រាជធានីភ្នំពេញ ៖ បុរសម្នាក់ផឹកស្រវឹងជិះម៉ូតូលឿនពេកជ្រុលទៅបុកគូទរថយន្តមួយគ្រឿងពីក្រោយ បណ្តាលដួលម៉ូតូសន្លប់មួយសន្ទុះ ពេលដឹងខ្លួនវិញធ្វើការចរចាគ្នាត្រូវហើយ តែបែរជាវាយម៉ូតូខ្លួនឯងមួយដៃដើម្បីបញ្ចេញកំហឹង ធ្វើឲ្យម្ចាស់រថយន្តធាក់មួយជើងដួលដាច់ផ្ញារ បង្កឲ្យមានការភ្ញាក់ផ្អើលកាលពីវេលាម៉ោង១រំលងអាធ្រាត្រឈានចូលថ្ងៃទី៦ ខែកញ្ញា ឆ្នាំ២០១៨ នៅតាមបណ្ដោយផ្លូវ ២០០៤ ហៅផ្លូវមៃដា ភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ ។
ម៉ូតូខាងលើម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ១BT-១៩២៩ បើកបរដោយបុរសម្នាក់ក្នុងស្ថានភាពស្រវឹង បើកបរក្នុងទិសដៅពីត្បូងទៅជើង។ ចំណែករថយន្តមួយគ្រឿងម៉ាកឡិចស៊ីស RX 300 ពណ៌ស ពាក់ស្លាកលេខ ភ្នំពេញ ២AV-៤៦០៦ បើកបរដោយបុរសម្នាក់ រីឯបុរសម្នាក់ និងស្ត្រីម្នាក់ទៀតជាអ្នករួមដំណើរ បានធ្វើដំណើរក្នុងទិសដៅពីត្បូងទៅជើងស្របទិសគ្នា ។
តាមប្រភពព័ត៌មានពីភាគីខាងរថយន្តបាននិយាយថា នៅមុនពេលកើតហេតុ ពួកគាត់មានគ្នា៣នាក់ ក្នុងនោះ ស្ត្រីម្នាក់និងប្រុស២នាក់ ហើយបានបើកបររថយន្តតាមដងផ្លូវ២០០៤ ក្នុងទិសដៅពីត្បូងទៅជើងបានស៊ីញ៉ូខាងស្ដាំបើកតិចៗ បន្ទាប់មកស្រាប់តែមានម៉ូតូមួយគ្រឿងខាងលើបើកក្នុងស្ថានភាពស្រវឹងបានជិះមកបុកពីក្រោយរថយន្តពេញទំហឹង បណ្ដាលឱ្យម៉ូតូជាប់ខាងក្រោយរថយន្ត ចំណែកឯអ្នកបើកបរម៉ូតូដួលធ្លាក់ពីលើម៉ូតូសន្លប់ស្តូកស្តឹង ។ បន្ទាប់មកភាគីខាងរថយន្តបានចុះមកមើលអ្នកបើកបរម៉ូតូដែលសន្លប់ស្ដូកស្ដឹង ហើយបានជួយរឹត និងសង្គ្រោះបឋម។
ប្រភពព័ត៌មានដដែលបានបន្តទៀតថា បន្ទាប់មកអ្នកបើកបរម៉ូតូក៏ដឹងខ្លួនបានសម្របសម្រួលគ្នាជាមួយម្ចាស់រថយន្តដោយមិនមានលុយសង តែអ្នកបើកបរម៉ូតូបម្រុងដោះគ្រឿងអលង្ការឲ្យដែរ ប៉ុន្តែភាគីខាងរថយន្តមិនព្រមទទួលសំណងខាងលើនោះឡើយ។
បន្ទាប់មកភាគីខាងម៉ូតូបានទាក់ទងទៅតំណាងមកដោះស្រាយនៅកន្លែងកើតហេតុជាមួយភាគីខាងម្ចាស់រថយន្តដើម្បីយករថយន្តទៅការាស់ ហើយសងចំនួន១០០ដុល្លារ ដោយភាគីទាំងសងខាងបានយល់ស្របជាមួយគ្នាផងដែរ ស្រាប់តែភាគីខាងម៉ូតូបានខឹងច្រឡោតនឹងសំដីតិចតួច រួចបានវាយម៉ូតូមួយខ្លួនឯងមួយដៃមុខសមត្ថកិច្ច និងម្ចាស់រថយន្ត ធ្វើឲ្យម្ចាស់រថយន្តខឹងពេក បានធាក់អ្នកបើកបរម៉ូតូមួយជើងដួលផ្ងារជើងឡើងលើ ធ្វើឱ្យភាគីខាងម៉ូតូមិនសុខចិត្តរកវាយគ្នាទៅវិញទៅមក ហើយភាគីខាងរថយន្តបំរុងយកកាំភ្លើងមកបាញ់ទៀតផង។
ក្រោយពេលកើតហេតុ ភាគីទាំងសងខាងប្រើអំពើហិង្សារៀងៗខ្លួន សមត្ថកិច្ចមិនហ៊ានដោះស្រាយភ្លាមៗនោះទេ បន្ទាប់មកភាគីទាំងសងខាងបានហៅតំណាងមកដោះស្រាយម្តងទៀតទើបព្រមបញ្ចប់រឿងនៅកន្លែងកើតហេតុ ដោយសម្របសម្រួលគ្នាមិនប្តឹងផ្តល់គ្នាអ្វីនោះឡើយ ៕
ចែករំលែកព័តមាននេះ