ខេត្តបន្ទាយមានជ័យ ៖ កម្លាំងកងរាជអាវុធហត្ថខេត្តបានបញ្ជូនជនសង្ស័យម្នាក់ទៅសាលាដំបូងខេត្តបន្ទាយមានជ័យ នៅថ្ងៃទី៣១ខែសីហាឆ្នាំ២០១៨នេះ ពីបទលួចមានស្ថានទម្ងន់ទោស ។
ថ្ងៃទី២៩ ខែសីហា ឆ្នាំ២០១៨ នៅចំណុចភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្ក្រាបករណី លួចដោយមានស្ថានទម្ងន់ទោស និងឃាត់ខ្លួនជនសង្ស័យបានចំនួន១នាក់ ។
លោកវរសេនីយ៍ត្រី នួន នីណារ៉ូ បានអោយដឹងថា នៅថ្ងៃទី២៩ ខែសីហា ឆ្នាំ២០១៨ ក្រោយពីបានទទួលពាក្យបណ្តឹងពីឈ្មោះពៅ ធូ ភេទប្រុស អាយុ៣៧ឆ្នាំ បច្ចុប្បន្នរស់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ និងដោយអនុវត្តន៍តាមការណែនាំរបស់លោក មាស ច័ន្ទពិសិដ្ឋ ព្រះរាជអាជ្ញារអមសាលដំបូងខេត្ត បានឃាត់ខ្លួនជនសង្ស័យបានម្នាក់ឈ្មោះ មូល សុធា ភេទប្រុស អាយុ១៨ឆ្នាំ ជនជាតិខ្មែរ បច្ចុប្បន្នស្នាក់នៅភូមិ-សង្កាត់កើតហេតុខាងលើ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានបញ្ជាក់ថា ៖ តាមការបំភ្លឺរបស់ជនរងគ្រោះបានឱ្យដឹងថា នៅថ្ងៃកើតហេតុកាលពីវេលាម៉ោងប្រមាណជា៤ទៀបភ្លឺ ខ្លួនបានភ្ញាក់ពីដំណេក ស្រាប់តែឃើញមានមនុស្សចំនួន៣នាក់ជិះម៉ូតូកង់បីឈប់នៅមុខផ្ទះរបស់ខ្លួន ហើយបានគាស់ជញ្ជាំងផ្ទះបម្រុងចូលលួច ឃើញដូចនេះគាត់បានស្រែកឆោរឡោ បណ្តាលអោយជនសង្ស័យផ្អើលរត់គេចអស់ នៅសល់តែជនសង្ស័យ១នាក់ត្រូវបានសមត្ថកិច្ចកងរាជអាវុធហត្ថនៅក្បែរនោះជួយចាប់បានភ្លាមៗតែម្តង ។
លោកវរសេនីយ៍ឯក ម៉ែន ភិរម្យ បានបញ្ជាក់ទៀតថា៖ក្រោយពីធ្វើការឃាត់ខ្លួន និងសាកសួរចម្លើយ ជនសង្ស័យខាងលើបានសារភាពថា ៖ នៅយប់ថ្ងៃទី២៩ ខែសីហា ឆ្នាំ២០១៨ ខ្លួន និងបក្សពួក២នាក់ទៀត បាននាំគ្នាជិះម៉ូតូកង់បី១គ្រឿង ដើម្បីធ្វើសកម្មភាពគាស់ផ្ទះអ្នកភូមិ ។ ពេលទៅដល់ផ្ទះមួយកន្លែង ក៏ឈប់ម៉ូតូចូលទៅគាស់ជញ្ជាំងផ្ទះបម្រុងចូលលួច ត្រូវម្ចាស់ផ្ទះឃើញទាន់ស្រែកឆោឡោ ខ្លួននិងបក្សពួកភ័យពេកក៏រត់ចេញមកវិញ តែត្រូវគេចាប់បានតែម្តង ។ ជនសង្ស័យបានបន្ថែមទៀតថា ខ្លួនបានប្រព្រឹត្តអំពើលួច និងគាស់ផ្ទះយកអីវ៉ាន់ជាច្រើនលើកមកហើយ ។
ដោយផ្អែកតាមការបង្ក្រាបជាក់ស្តែង និងចម្លើយសារភាពរបស់ជនសង្ស័យ ត្រូវបានកងរាជអាវុធហត្ថខេត្តរៀបចំសំណុំរឿងបញ្ជូនទៅសាលាដំបូង ដើម្បីចាត់ការតាមនីតិវិធីច្បាប់ ។ ចំណែកចំពោះជនសង្ស័យជាបក្ខពួក២នាក់ទៀត កម្លាំងជំនាញកំពុងស្រាវជ្រាវ ដើម្បីចាប់ខ្លួនយកមកផ្តន្ទាទោសទៅតាមច្បាប់ផងដែរ ៕
ចែករំលែកព័តមាននេះ