ខេត្តសៀមរាប ៖ នាព្រឹកថ្ងៃទី៣០ ខែសីហា ឆ្នាំ២០១៨ នៅស្រុកប្រាសាទបាគង ត្រូវបានក្រុមអ្នកភូមិ មកពី៥ភូមិ នៃឃុំត្រពាំងធំ បានប្រមូលគ្នាមកកាន់ច្រកចូលទីតាំងចាក់សំរាមដែលស្ថិតនៅ…
ខេត្តសៀមរាប ៖ នាព្រឹកថ្ងៃទី៣០ ខែសីហា ឆ្នាំ២០១៨ នៅស្រុកប្រាសាទបាគង ត្រូវបានក្រុមអ្នកភូមិ មកពី៥ភូមិ នៃឃុំត្រពាំងធំ បានប្រមូលគ្នាមកកាន់ច្រកចូលទីតាំងចាក់សំរាមដែលស្ថិតនៅ ជាប់របងប៉ុស្តិ៍ នគរបាលត្រពាំងធំ ជាលើកទី៣។ ក្នុងនោះពួកគាត់បានយកឈើបង្គោលក្រាក់ធំៗ ទៅបោះចំកណ្តាលផ្លូវ ហើយសរសេរថា ឡានសំរាមហាមចូល។ សូមបញ្ជាក់ផងដែរថា ក្រុមហ៊ុន ហ្គាអ៊ីយ៉ា ភីអិលស៊ី ដែលជាអ្នកម៉ៅការដឹកជញ្ជូនសំរាមចេញពីក្នុងក្រុងសៀមរាប ដែលបានសន្យាខ្យល់ជាមួយក្រុមអ្នកភូមិនៃ ឃុំត្រពាំងធំ ស្រុកប្រាសាទបាគង ខេត្តសៀមរាប រយៈពេល៦ខែរួចមក ដោយពួកគាត់រង់ចាំយូរពេក ទើបនាំគ្នសម្រេចចិត្តលើកគ្នាមកបិទផ្លូវជាថ្មី(លើកទី៣) ក្រោយចុះកិច្ចសន្យារយៈពេល៦ខែថា ប្តូរ ទីតាំងចាក់សំរាម ពីកន្លែងចាស់ទៅកាន់កន្លែងថ្មី តែគ្មានការអនុវត្តដូចកិច្ចសន្យា ដែលនិយាយជាមួយ ពលរដ្ឋទាល់តែសោះ។
តំណាងក្រុមអ្នកភូមិបានលើកឡើងថា អស់រយៈពេលជាង១១ឆ្នាំមកហើយ ដែលពួកគាត់ប្រមាណជា៥ភូមិ ក្នុងឃុំត្រពាំងធំ នៃស្រុកប្រសាទបាគង ដែលរស់នៅរាល់ថ្ងៃ រងការស្រង់ចំហាយក្លិនស្អុយ ពីសំណាក់រណ្តៅសំរាម របស់ក្រុមហ៊ុនហ្កាអ៊ីយា(Gaea) មួយនេះ។ ក្នុងរយៈពេលជាង១១ឆ្នាំមកនេះ មនុស្សប្រុសស្រី កុមារតូចធំទទួលរងផ្ទុកដោយជំងឺផ្លូវដង្ហើម។ ដែលជំងឺនេះពេលទៅដល់ពេទ្យ ហើយក្រុមគ្រូពេទ្យដឹងថា អ្នកជំងឺមកពីឃុំត្រពាំងធំ គឺតម្រូវឲ្យដាក់បន្ទប់ផ្សេងព្រោះកើតចេញពីសំរាម។
លោក ឡឹង ម៉ុន អាយុ៥២ឆ្នាំ ដែលជាពលរដ្ឋមក ពីភូមិអន្លង់២ ឃុំត្រពាំងធំ បានបញ្ជាក់ថា ដោយសារក្លិនស្អុយជាច្រើនឆ្នាំមកនេះ ពួកគាត់បានមក បិទផ្លូវម្តងហើយ កាលពីថ្ងៃទី៥ ខែកុម្ភៈ ឆ្នាំ២០១៨កន្លងទៅ ដើម្បីសុំឱ្យមានការប្តូរទីតាំងចាក់សំរាម ចេញពីទីកន្លែងនេះ។ លោកបានបញ្ជាក់បន្ថែមថា រហូតមកដល់ព្រឹកថ្ងៃទី៣០ ខែសីហា ឆ្នាំ២០១៨នេះ នៅតែមិនផ្លាស់ប្តូរទៀត ទើបពួកគាត់នាំគ្នាយករបងក្រាក់មកបិទសារជាថ្មី ដើម្បីឱ្យអាជ្ញាធរខេត្ត ក៏ដូចជាស្រុកជួយដោះស្រាយផងដែរ។
