តើអ្នកជាមនុស្សងាយនឹងឈឺក្បាលណាស់មែនទេ ? មុនពេលអ្នកចាប់ផ្តើមភ័យខ្លាចដោយគិតថា អ្នកអាចមានជំងឺរលាកស្រោមខួរក្បាល ឬដុំសាច់ក្នុងខួរក្បាលនោះ យកល្អគួរតែអានអត្ថបទនេះសិនទៅ ។ អ្នកនឹងដឹងអំពីទម្លាប់ប្រចាំថ្ងៃដែលត្រូវបានអ្នកវិទ្យាសាស្ត្រអះអាងថា ធ្វើឲ្យឈឺក្បាលជាញឹកញាប់ ។…
តើអ្នកជាមនុស្សងាយនឹងឈឺក្បាលណាស់មែនទេ ? មុនពេលអ្នកចាប់ផ្តើមភ័យខ្លាចដោយគិតថា អ្នកអាចមានជំងឺរលាកស្រោមខួរក្បាល ឬដុំសាច់ក្នុងខួរក្បាលនោះ យកល្អគួរតែអានអត្ថបទនេះសិនទៅ ។ អ្នកនឹងដឹងអំពីទម្លាប់ប្រចាំថ្ងៃដែលត្រូវបានអ្នកវិទ្យាសាស្ត្រអះអាងថា ធ្វើឲ្យឈឺក្បាលជាញឹកញាប់ ។ ដូច្នេះនៅពេលដែលដឹងថា អ្នកមានទម្លាប់នេះហើយ យកល្អគួរតែព្យាយាមបញ្ឈប់វាឲ្យបានលឿនតាមតែអាចធ្វើទៅបាន ។
១-ការប្រើប្រាស់កុំព្យូទ័រច្រើនម៉ោង ៖ មិនខ្វល់ថាអ្នកអង្គុយនៅមុខកុំព្យូទ័រច្រើនម៉ោងដោយសារតែធ្វើការ ឬការលេងសប្បាយឡើយ វាគឺជារឿងដែលអាចធ្វើឲ្យអ្នកមានការឈឺក្បាលគ្រប់ពេល ។ អ្នកវិទ្យាសាស្ត្របាននិយាយថា ការប្រើប្រាស់កុំព្យូទ័ររយៈពេលចាប់ពី៥ម៉ោងឡើងទៅ អាចធ្វើឲ្យឈឺក្បាល ដោយសារតែភ្នែកមានសម្ពាធពេក ព្រមទាំងមានសម្ពាធនៅលើសាច់ដុំក និងស្មាផង ។ ដំណោះស្រាយ គឺត្រូវការសម្រាករយៈពេល៥នាទី ។
២-ញ៉ាំទឹកមិនគ្រប់គ្រាន់ ៖ តើអ្នកមានញ៉ាំទឹកបានប្រហែល២លីត្រក្នុងមួយថ្ងៃ និងជារៀងរាល់ថ្ងៃទេ ? បើសិនជាអត់ ហើយអ្នកមានអាការឈឺក្បាលទៀងទាត់ទៀតនោះ វាប្រហែលជារឿងដែលអ្នកត្រូវបន្ទោសហើយ ។ ជាធម្មតាខួរក្បាលមានជាតិទឹកយ៉ាងហោចណាស់៧៥ភាគរយ ។
បើសិនជាអ្នកញ៉ាំទឹកមិនគ្រប់គ្រាន់ក្នុងមួយថ្ងៃទេ ខួរក្បាលអាចនឹងស្វិត និងធ្វើការកាន់តែខ្លាំង ហើយក៏ជាហេតុផលនាំឲ្យឈឺក្បាលដែរ ។ និយាយឲ្យខ្លីទៅគឺថា ការដែលញ៉ាំទឹកបានគ្រប់គ្រាន់ អាចជួយកាត់បន្ថយការឈឺក្បាលបានយ៉ាងល្អ ។
៣-កំពុងតែស្ត្រេស ៖ វាគ្មានអ្វីដែលត្រូវភ្ញាក់ផ្អើលឡើយក្នុងការជួបបញ្ហាឈឺក្បាលដោយសារតែស្ត្រេសខ្លាំង។ គ្រូពេទ្យនិយាយថា ការឈឺក្បាលបែប Tension ជាធម្មតាកើតចេញពីមនុស្សដែលស្ត្រេសច្រើន ។ ការឈឺក្បាលបែប Tension នេះដែរក៏អាចធ្វើឲ្យឈឺចាប់នៅកញ្ចឹងក និងស្មាដែរ ។
ដូច្នេះ ដើម្បីកុំឲ្យមានការឈឺក្បាលបែបនេះ យកល្អគួរតែកាត់បន្ថយភាពស្ត្រេសឲ្យបានច្រើនបំផុតតាមតែអាចធ្វើទៅបាន ។
៤-មានការថប់អារម្មណ៍គ្រប់ពេល ៖ បើសិនជាអ្នកត្រូវបានរកឃើញថា មានជំងឺថប់អារម្មណ៍ខុសធម្មតានោះ វាទំនងជារោគសញ្ញារាងកាយដែលកាន់តែធ្ងន់ហើយក្នុងការឈឺក្បាលខ្លាំងគ្រប់ពេល ។ អ្នកជំនាញខាងសុខភាពផ្លូវចិត្តនិយាយថា ការដែលមិនអាចគ្រប់គ្រងភាពតានតឹងបាន អាចនាំឲ្យមានផលវិបាកច្រើន ហើយវាក៏មិនមែនជារឿងធម្មតាក្នុងជីវិតដែរ ។
៥-គេងមិនបានគ្រប់គ្រាន់ ៖ តើអ្នកចូលចិត្តចូលរួមកម្មវិធីជប់លៀងរាល់យប់ដែរទេ ? តើអ្នកចូលចិត្តចំណាយពេលច្រើនៗម៉ោងលេងបណ្តាញសង្គមដាច់យប់ដែរទេ ? តើអ្នកមានបញ្ហាគេងមិនលក់ដោយសារតែស្ត្រេស ឬថប់អារម្មណ៍ដែរទេ ?
បើសិនជាចម្លើយថា ពិតមែនទាំងអស់នោះ មានន័យថា អ្នកអាចនឹងរងការឈឺក្បាលជាញឹកញាប់ហើយ។ នេះដោយសារតែការគេងមិនបានគ្រប់គ្រាន់។ ចូរប្រាកដថាអ្នកគេងបាន ៧ទៅ៩ម៉ោងក្នុងមួយយប់ (ប្រភពពី៖ Health.com.kh) ៕
ចែករំលែកព័តមាននេះ