ខេត្តកំពង់ស្ពឺ ៖ យ៉ាងហោចណាស់ក្មេងប្រុសម្នាក់ក្នុងចំណោម៤នាក់បានស្លាប់បាត់បង់ជីវិតគួរឱ្យអាសូរ បន្ទាប់ពីពួកគេទៅឃ្វាលគោហើយរើសយកគ្រាប់ M79 ទៅលេង ទើបជួបហេតុការណ៍អាក្រក់បែបនេះ។ ហេតុការណ៍នេះកើតឡើងកាលពីម៉ោង៣និង៣០នាទីរសៀល ថ្ងៃទី២៦ ខែសីហា…
ខេត្តកំពង់ស្ពឺ ៖ យ៉ាងហោចណាស់ក្មេងប្រុសម្នាក់ក្នុងចំណោម៤នាក់បានស្លាប់បាត់បង់ជីវិតគួរឱ្យអាសូរ បន្ទាប់ពីពួកគេទៅឃ្វាលគោហើយរើសយកគ្រាប់ M79 ទៅលេង ទើបជួបហេតុការណ៍អាក្រក់បែបនេះ។ ហេតុការណ៍នេះកើតឡើងកាលពីម៉ោង៣និង៣០នាទីរសៀល ថ្ងៃទី២៦ ខែសីហា ឆ្នាំ២០១៨ នៅចំណុចបរិវេណបន្ទាយ A.C.O ស្ថិតក្នុងភូមិក្អែកពង ឃុំតាំងស្យា ស្រុកភ្នំស្រួច ។
ប្រភពពីមន្ត្រីកងរាជអាវុធហត្ថបានឱ្យដឹងថា ក្មេងប្រុសរងគ្រោះខាងលើ ១-ឈ្មោះ ងោល តាំងហេង ភេទប្រុស អាយុ១០ឆ្នាំ មានទីលំនៅភូមិ-ឃុំកើតហេតុ បណ្តាលឱ្យស្លាប់នៅកន្លែងកើតហេតុ ២-ឈ្មោះ សូន រ័ត្ន ភេទប្រុស អាយុ១២ឆ្នាំ មានទីលំនៅជាមួយគ្នា (រងរបួសធ្ងន់) ៣-ឈ្មោះ យ៉ែម ខ្មៅ ភេទប្រុស អាយ៦ឆ្នាំ មានទីលំនៅជាមួយគ្នា (រងរបួសធ្ងន់) និង៤-ឈ្មោះ យ៉ែម ស្វិត ភេទប្រុស អាយុ៩ឆ្នាំ មានទីលំនៅជាមួយគ្នា (រងរបួសធ្ងន់)។
ប្រភពដដែលឱ្យដឹងទៀតថា មុនពេលកើតហេតុមានក្មេងៗទៅឃ្វាលគោចំនួន៤នាក់ ហើយក៏បាននាំគ្នាយកគ្រាប់ M79 ទៅដំលេងដោយបោក ស្រាប់តែផ្ទុះលាន់ដូចរន្ទះ បណ្តាលឱ្យក្មេងប្រុសម្នាក់ស្លាប់ភ្លាមៗនៅនឹងកន្លែងកើតហេតុគួរឱ្យអាសូរ ចំណែកក្មេងៗ៣នាក់ទៀតបានរងរបួសធ្ងន់ ហើយត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តភ្លាមៗផងដែរ។
ក្រោយពេលកើតហេតុសមត្ថកិច្ចបានចុះធ្វើកំណត់ហេតុ ហើយចំពោះសពក្មេងរងគ្រោះបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី រីឯជនរងគ្រោះ៣នាក់ទៀតត្រូវក្រុមគ្រួសារដឹកបញ្ជូនទៅមន្ទីរពេទ្យបង្អែកខេត្ត ដើម្បីសង្គ្រោះផងដែរ៕
ចែករំលែកព័តមាននេះ