ខណៈនោះដែរឡានដឹកសំរាមដែលដឹកចេញពីក្នុងក្រុងសៀមរាប មកចាក់នៅទីលានសំរាម ប៉ុន្តែដោយសារចូលមិនរួចទើបពួកគេចតទុកនៅស្ងៀម តាមបណ្តោយផ្លូវជាតិ លេខ៦ ដោយរង់ចាំការដោះស្រាយពីម្ចាស់ក្រុមហ៊ុន និងប្រជាពលរដ្ឋសិន ទើបនាំគ្នាបើកចូលទៅចាក់រួច ត្រឡប់មកដឹកចេញក្នុងក្រុងវិញ។ ក្នុងការបិទផ្លូវនោះដែរគេឃើញមានវត្តមានលោក សូរ ប្លាតុង អភិបាលក្រុងសៀមរាប, លោក ម៉ក់ សំភា អភិបាលស្រុកប្រសាទបាគង, លោក នួន មុន្នី ប្រធានមន្ទីរបរិស្ថានខេត្ត ,លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង និង លោក សយ សីហា មេឃុំត្រពាំងធំ បានហៅក្រុមអ្នកភូមិទាំងអស់នោះមកប្រជុំ នៅមុខស្នាក់ការ ប៉ុស្តិ៍នគរបាលត្រពាំងធំ ដើម្បីចរចាគ្នារកដំណោះស្រាយចេញ។
ឆ្លងកាត់ការប្រជុំដោះស្រាយជាមួយបងប្អូនប្រជាពលរដ្ឋ មកពី៥ភូមិ ក្នុងឃុំត្រពាំងធំ អស់ជាច្រើនម៉ោង មក ក្នុងនោះពុំឃើញមានវត្តមានតំណាងក្រុមហ៊ុន(Gaea)ចូលរួមទេ។ លោក សូរ ប្លាតុង អភិបាលក្រុងសៀមរាប បានប្រាប់តាមទូរស័ព្ទនៅរសៀលថ្ងៃទី៣០ ខែសីហានេះថា អាជ្ញាធរដែលចូលរួមដោះស្រាយនាថ្ងៃព្រឹកនោះ គឺបានយល់ព្រមគ្នាជាមួយប្រជាពលរដ្ឋហើយ ប៉ុន្តែ ដោយពុំមានវត្តមានខាងតំណាង ក្រុមហ៊ុន(Gaea) ដូច្នេះលោកបានព្យាយាមសុំពន្យាពេល ជាមួយបងប្អូន ក្នុងការដោះស្រាយប្តូរទីតាំងចាក់សំរាមនេះសិន។ ក្នុងជួបពិភាក្សាគ្នានេះ លោក អភិបាលក្រុង បានលើកឡើងនៅចំណុចសំខាន់ៗចំនួន២គឺ៖
ទី១-ខាងអាជ្ញាធរយើង បានធ្វើការសម្របសម្រួលជាមួយពួកគាត់រួចរាល់អស់ហើយ ដូច្នេះពួកគាត់បានយល់ព្រមព្រៀង បើកផ្លូវឱ្យឡានដឹកសំរាមចូលទៅចាក់នៅទីលានសំរាមដូចធម្មតា។ ទី២-យើងសុំយោបល់ពីថ្នាក់ដឹកនាំ ខេត្ត ដើម្បីឱ្យតំណាងប្រជាពលរដ្ឋទាំង៥ភូមិ និងតំណាងក្រុមហ៊ុនចូលជួបគ្នារកដំណោះស្រាយ ជួនពួកគាត់បន្តទៀត ជាមួយថ្នាក់ដឹកនាំខេត្ត ដើម្បីរកផ្លូវចេញបើពុំធ្វើដូច្នេះទេ សំរាមក្នុងក្រុងពិតជា គរដូចភ្នំទៀតហើយ។ ទោះជាដំណោះស្រាយយ៉ាងណាក៏ដោយក៏ក្រុមអ្នកភូមិនៅតែប្រកាន់ជំហរ ជាប់ជានិច្ចថា មិនទទួលនោះឡើយ ដោយបញ្ជាក់ថា ឡានសំរាមទាំងឡាយដែលមកចាក់នៅទីនេះ ត្រូវតែចតលើចិញ្ចើមផ្លូវរហូតទៅ បើគ្មានដំណោះស្រាយណាមួយពីថ្នាក់ដឹកនាំនោះទេ៕
ចែករំលែកព័តមាននេះ