រាជធានីភ្នំពេញ ៖ បុរសម្នាក់បានសុំម្ចាស់គេដើម្បីជិះម៉ូតូសាក ព្រោះបំរុងទិញម៉ូតូនោះ តែពេលជិះម៉ូតូសាកបានយកទៅបាត់ ហើយម្ចាស់ម៉ូតូបានតាមរកឃើញបុរសម្នាក់នោះកំពុងបណ្តើរម៉ូតូ រួចប្តឹងមកសមត្ថកិច្ចឱ្យឃាត់ខ្លួនដើម្បីយកទៅសួរនាំ និងធ្វើការអប់រំ កាលពីវេលាម៉ោង៥ល្ងាចថ្ងៃទី២៩ ខែសីហា ឆ្នាំ២០១៨ នៅភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។
បុរសខាងលើឈ្មោះ ទ្រី ផល្លា ភេទប្រុស អាយុ៣៣ឆ្នាំ មុខរបរមិនពិតប្រាកដ ស្នាក់នៅភូមិផ្ទះជួលភូមិ ថ្មគោល១ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅឃុំក្តឿងរាយ ស្រុកកញ្ជៀច ខេត្តព្រៃវែង។
តាមប្រភពព័ត៌មានពីបុគ្គលិករបស់ម្ចាស់ម៉ូតូបាននិយាយថា នៅមុនពេលកើតហេតុ ពួកគាត់ឃើញបុរសខាងលើមកសុំជិះសាកម៉ូតូ ព្រោះបំរុងទិញម៉ូតូធំមួយគ្រឿងម៉ាកស៊ីប៊ី ហៅខូហ្វេ ក្នុងតំលៃ១៥០០ដុល្លារហើយម្ចាស់ម៉ូតូបានបញ្ចុះតំលៃចំនួន២០ដុល្លារ បន្ទាប់មកបុរសខាងលើសុំជិះម៉ូតូសាកបន្តិច ហើយម្ចាស់ម៉ូតូខាងលើក៏បានឱ្យជិះសាក។
ប្រភពព័ត៌មានបានបន្តទៀតថា ពេលបុរសនោះជិះម៉ូតូសាក ភ្លាមៗនោះម្ចាស់ម៉ូតូបានឱ្យបុគ្គលិករបស់ខ្លួនជិះម៉ូតូតាម ព្រោះដោយមានការសង្ស័យ ហើយបន្ទាប់មកបុរសខាងលើបានជិះម៉ូតូបញ្ច្រាសផ្លូវចេញពីកន្លែងលក់ម៉ូតូ បើកតាមផ្លូវកាច់កុងជាច្រើនផ្លូវ ស្រាប់តែឃើញបុរសខាងលើជិះម៉ូតូយកទៅលាង ហើយបុគ្គលិកលក់ម៉ូតូបានជិះតាមរហូតដោយមិនឱ្យបុរសខាងលើដឹងឡើយ។ លុះពេលលាងម៉ូតូរួចហើយ ម៉ូតូនោះអត់ដំណើរការ បុរសខាងលើបានបណ្តើរម៉ូតូចេញទៅ តែមិនបណ្តើរម៉ូតូនោះយកទៅកន្លែងលក់ម៉ូតូឡើយ បែរជាបណ្តើរទៅរឹតតែឆ្ងាយទាំងមេឃកំពុងតែភ្លៀង ដោយធ្វើឲ្យមានការសង្ស័យ ម្ចាស់ម៉ូតូក៏បានប្ដឹងសមត្ថកិច្ចឲ្យជួយអន្តរាគមន៍ និងឃាត់ខ្លួនបុរសខាងលើដើម្បីឆែកឆេរ តែមិនឃើញមានលុយសោះ ទាំងខ្លួនរកទិញម៉ូតូគេក្នុងតម្លៃរាប់ពាន់ដុល្លារ ។
តាមចម្លើយសារភាពរបស់បុរសខាងលើបាននិយាយថា ខ្លួនមិនមានបំណងចង់យកម៉ូតូនោះឡើយ គ្រាន់តែយកម៉ូតូទៅឲ្យម្តាយរបស់ខ្លួនមើលសិនតែប៉ុណ្ណោះ។
សមត្ថកិច្ចនគរបាលប៉ុស្តិ៍ចោមចៅ១បាននិយាយថា ពេលសមត្ថកិច្ចរកឃើញ ស្រាប់តែបុរសខាងលើនោះមានពាក់កាតទូរទស្សន៍ហង្សមាស ហើយបានអះអាងថា ខ្លួនជាអ្នកសារព័ត៌មានទូរទស្សន៍ហង្សមាសតាមបណ្ដាខេត្តនានា បន្ទាប់មកសមត្ថកិច្ចបានឆែកមើលកាតព័ត៌មានខាងលើ គឺហួសសុពលភាព ដែលផុតកំណត់តាំងពីឆ្នាំ២០១៧មកម៉្លេះ។
ក្រោយពេលកើតហេតុ ម្ចាស់ម៉ូតូមិនបានដាក់ពាក្យបណ្ដឹងនោះឡើយដោយឲ្យសមត្ថកិច្ចធ្វើការអប់រំបន្ទាប់មកសមត្ថកិច្ចបានឲ្យបុរសខាងលើមានអ្នកតំណាងមកធានានិងឲ្យត្រឡប់ទៅវិញភ្លាមៗផងដែរ ៕
ចែករំលែកព័តមាននេះ