ផ្លូវថ្នល់គឺធ្វើដោយការយកចិត្តទុកដាក់រួមផ្សំ ដោយគំនិតបច្ចេកទេសនៃវិស្វករ ក្នុងការស្ថាបនា ដើម្បីឱ្យត្រូវនឹងស្តង់ដាសាកលនិងទំនើប ហើយផ្លូវថ្នល់នេះគឺជាពហុបំណងរបស់ប្រមុខរាជរដ្ឋាភិបាលដែលចង់ឱ្យមានច្រើន ដើម្បីសម្រួលដល់ចរាចរណ៍ និងបានជាមធ្យោបាយដឹកជញ្ជូនសម្ភារគ្រប់ប្រភេទ និងផលិតផលកសិកម្មគ្រប់មុខ ក្នុងការធ្វើអាជីវកម្មនិងពាណិជ្ជកម្ម ។…
ផ្លូវថ្នល់គឺធ្វើដោយការយកចិត្តទុកដាក់រួមផ្សំ ដោយគំនិតបច្ចេកទេសនៃវិស្វករ ក្នុងការស្ថាបនា ដើម្បីឱ្យត្រូវនឹងស្តង់ដាសាកលនិងទំនើប ហើយផ្លូវថ្នល់នេះគឺជាពហុបំណងរបស់ប្រមុខរាជរដ្ឋាភិបាលដែលចង់ឱ្យមានច្រើន ដើម្បីសម្រួលដល់ចរាចរណ៍ និងបានជាមធ្យោបាយដឹកជញ្ជូនសម្ភារគ្រប់ប្រភេទ និងផលិតផលកសិកម្មគ្រប់មុខ ក្នុងការធ្វើអាជីវកម្មនិងពាណិជ្ជកម្ម ។
ឯភ្លៀងគឺជាតំណក់ទឹកពីធម្មជាតិ ដែលធ្លាក់ពីលើមេឃ តាមរដូវកាលដោយជួយប្រោះព្រំឱ្យធម្មជាតិរុក្ខជាតិទាំងឡាយទទួលបាន សារជាតិត្រជាក់ ជួលជីវិតសត្វលោកទាំងឡាយដែលរស់នៅលើភពផែនដី ។ ឯផ្ទាំងពពកទឹកដ៏ធំមហិមា បែកខ្ចាយកាលណា បរិមាណផ្ទាំងទឹកកកនោះបោកប៉ះនឹងភ្នំខ្យល់ដ៏រឹង ក៏ក្លាយទៅជាទឹកដែលហៅថាទឹកភ្លៀងធ្លាក់លើផែនដីហើយហូរតាមចង្អូរប្រឡាយចូលស្ទឹងបឹងទន្លេ រហូតដល់សមុទ្រ ។
ដោយយោងលើបញ្ហាពិពណ៌នាបែបខាងលើនេះ មតិមហាជនមានការងឿងឆ្ងល់ចំពោះប្រសាសន៍នៃមន្ត្រី សាធារណការម្នាក់នៅខេត្តកំពត ដែលលើកឡើងថា ផ្លូវក្នុងក្រុងដែលខូចខាតពិបាកធ្វើចរាចរណ៍រាល់ថ្ងៃនេះ គឺដោយសារតែរដូវនេះជារដូវភ្លៀងធ្លាក់ ។ឮបែបនេះមហាជនគិតថា ផ្លូវត្រូវខូចដោយសារភ្លៀង ។
នេះជាសម្តីនៃមន្ត្រីដែលទទួលបន្ទុក ស្ថាបនាផ្លូវស្ពានធ្វើឱ្យមជ្ឈដ្ឋានទូទៅ បានសើចចំអកកាលបើឮបែបនេះព្រោះថាផ្លូវក្រាលកៅស៊ូដែលទទួលទ្រទម្ងន់រថយន្តដឹកបានជាច្រើនតោន តាមលក្ខណៈសមរម្យ គឺមិនអាចខូចក្រហេងក្រហូងដោយសារគ្រាប់ភ្លៀងស្រក់រាយដេរដាសនោះសោះឡើយ ។ ដោយហេតុថា ផ្លូវដែលធ្វើគឺមានអ្នកបច្ចេកទេសរៀបគម្រោងត្រឹមត្រូវតាមលក្ខណៈស្តង់ដា អាចទប់ទល់នឹងទម្ងន់ដែលធ្វើចរាចរណ៍ប្រចាំថ្ងៃ ។ មានន័យថាផ្លូវមិនអាចខូចដោយធម្មជាតិត្រឹមតែគ្រាប់ភ្លៀងស្រក់លើ ទឹកហូរកាត់ក្នុងក្រុងនេះទេ ។
