ខេត្តកំពង់ធំ ៖ ម៉ូតូមួយគ្រឿងជិះគ្នា២នាក់បានជ្រុលចង្កូតទៅបុករះបង្គោលថ្មតឿដែលគេដាក់ដាំតាមជាយផ្លូវ បណ្តាលឱ្យស្លាប់ម្នាក់ និងរបួសធ្ងន់ម្នាក់ ។ គ្រោះថ្នាក់ចរាចរណ៍នេះបង្កឡើងដោយខ្លួនឯងបានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី១០ ខែកញ្ញា ឆ្នាំ២០១៨ នៅលើកំណាត់ផ្លូវជាតិលេខ៦២…
ខេត្តកំពង់ធំ ៖ ម៉ូតូមួយគ្រឿងជិះគ្នា២នាក់បានជ្រុលចង្កូតទៅបុករះបង្គោលថ្មតឿដែលគេដាក់ដាំតាមជាយផ្លូវ បណ្តាលឱ្យស្លាប់ម្នាក់ និងរបួសធ្ងន់ម្នាក់ ។ គ្រោះថ្នាក់ចរាចរណ៍នេះបង្កឡើងដោយខ្លួនឯងបានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី១០ ខែកញ្ញា ឆ្នាំ២០១៨ នៅលើកំណាត់ផ្លូវជាតិលេខ៦២ ចំណុចគីឡូម៉ែត្រលេខ២៦ ស្ថិតនៅព្រំប្រទល់ភូមិខ្វាន់ទៀង និងភូមិគគីរ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
សមត្ថកិច្ចនគរបាលចរាចរណ៍ស្រុកប្រាប់ថាជនរងគ្រោះទាំង២នាក់ខាងលើត្រូវជាបងប្អូនជីដូនមួយនឹងគ្នា ដោយអ្នកបើកបរម៉ូតូឈ្មោះឡាក់ ផល្លី ភេទស្រី អាយុ៣៤ឆ្នាំ នៅភូមិម្រាក់(ខ) ឃុំទួលគ្រើល ស្រុកប្រា
សាទបល្ល័ង្ក បានស្លាប់នៅកន្លែងកើតហេតុ ចំណែកអ្នករួមដំណើរម្នាក់ឈ្មោះ យ៉ុម ចាន់ ភេទប្រុសអាយុ៣៤ឆ្នាំ នៅភូមិ ឃុំជាមួយគ្នា បានរងរបួសរបួសធ្ងន់ ។ ម៉ូតូមួយគ្រឿងរបស់ជនរងគ្រោះម៉ាកហុងដា ធុនC125 ពណ៌ខ្មៅ ពាក់ស្លាកលេខ ភ្នំពេញ ១CK-៥៤១៨ ។
សមត្ថកិច្ចបញ្ជាក់ថា មុនកើតហេតុ គេឃើញជនរងគ្រោះទាំង២នាក់បានជិះម៉ូតូមួយគ្រឿងក្នុងគោលបំណងទៅទិញស័ង្កសី ដោយធ្វើដំណើរក្នុងទិសដៅពីជើងទៅត្បូង ហើយបើកបរក្នុងល្បឿនយ៉ាងលឿន លុះមកដល់ចំណុចផ្លូវកោងមិនបន្ថយល្បឿន ក៏បានជ្រុលចង្កូតទៅបុករះបង្គោលថ្មតឿតាមជាយផ្លូវ បណ្តាលឲ្យស្ត្រីជាអ្នកបើកបរបានស្លាប់នៅនឹងកន្លែងកើតហេតុ ចំណែកបុរសដែលជាអ្នករួមដំណើរបានរងរបួសធ្ងន់តែម្តង។
ក្រោយកើតហេតុ សពត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យ ចំណែកអ្នករបួសធ្ងន់ត្រូវបានបញ្ជូនទៅមន្ទីរពេទ្យដើម្បីសង្គ្រោះ ៕
ចែករំលែកព័តមាននេះ