ខេត្តតាកែវ ៖ ជនសង្ស័យជួញដូរគ្រឿងញៀនចំនួន៤នាក់ ត្រូវបានប៉ូលិសស្រុកគីរីវង់បានធ្វើការឃាត់ខ្លួន បានជាបន្តបន្ទាប់រួចកសាងសំណុំរឿងបញ្ជូនខ្លួននឹងវត្ថុតាងមកកាន់ការិយាល័យប្រឆាំងការជួញដូគ្រឿងញៀនខេត្តដើម្បីចាត់ការបន្ត។ ខណៈពេលដែលក្រុមជនសង្ស័យបានធ្វើសកម្មភាពលក់ និងចែកចាយ គ្រឿងញៀនយ៉ាងសកម្មនៅក្នុងមូលដ្ឋានដោយមិនបានញញើតច្បាប់ឡើយ ហើយត្រូវបានសមត្ថកិច្ច ចុះចាប់ខ្លួនបាននៅថ្ងៃច័ន្ទ១រោច ខែស្រាពណ៍ សំរិទ្ធិស័ក ព.ស២៥៦២ ត្រូវនឹងថ្ងៃទី២៧ ខែសីហា ឆ្នាំ២០១៨នេះ។
លោកវរៈសេនីយ៍ឯក យុគ សារ៉ាត់ អធិការនគរបាលស្រុកគីរីវង់ បានឲ្យដឹងថា ការចុះបង្ក្រាបករណីជួញដូរ ចែកចាយសារធាតុញៀននេះ ក្រោមការចង្អុលបង្ហាញពីលោក ឧត្តមសេនីយ៍ទោ សុខ សំណាង ស្នងការនគរបាលខេត្តនោះ យើងបានចុះបើកការបង្ក្រាបនៅចំណុច ខាងក្រោយជុំមិត្តស្ថិតនៅភូមិពោខ្វិត ឃុំព្រះបាទជាន់ជុំ នៅវេលាម៉ោង៨ និង៣៥នាទីព្រឹក បានឃាត់ខ្លួនជនសង្ស័យឈ្មោះ តឹប តែមសុផាត ភេទប្រុស អាយុ៣០ឆ្នាំ រស់នៅភូមិជ្រោយស្លែង ឃុំគីរីចុងកោះ និងឈ្មោះ អ៊ុក វឿន ភេទប្រុស អាយុ២០ឆ្នាំ នៅចំណុចភោជនីយដ្ឋានខ្យងចំហុយ ក្នុងភូមិពោធិខ្វិត ឃុំព្រះបាទជាន់ជុំ ដោយបានដកហូតវត្ថុតាងបានម៉ាទឹកកក៣កញ្ចប់តូច ម៉ូតូកញ្ចាស់១គ្រឿង។
ហើយជនសង្ស័យទី៣ចាប់ខ្លួនបាននៅតូបលក់ដូរ ជិតវត្តភ្ងាស ស្ថិតក្នុងភូមិភ្ងាស ឃុំអង្គប្រាសាទ ស្រុកគិរីវង់ ខេត្តតាកែវ នៅវេលាម៉ោង១ និង០៦នាទីរសៀល កម្លាំងជំនាញឃាត់ខ្លួនបាន ជនសង្ស័យម្នាក់ឈ្មោះ សួស ចាន់ធឿន (ហៅអាជ្រូក) ភេទប្រុស អាយុ១៩ឆ្នាំ ទីលំនៅភូមិកោះកុសល ឃុំរាមអណ្ដើក ស្រុកគិរីវង់ ខេត្តតាកែវ។ ចំពោះវត្ថុតាងដែលត្រូវដកហូតបាននោះមានម្សៅក្រាមថ្លា ពណ៌ស ចំនួន១កញ្ចប់(ធំ) និង២កញ្ចប់(តូច) ហើយម៉ូតូ សេ១២៥ ចាស់០១គ្រឿង ពណ៌ខ្មៅ ពាក់ស្លាកលេខ ភ្នំពេញ BH-7170។
ចំណែកឯជនសង្ស័យទី៤ យើងបានឃាត់ខ្លួនបានកាលពីថ្ងៃទី២៦ សីហា ២០១៨ វេលាម៉ោង៤ និង២៥នាទីល្ងាច ក្នុងភូមិពោធិខ្វិត ឃុំព្រះបាទជាន់ជុំ ដែលជនសង្ស័យ មានឈ្មោះ អុ ង សីហា ហៅហ ភេទប្រុស អាយុ២៩ឆ្នាំ រស់នៅភូមិជ្រោយស្លែង ឃុំគីរីចុងកោះ ដោយធ្វើការដកហូតម៉ាទឹកកកបាន៧កញ្ចប់តូច ទូរស័ព្ទកញ្ចាស់១គ្រឿង កាបូបដៃសម្រាប់ដាក់លុយ១។ លោកអធិការនគរបាលស្រុកបានបន្តទៀតថា ក្រុមរកស៊ីជួញដូរគ្រឿងញៀននេះ មានម្នាក់ឈ្មោះ សួស ចាន់ធឿន ត្រូវកម្លាំងយើងបានចាប់ខ្លួនបញ្ជូនទៅតុលាការជាប់គុកបានជាង១ឆ្នាំ បានរួចខ្លួនមកវិញ រកស៊ីដដែល ហើយក៏ជាជើងខ្លាំងមិនញញើតនឹងសមត្ថកិច្ចយើងឡើយ។
នៅចំពោះមុខប៉ូលិសពួកគេបានប្រាប់ថា ពួកគេពិតជាបានរកស៊ីលក់ដូរគ្រឿងញៀនពិតប្រាកដមែន។ ហើយនៅពេលនេះក្រុមជនសង្ស័យរួមជាមួយវត្ថុតាង ត្រូវបានបញ្ជូនមកដល់ការិយាល័យប្រឆាំងការជួញដូរគ្រឿងញៀនខេត្តហើយ និងបានកសាងសំណុំរឿងដើម្បីបញ្ជូនជនសង្ស័យ និងវត្ថុងតាងទៅកាន់សាលាដំបូងខេត្តនៅថ្ងៃទី២៨ សីហា ២០១៨ ស្អែកនេះ៕
ចែករំលែកព័តមាននេះ