នេះជាការឆ្លើយដោយមិនមានការទទួលខុសត្រូវក្នុងបែបផែនវិស្វកម្ម…ព្រោះតែមានគំនិតអវិជ្ជមាន បង្វែងដានពីស្តង់ដាស្ថាបនា ធ្វើឱ្យមានការសង្ស័យកេងយកប្រយោជន៍ណាមួយព្រោះរដូវភ្លៀងមិនមែនមានតែនៅខេត្តកំពតមួយកន្លែងនោះទេ គឺមានគ្រប់ទីកន្លែងរាយប៉ាយលើផ្ទៃប្រទេស ចុះហេតុអ្វីក៏ផ្លូវក្នុងខេត្តដ៏ទៃមិនរងការខូចខាតដូច ។
ដូច្នេះមហាជនយល់ថា ប្រតិបត្តិការនៃការស្ថាបនាផ្លូវនៅទីរួមខេត្តកំពត គឺធ្វើមិនបានត្រូវស្តង់ដានៃវិស្វកម្មនោះឡើយ ។ ព្រោះការធ្វើដោយមានកង្វះបរិមាណធាតុផ្សំក្នុងការងារ ទើបនាំឱ្យការស្ថាបនាផ្លូវមិនត្រូវតាមស្តង់ដាបង្កើតឱ្យមានបញ្ហាខ្វះគុណភាព ។ដូចដែលដឹងហើយថា នៅប្រទេសគេខ្លះ មិនត្រឹមតែមានភ្លៀងទេ គឺមានទាំងធ្លាក់ព្រិលនិងធ្លាក់ទឹកកកសក្បុសលើផ្លូវទៀតផង ចុះហេតុម្តេចក៏ផ្លូវគេមិនងាយខូចរបៀបនេះ ?
លោកមន្ត្រីសាធារណការខេត្តខាងលើនេះគួរពិចារណា ហើយលើកការវិភាគឱ្យសមហេតុផល ដើម្បីកុំឱ្យមតិមហាជនលើកថា បានធ្វើខុស មិនត្រូវសោះចំពោះទម្រង់ការវិស្វកម្ម ព្រោះថាភ្លៀងមិនមែនជាកត្តា បង្កើតឱ្យមានភាពអវិជ្ជមាននៃការអភិវឌ្ឍផ្នែកស្ថាបនាផ្លូវថ្នល់ និងសំណង់ផ្សេងៗនោះឡើយ ។
តទៅពេលខាងមុខទៀត អាណត្តិថ្មីនៃរាជរដ្ឋាភិបាលនឹងមានទិសដៅស្ថាបនាផ្លូវថ្នល់ជាច្រើនខ្សែ ដើម្បីបម្រើការដឹងជញ្ជូនចរាចរណ៍ទំនិញផ្សេងៗ ក្នុងស្រុក ហើយបើផ្តោតទៅលើការស្ថាបនាផ្លូវរបៀបមានលក្ខណៈបច្ចេកទេសដែលខ្វះស្តង់ដាជាប់រឹងមាំ បែរជាទម្លាក់កំហុសទៅលើទឹកនោមពីលើមេឃទៅវិញប្រាកដនាំឱ្យខ្មាសខ្មោច ។
អស់លោកដែលមានភារកិច្ចពាក់ព័ន្ធនឹងការស្ថាបនាផ្លូវជាតិ ផ្លូវក្រុង កុំមានគំនិតធ្វើហាក់ដូចជាមហាជនមិនបានយល់ដឹងឱ្យសោះ ចំពោះការស្ថាបនារបៀប «ឆ្នាំងធំបន្លំដកសាច់ទុកហើយដាក់ទឹកច្រើន» ៕
ដោយ នុត កវី
ចែករំលែកព័តមាននេះ