ខេត្តកំពង់ស្ពឺ ៖ ជនសង្ស័យម្នាក់ត្រូវសមត្ថកិច្ចឃាត់ខ្លួនភ្លាមៗ ក្រោយបានធ្វើសកម្មភាពឆក់ទូរស័ព្ទតាមផ្លូវ និងតាមចម្លើយសារភាព សមត្ថកិច្ចបានឃាត់ខ្លួនជនសង្ស័យចំនួន៦នាក់ទៀតដល់ក្នុងផ្ទះ។ ហេតុការណ៍ឆក់ទូរស័ព្ទនេះ បានកើតឡើងកាលពីម៉ោង១១និង៣០នាទីព្រឹកថ្ងៃទី៩ ខែកញ្ញា ឆ្នាំ២០១៨ តាមផ្លូវជាតិលេខ៤ចន្លោះគីឡូម៉ែត្រលេខ៤២ និង៤៣ ក្នុងភូមិរលាំងសង្កែ សង្កាត់សុព័រទេព ក្រុងច្បារមន។
ប្រភពព័ត៌មានពីសមត្ថកិច្ចបានឲ្យដឹងថា មុនឈានដល់បង្ក្រាបមុខសញ្ញាចោរឆក់មួយក្រុមនេះ សមត្ថកិច្ចបានទទួលព័ត៌មានពីជនរងគ្រោះថា មានករណីឆក់ទូរស័ព្ទ។ ក្រោយពីស្គាល់ភិនភាគជនសង្ស័យទាំងនោះ សមត្ថកិច្ចបានចេញស្ទាក់ ហើយជនសង្ស័យដឹងខ្លួន ក៏ផ្តួលម៉ូតូរត់ចូលអនុវិទ្យាល័យចំបក់ តែសមត្ថកិច្ច តាមចាប់បានជនសង្ស័យម្នាក់ឈ្មោះម៉ឹល រ៉ូយ៉ាល់ ភេទប្រុស អាយុ២២ឆ្នាំ រស់នៅភូមិស្វាយដង្គុំ ឃុំស្គុះ ស្រុកសំរោងទង ។ រួចជនសង្ស័យម្នាក់បានឆ្លើយសារភាពប្រាប់ទីកន្លែងដែលបក្ខពួកកំពុងលាក់ខ្លួន។
ប្រភពដដែលបន្តថា លុះដល់ម៉ោង២រសៀល សមត្ថកិច្ចបានសហការជាមួយប៉ូលិសព្រហ្មទណ្ឌកម្រិតធ្ងន់ ចុះឆែកឆេរផ្ទះ១កន្លែង ឃាត់ខ្លួនបានជនសង្ស័យ៦នាក់ទៀតក្នុងនោះរួមមាន ១-ឈ្មោ ឌឺ វណ្ណនុន ភេទប្រុស អាយុ១៧ឆ្នាំ នៅភូមិរំលោងប្រឃ្លៈ សង្កាត់សុពរ័ទេព ក្រុងច្បារមន ឃាត់ខ្លួននៅភូមិបែលហែលសង្កាត់សុពរ័ទេព ក្រុងច្បារមន ជាជនល្មើល ២-ឈ្មោះឃុន លីដា ភេទប្រុស អាយុ២៨ឆ្នាំ ភូមិបែលហែល សង្កាត់សុពរ័ទេព ជាបក្ខពួក និងជាអ្នកផ្ដល់ផ្ទះឱ្យស្នាក់នៅ ៣- ឈ្មោះស៊ីម សៅនិត ភេទប្រុស អាយុ១៧ឆ្នាំ នៅភូមិតាំងក្រសាំង ឃុំព្នាយ ស្រុកសំរោងទង ៤-ឈ្មោះ អ៊ុន ចាន់ដារ៉ា ភេទប្រុស អាយុ១៧ឆ្នាំ ភូមិសំពៅង ឃុំព្នាយ ៥-ឈ្មោះភុំ សុខជា ភេទប្រុស អាយុ១៧ឆ្នាំ នៅភូមិតាំងក្រសាំង ឃុំព្នាយនិង៦-ឈ្មោះគង់ វិចិ្ឆការ ភេទប្រុស អាយុ១៧ឆ្នាំ នៅភូមិអង្គសេរី សង្កាត់សុពរ័ទេព ក្រុងច្បារមន។
ក្រោយឃាត់ខ្លួន ក្រុមជនសង្ស័យបានសារភាពថា ឈ្មោះរ៉ូយ៉ាល់ បានធ្វើសកម្មភាពឆក់ចំនួន៤លើក ក្នុងនោះលើកទី១-ធ្វើសកម្មភាពឆក់នៅសួនកំពង់ស្ពឺ លើកទី២-ធ្វើសកម្មភាពនៅផ្លូវ៤១ខាងជើងផ្សារអង្គមេត្រី លើកទី៣-ធ្វើសកម្មភាពនៅផ្លូវជាតិលេខ៤ខាងកើតផ្សារថ្នល់ទទឹង និងលើកទី៤-បានធ្វើសកម្មភាពនៅថ្ងៃទី៩ កញ្ញា នេះតែម្តង ។
ក្នុងការចុះឃាត់ខ្លួនជនសង្ស័យចំនួន៧នាក់ សមត្ថកិច្ចដកហូតបានម៉ូតូ៣គ្រឿងម៉ាកស្មាស់និងទូរសព្វ័ដៃមួយគ្រឿង ។ បច្ចុប្បន្ន ជនសង្ស័យទាំង៧នាក់ខាងលើត្រូវបានសមត្ថកិច្ចកសាងសំណុំរឿងចាត់កាតាមនីតិវិធី៕
ចែករំលែកព័តមាននេះ