូនទៅកាន់អធិការដ្ឋាននគរបាលក្រុងតាខ្មៅដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