រាជធានីភ្នំពេញ ៖ យុវជនម្នាក់ ដែលបែកថ្នាំដល់កម្រិត និងបង្កឱ្យមានអាការកំរោលចូលលែងដឹងខុសត្រូវ ដោយយកដុំថ្មដើរគប់ទៅលើរថយន្ត និងអ្នកដំណើរផ្សេងទៀត បង្កឱ្យមានការភ្ញាក់ផ្អើលយ៉ាងខ្លាំងនៅខាងមុខក្រសួងសង្គមកិច្ច អតីតយុទ្ធជន និងនីតិសម្បទា តាមមហាវិថីព្រះមុនីវង្ស ក្នុងសង្កាត់បឹងត្របែក ខណ្ឌចំការមន កាលពីព្រឹកថ្ងៃទី៣១ សីហា កន្លងមក ពេលនេះ រូបគេបានស្លាប់ហើយ ដោយសារជំងឺគាំងបេះដូង ក្រោយពេលកម្លាំងមានសមត្ថកិច្ចចាប់ដឹកតាមរថយន្តទៅធ្វើការសង្គ្រោះ តែជួយមិនបាននិងស្លាប់ក្នុងថ្ងៃដដែលនោះ ។
តាមប្រភពព័ត៌មានពីនគរបាលបានឱ្យដឹងថា យុវជនរូបនេះ ឈ្មោះ គឹម ភារុណ ហៅផ្លយ អាយុ២៣ឆ្នាំ ជាអ្នកលក់អីវ៉ាន់តាមអនឡាញ មានទីលំនៅផ្ទះលេខ៥៥E១ ផ្លូវលេខ១៣៤ ក្នុងសង្កាត់មនោរម្យ ខណ្ឌ៧មករា ។
កាលពីវេលាម៉ោង៩ និង១០នាទីព្រឹកថ្ងៃទី៣១ សីហា កន្លងមក យុវជនរូបនេះ បានបង្កចលាចលនៅខាងមុខក្រសួងសង្គមកិច្ច អតីតយុទ្ធជន និងនីតិសម្បទា ហើយពេលនោះមិនមានអ្នកណាម្នាក់បានដឹង និងស្គាល់អត្តសញ្ញាណរូបគេឡើយ ហើយក៏មិនដឹងថា រូបគេដើរមកពីណាដែរ?
លុះមកដល់ចំណុចខាងលើ ដោយអាការបែកថ្នាំ រូបគេបានយកដុំថ្មដេញគប់រថយន្ត និងអ្នកដំណើរតាមផ្លូវ បង្កឲ្យមានការភ័យខ្លាចគ្រប់ៗគ្នា ហើយកម្លាំងសមត្ថកិច្ចក៏ធ្វើអន្តរាគមន៍ចាប់ចង ក្នុងបំណងបញ្ជូនទៅកាន់មន្ទីរសង្គមកិច្ច ។
ប្រភពដដែលឲ្យដឹងទៀតថា លុះបន្តិចក្រោយមក រថយន្តរបស់មន្ទីរសង្គមកិច្ចរាជធានីភ្នំពេញ ក៏មកទទួលយក តែដោយឃើញរូបគេនៅសម្ងំស្ងៀមបាត់មាត់បាត់.កខុសប្លែក មិនដូចពេលបង្កចលាចល ក៏ដឹកទៅមន្ទីរពេទ្យមិត្តភាពខ្មែរ-សូវៀត ក្នុងបំណងជួយសង្គ្រោះ ប៉ុន្តែរហូតដល់ម៉ោង១២ថ្ងៃត្រង់ថ្ងៃដដែលយុវជនរូបនេះ ក៏បានស្លាប់ទៅ ។
ក្រោយពីយុវជនរូបនេះស្លាប់ សមត្ថកិច្ចជំនាញក៏បានធ្វើកោសល្យវិច័យបង្ហាញថា ការស្លាប់នេះដោយសារជំងឺគាំងបេះដូង ព្រោះតែរូបគេបានប្រើប្រាស់សារធាតុញៀនប្រភេទ មេតំហ្វេតាមីនច្រើនហួសកម្រិត ហើយនៅវេលាម៉ោង១០និង២០នាទីព្រឹកថ្ងៃទី១ ខែកញ្ញា ក៏បានប្រគល់សពទៅឱ្យស្ត្រីជាម្តាយយកទៅតម្កល់ធ្វើបុណ្យនៅវត្តសំបួរមាស តាមប្រពៃណី ៕
ចែករំលែកព័តមាននេះ