រាជធានីភ្នំពេញ ៖ ជនជាតិចិនម្នាក់សង្ស័យស្រវឹង បើករថយន្តឡើងខឿនរង្វង់មូលក្រឡាប់ផ្ងារជើងឡើងលើរងការខូចខាតរថយន្តទាំងស្រុង សំណាងល្អមិនបណ្តាលអោយមានគ្រោះថ្នាក់ដល់អ្នកធ្វើដំណើរណាម្នាក់ឡើយ ។ ហេតុការណ៍នេះបង្កឱ្យមានការភ្ញាក់ផ្អើលកាលវេលាម៉ោង១១និង៥០នាទីយប់ថ្ងៃទី៣០ ខែសីហា ឆ្នាំ២០១៨ នៅចំណុចច្រមុះជ្រូករង្វង់មូលចោមចៅ…
រាជធានីភ្នំពេញ ៖ ជនជាតិចិនម្នាក់សង្ស័យស្រវឹង បើករថយន្តឡើងខឿនរង្វង់មូលក្រឡាប់ផ្ងារជើងឡើងលើរងការខូចខាតរថយន្តទាំងស្រុង សំណាងល្អមិនបណ្តាលអោយមានគ្រោះថ្នាក់ដល់អ្នកធ្វើដំណើរណាម្នាក់ឡើយ ។ ហេតុការណ៍នេះបង្កឱ្យមានការភ្ញាក់ផ្អើលកាលវេលាម៉ោង១១និង៥០នាទីយប់ថ្ងៃទី៣០ ខែសីហា ឆ្នាំ២០១៨ នៅចំណុចច្រមុះជ្រូករង្វង់មូលចោមចៅ ដែលស្ថិតនៅតាមបណ្ដោយផ្លូវសហព័ន្ធរុស្ស៊ី ភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កខាងលើម៉ាកព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២AV-៧១១៤ បើកបរដោយជនជាតិចិនម្នាក់ និងអ្នករួមដំណើរប្រមាណ៣នាក់ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្តជនជាតិចិនខាងលើបើកបរក្នុងស្ថានភាពស្រវឹងបានបើកបរក្នុងទិសដៅពីជើងទៅត្បូងបញ្ច្រាសទិសចរាចរណ៍ ហើយជ្រុលឡើងច្រមុះជ្រូករង្វង់មូលចោមចៅក្រឡាប់ផ្ញារជើងឡើងលើអូសប្រមាណជាង២០ម៉ែត្រ បណ្តាលឲ្យរថយន្តរងការខូចខាតយ៉ាងធ្ងន់ធ្ងរ តែមិនបណ្តាលអោយមានគ្រោះថ្នាក់ដល់អ្នកបើកបរ និងអ្នករួមដំណើរ ឡើយ។
ប្រភពព័ត៌មានបានបន្តទៀតថា បន្ទាប់ពីគ្រោះថ្នាក់បានកើតឡើង ភ្លាមៗនោះអ្នកជិះក្នុងរថយន្តខាងលើបានចុះពីលើរថយន្តរួចឡើងទៅជិះលើរថយន្តមួយគ្រឿងទៀត នៅសល់តែអ្នកបើកបររថយន្តខាងលើតែប៉ុណ្ណោះ បន្ទាប់មកអ្នកបើកបររថយន្តខាងលើនោះបំរុងឡើងជិះរថយន្តមួយគ្រឿងទៀតដែរ តែត្រូវបានសមត្ថកិច្ចឃាត់ខ្លួនដើម្បីសួរនាំ។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យបានធ្វើការវាស់វែង ហើយរថយន្តដែលក្រឡាប់ផ្ងារជើងខាងលើ ត្រូវបានប្រជាជននាំគ្នាជួយលើកមកធម្មតាវិញ បន្ទាប់មកត្រូវបានសមត្ថកិច្ចស្ទូចយករថយន្តខាងលើទៅរក្សាទុកនៅការិយាល័យចរាចរណ៍ផ្លូវខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