ខេត្តស្វាយរៀង ៖ ក្រុមការងារលេខាធិការដ្ឋានលុបបំបាត់ឱសថក្លែងក្លាយ និងសេវាសុខាភិបាលខុសច្បាប់សហការជាមួយអាជ្ញាធរខេត្តមន្ត្រីនគរបាលយុត្តិធម៌ និងមន្ទីរសុខាភិបាលខេត្តស្វាយរៀងបានចុះបង្ក្រាបបន្ទប់ពិគ្រោះ និងព្យាបាលជំងឺអត់ច្បាប់របស់ជនជាតិចិនមួយកន្លែងនៅក្នុងតំបន់ពាណិជ្ជកម្មក្រុងបាវិត ខេត្តស្វាយរៀង កាលពីថ្ងៃទី៣ ខែកញ្ញា ឆ្នាំ២០១៨ កន្លងទៅ ។ ក្នុងនោះក្រុមការងារបានប្រមូលថ្នាំក្លែងក្លាយផលិតនៅប្រទេសចិនដែលមិនបានចុះបញ្ជីការនៅក្រសួងសុខាភិបាលចំនួន៤កេសយកមករក្សាទុកនៅមន្ទីរសុខាភិបាលដើម្បីដុតកំទេចចោល ។
នៅព្រឹកថ្ងៃទី៤ ខែកញ្ញា ឆ្នាំ២០១៨ នេះលោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាល ខេត្តស្វាយរៀងបានអោយដឹងថា ក្នុងអំឡុងពេលមុន និងក្រោយបោះឆ្នោតសេវាសុខាភិបាលខុសច្បាប់នៅក្នុងខេត្តស្វាយរៀងមានការកើនឡើងបន្តិចមានទាំងជនជាតិខ្មែរ និងបរទេស ។ ប៉ុន្តែក្នុងនាមរូបលោកប្រធានមន្ទីរ និងសន្យាថា នឹងខិតខំប្រឹងប្រែងលុបបំបាត់ឱ្យអស់ទូទាំងខេត្តស្វាយរៀង ។
លោកវេជ្ជបណ្ឌិតបានថ្លែងបញ្ជាក់ទៀតថា ដើម្បីលុបបំបាត់សេវាសុខាភិបាលខុសច្បាប់នេះឱ្យមានប្រសិទ្ធភាពត្រូវតែមានការចូលរួមសហការពីព្រះរាជអាជ្ញាអាជ្ញាធរខេត្ត និងសមត្ថកិច្ចមូលដ្ឋានដោយអនុវត្តតាមគោលការណ៍ច្បាប់ជាធំដើម្បីលើកកម្ពស់សុខុមាលភាពរបស់ពលរដ្ឋអោយកាន់តែប្រសើរឡើង ។
បច្ចុប្បន្នគេសង្កេតឃើញជនជាតិចិនមកជួលផ្ទះរស់នៅ និងប្រកបរបររកស៊ីនៅក្រុងបាវិត ខេត្តស្វាយរៀង ជាច្រើនមានទាំងបើកផ្សារលក់ដូររហូតមានបើកបន្ទប់ពិគ្រោះ និងព្យាបាលជម្ងឺទៀតផង ហើយការបើកបន្ទប់ពិគ្រោះ និងព្យាបាលជម្ងឺនេះពុំមានសុំច្បាប់អនុញ្ញាតិ និងការប្រើប្រាស់ឱសថ គឺឱសថក្លែងក្លាយហើយមានការបង្ក្រាបពីមន្ទីរសុខាភិបាលទើបប្រជាពលរដ្ឋដឹងនេះបើគ្មានការបង្ក្រាបទេមិនដឹងជាយ៉ាងណាទេ ៕
ចែករំលែកព័តមាននេះ