បំបែកសម្បុកជនជាតិចិនម៉ាស្សា ក្រោមរូបភាពបម្រើផ្លូវភេទ
- ព្រះសីហនុ
ខេត្តព្រះសីហនុ ៖ ស្នងការដ្ឋាននគរបាលខេត្តព្រះសីហនុ ក្រោមការដឹកនាំដោយលោកឧត្តមសេនីយ៍ទោ ជួន ណារិន្ទ កាលពីវេលាម៉ោង១២ និង៤៥នាទីយប់ ឈានចូលថ្ងៃទី៦ ខែកញ្ញា…
ខេត្តព្រះសីហនុ ៖ ស្នងការដ្ឋាននគរបាលខេត្តព្រះសីហនុ ក្រោមការដឹកនាំដោយលោកឧត្តមសេនីយ៍ទោ ជួន ណារិន្ទ កាលពីវេលាម៉ោង១២ និង៤៥នាទីយប់ ឈានចូលថ្ងៃទី៦ ខែកញ្ញា កម្លាំងសមត្ថកិច្ចនគរបាល ការិយាល័យប្រឆាំងការជួញដូរមនុស្ស និងការពារអនីតិជន សហការជាមួយកម្លាំងអធិការដ្ឋាននគរបាល ក្រុងព្រះសីហនុ បានចុះឃាត់ខ្លួនជនសង្ស័យចំនួន២នាក់ កំពុងដើរផ្សព្វផ្សាយ ចែកខិតប័ណ្ណមានរូបអាសអាភាស បង្កប់ន័យបម្រើសេវាផ្លូវភេទ នៅចំណុចឆ្នេរអូរឈើទាល ក្នុងសង្កាត់លេខ៤។
ជនសង្ស័យម្នាក់ឈ្មោះ HUANG JI ភេទប្រុស អាយុ៣៥ឆ្នាំ ជនជាតិចិន (គ្មានលិខិតឆ្លងដែនជាប់ខ្លួន និង ម្នក់ឈ្មោះ XIA LU ភេទប្រុស អាយុ២៦ឆ្នាំ ជនជាតិចិនដូចគ្នា និងគ្មានលិខិតឆ្លងដែនជាប់ខ្លួនដែរ។ ក្រោយពីបានឃាត់ខ្លួន កម្លាំងជំនាញបានឈានទៅធ្វើការ ឆែកឆេរកន្លែងស្នាក់នៅរបស់ជនសង្ស័យ គឺហាងម៉ាស្យាយីហោ SPA ស្ថិតក្នុងក្រុមទី២ ភូមិ៤ សង្កាត់៤ ក្រុងព្រះសីហនុ ដោយបាននាំខ្លួនស្ត្រីជនជាតិចិនចំនួន១០នាក់ នៅក្នុងហាងម៉ាស្យា មកធ្វើការសាកសួរ។
ក្នុងនោះសមត្ថកិច្ចក៏បានដកហូតវត្ថុតាង ខិតប័ណ្ណមានរូបអាសអាភាស៧២ប្រអប់ (១ប្រអប់ស្មើនឹង៥០០សន្លឹក) -សៀវភៅកត់ត្រា ៣ក្បាល, -ស្រោមអនាម័យមិនទាន់ប្រើចំនួន ៨០ស្រោម, -ស្រោមអនាម័យប្រើរួចចំនួន ០៥ស្រោម, -អាយផេត ម៉ាក Dinabook ១គ្រឿង, -កាបូបដាក់ស្រោមអនាម័យ ចំនួន៣, -វិទ្យុទាក់ទងម៉ាក Magaband ចំនួន៣គ្រឿង។ បន្ទាប់មកជនសង្ស័យ២នាក់ និងស្ត្រីចំនួន១០នាក់ ត្រូវបានកម្លាំងជំនាញបាន ធ្វើការសាកសួរ នៅការិយាល័យនគរបាលប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្ត៕
ចែករំលែកព័តមាននេះ