រាជធានីភ្នំពេញ ៖ អាជ្ញាធររាជធានីភ្នំពេញសុំឲ្យម្ចាស់សណ្ឋាគារ ភោជនីយដា្ឋន អាហារដ្ឋាន ក្លឹបកម្សាន្ត ខារ៉ាអូខេ ផ្ទះសំណាក់ និងម្ចាស់អាជីវកម្មដ្ឋាននានាក្នុងវិស័យទេសចរណ៍ទាំងអស់នៅរាជធានីភ្នំពេញ ចូលរួមជួយទប់ស្កាត់…
រាជធានីភ្នំពេញ ៖ អាជ្ញាធររាជធានីភ្នំពេញសុំឲ្យម្ចាស់សណ្ឋាគារ ភោជនីយដា្ឋន អាហារដ្ឋាន ក្លឹបកម្សាន្ត ខារ៉ាអូខេ ផ្ទះសំណាក់ និងម្ចាស់អាជីវកម្មដ្ឋាននានាក្នុងវិស័យទេសចរណ៍ទាំងអស់នៅរាជធានីភ្នំពេញ ចូលរួមជួយទប់ស្កាត់ គ្រឿងញឿនជាមួយអាជ្ញាធរ ដើម្បីដោះស្រាយបញ្ហាគ្រឿងញៀនទទួលបានលទ្ធផលជាវិជ្ជមាន។ ក្នុងកិច្ចប្រជុំ ស្តីពីការណែនាំ និងលុបបំបាត់ការប្រើប្រាស់ការជួញដូរ និងការចែកចាយគ្រឿងញៀនតាមបណ្តាក្លឹបកម្សាន្ត និងអាជីវកម្មដ្ឋាន ក្នុងវិស័យទេសចរណ៍នៅរាជធានីភ្នំពេញ កាលពីព្រឹកថ្ងៃទី៣១ សីហា ២០១៨ នៅរដ្ឋបាលរាជធានីភ្នំពេញ លោក មាន ចាន់យ៉ាដា អភិបាលរងរាជធានីភ្នំពេញបានលើកឡើងថា ដើម្បី ទប់ស្កាត់គ្រឿងញៀនឲ្យមានប្រសិទ្ធិភាព គ្រប់ម្ចាស់អាជីវកម្មដ្ឋានក្នុងវិស័យទេសចរណ៍ នៅរាជធានីភ្នំពេញ ត្រូវចូលរួមទប់ស្តាត់គ្រឿងញឿនជាមួយអាជ្ញាធរ ពោលគឺចូលរួមទាំងអស់គ្នាដើម្បីជីវិត និងសហគមន៍យើង គ្មានគ្រឿងញៀន។
លោកអភិបាលរងរាជធានីបន្តថា បញ្ហាគ្រឿងញៀននេះ មិនមែនជាការងាររបស់អង្គភាព ស្ថាប័ន ឬរបស់នរណាម្នាក់នោះទេ គឺជាការងារទាំងអស់គ្នាដែលទាមទារមានការ ចូលរួមពីគ្រប់ភាគីពាក់ព័ន្ធ ទាំងអស់ ជាពិសេសពីម្ចាស់អាជីកម្មដ្ឋាន។ លោកថា រហូតមកដល់ពេលនេះ ស្ថានភាពគ្រឿងញៀននៅ រាជធានីភ្នំពេញ នៅតែក្លាយជាបញ្ហាប្រឈមខ្ពស់ និងមានភាពស្មុគស្មាញ រួមទាំងការលួចលាក់ ការកែច្នៃ ការផលិត ការចរាចរណ៍ ការជួញដូរ ដែលបង្កឲ្យមានការប៉ះពាល់ធ្ងន់ធ្ងរ ដោយផ្ទាល់ និងប្រយោលមកលើបញ្ហា សន្តិសុខសណ្តាប់ធ្នាប់ និងការអភិវឌ្ឍសង្គម។ លោកវរៈសេនីយ៏ឯក អ៊ាង ធារិទ្ធ ប្រធានការិយាល័យប្រឆាំង គ្រឿងញៀន នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា ពាក់ព័ន្ធបទល្មើសគ្រឿងញៀន គំហុកចូលក្នុងរាជធានីភ្នំពេញសព្វថ្ងៃមានច្រកសំខាន់ៗចំនួន៣គឺ ច្រកចូលផ្លូវគោកមកពីប្រទេសឡាវ ច្រកព្រលានយន្តហោះ និងតាមរយៈប្រៃសណីយ៍។
លោកបន្តថា ដើម្បីដោះស្រាយបញ្ហាគ្រឿងញៀនឲ្យបានទទួល ជោគជ័យ និងឈានទៅលុបបំបាត់ ម្ចាស់ទីតាំងនៃអាជីវកម្មដ្ឋាន ត្រូវចូលរួមសហការជាមួយសមត្ថកិច្ច បើដឹង បើឃើញ និងឮហើយត្រូវរាយការណ៍ជូនសមត្ថមិច្ចបន្ទាន់។ ក្នុងនោះ ប្រសិនបើម្ចាស់អាជីវកម្មដ្ឋាន មានការលាក់លៀមជាមួយជនល្មើស គឺម្ចាស់ទីតាំងមានទោសស្មើនឹងបទសម្រួល។ សូមបញ្ជាក់ថា៖ បច្ចុប្បន្ន នៅរាជធានីភ្នំពេញ មានអាជីវកម្មដ្ឋានក្នុងវិស័យទេសចរណ៍ទាំងអស់ជាង៥០០ទីតាំង ដែលកំពុងដំណើរការ ប្រកបមុខរបររកស៊ី ហើយមន្ទីរទេសចរណ៍កំពុងណែនាំឲ្យមកធ្វើកិច្ចសន្យានេះ៕
ចែករំលែកព័តមាននេះ