តុលាការនឹងប្រកាសលទ្ធផលពីការសួរនាំលោក កឹម សុខា នៅម៉ោង២រសៀលនេះ
- ត្បូងឃ្មុំ
ខេត្តត្បូងឃ្មុំ ៖ តុលាការនឹងប្រកាសលទ្ធផលសួរនាំ លោក កឹម សុខា នៅក្រៅឃុំ ឬបន្តជាប់ពន្ធនាគារនៅម៉ោង២រសៀលនេះ ។ នេះបើតាមមេធាវីលោក…
ខេត្តត្បូងឃ្មុំ ៖ តុលាការនឹងប្រកាសលទ្ធផលសួរនាំ លោក កឹម សុខា នៅក្រៅឃុំ ឬបន្តជាប់ពន្ធនាគារនៅម៉ោង២រសៀលនេះ ។ នេះបើតាមមេធាវីលោក…
ខេត្តត្បូងឃ្មុំ ៖ តុលាការនឹងប្រកាសលទ្ធផលសួរនាំ លោក កឹម សុខា នៅក្រៅឃុំ ឬបន្តជាប់ពន្ធនាគារនៅម៉ោង២រសៀលនេះ ។ នេះបើតាមមេធាវីលោក កឹម សុខា អ្នកស្រី ម៉េង សុធាវី លោកផែង ហេង ប្រាប់ក្រុមអ្នកសារព័ត៌មានមុននេះបន្តិច ។
ការប្រកាសលទ្ធផលនេះ បន្ទាប់ពីលោកគី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញបានចុះទៅសួរនាំ លោក កឹម សុខា អតីតប្រធានគណបក្សសង្គ្រោះជាតិ នៅពន្ធនាគារត្រពាំងផ្លុង អស់រយៈពេលមួយព្រឹកពេញ នៅថ្ងៃទី៣០ សីហានេះ ។ ចៅក្រមស៊ើបសួរសាលាដំបូងរាជធានីភ្នំពេញនឹងបន្តនីតិវិធីសួរចម្លើយលោក កឹម សុខា អតីតប្រធាននៃអតីតគណបក្សសង្គ្រោះជាតិម្តងទៀត ក្នុងនីតិវិធីស្តីពីការពន្យារពេលឃុំខ្លួនបណ្ដោះអាសន្ន ។
លោក គី ឫទ្ធី ចៅក្រមស៊ើបសួ រសាលាដំបូងរាជធានីភ្នំពេញទៅសួរនាំ ដើម្បីបន្តនីតិវិធីស្តីពីការឃុំខ្លួនបណ្ដោះអាសន្នដែលធ្វើឡើងនៅមណ្ឌលអប់រំកែប្រែទី៣ នៃខេត្តត្បូងឃ្មុំ ជាទីដែលលោក កឹម សុខា កំពុងជាប់ឃុំ ។ លោក ផែង ហេង មេធាវីការពារក្តីរូបនេះឲ្យដឹងថា ក្នុងសវនាការសួរនាំកូនក្តីលោកបាន សម្តែងក្តីព្រួយបារម្ភចំពោះការឃុំខ្លួន ហើយកូនក្តីលោកបានធានាថា និងចូលរួមគ្រប់នីតិវិធីរបស់តុលាការ ។
តាមរយៈមេធាវីលោក កឹម សុខាបានប្រាប់ចៅក្រមស៊ើបសួរថា លោកគ្មានគំនិតធ្វើអំពើហិង្សារ ព្រោះលោកជាអ្នកសន្តិភាពនិយមម្នាក់ ក្នុងវិស័យព្រះធម៌អា ។ នេះជាហេតុផលដែលយើងលើកសំអាងដែលខ្ញុំលើកក្នុងសវនាការ ដើម្បីសុំឲ្យគាត់រួចផុតពីការឃុំខ្លូនបណ្តោះអាសន្ន ។ លោកបញ្ជាក់ថា«ម៉ោង២រសៀលនេះចៅក្រមនឹងប្រកាសលទ្ធផលពីការពន្យាពេលឃុំខ្លួន ឬបន្តឃុំខ្លួន» ។
សូមបញ្ជាក់ថា ក្រោយបញ្ចប់ការសួរដេញដោល តុលាការកំពូលនៅវេលាថ្ងៃត្រង់ទី២២ ខែសីហា កន្លងមកតុលាការកំពូលសម្រេចមិនដោះលែងលោក កឹម សុខា អតីតប្រធាននៃអតីតគណបក្សសង្គ្រោះជាតិ ទេ ដោយបន្តឃុំខ្លួនក្នុងពន្ធនាគារដដែល ។ នេះបើតាមការបញ្ជាក់របស់លោក អ៊ុក គឹមសិទ្ធិ អគ្គព្រះរាជអាជ្ញារងនៃមហាអយ្យការអមតុលាការកំពូល និងជាអ្នកនាំពាក្យផងដែរ ។
លោក កឹម សុខា ត្រូវបានចោទប្រកាន់ពីបទ សន្ធិដ្ឋិភាពជាមួយបរទេសតាមមាត្រា៤៤៣ នៃក្រមព្រហ្មទណ្ឌ ។ បទសន្ធិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា ។ បទល្មើសនេះ អាចនឹងត្រូវជាប់ពន្ធនាគារពី១៥ឆ្នាំ ដល់៣០ឆ្នាំ ៕
ចែករំលែកព័តមាននេះ