រាជធានីភ្នំពេញ ៖ ជនសង្ស័យ២នាក់ត្រូវបានកម្លាំងនគរបាលប៉ុស្តិ៍ចោមចៅ៣ ធ្វើការឃាត់ខ្លួនបានក្រោយពេលចូលទៅធ្វើសកម្មភាពគាស់បន្ទប់ផ្ទះជួលមួយកន្លែងលួចយកទូរស៍ព្ទដៃ និងលុយ ហើយត្រូវម្ចាស់បន្ទប់បានប្ដឹងមកនគរបាលឱ្យជួយអន្តរាគមន៍ឃាត់ខ្លួនបានជាបន្តបន្ទាប់រួចនាំយកទៅសាកសួរនៅប៉ុស្តិ៍ដើម្បីចាត់ការតាមច្បាប់។
ការចាប់ខ្លួនជនសង្ស័យទាំង២នាក់ខាងលើនោះបានធ្វើឡើងកាលពីវេលាម៉ោង៨ព្រឹកថ្ងៃទី២៦ ខែសីហា ឆ្នាំ២០១៨ នៅចំណុចផ្ទះជួលស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យទាំង២នាក់ខាងលើ ម្នាក់ឈ្មោះគឹម បូរិន្ទ ភេទប្រុស អាយុ២៨ឆ្នាំ និងម្នាក់ទៀតឈ្មោះផាន ពិសិដ្ឋ ភេទប្រុស អាយុ១៨ឆ្នាំ ។ ជនសង្ស័យទាំង២នាក់នេះស្នាក់នៅបន្ទប់ផ្ទះជួលដែលជាកន្លែងកើតហេតុខាងលើនោះដែរ ។ ក្នុងការចុះឃាត់ខ្លួន នគរបាលបានដកហូតបានដែកសម្រាប់ឆ្កឹះសោចំនួន៥ កូនសោចំនួន៣ មេសោចំនួន៣ សំបកកញ្ចប់ថ្នាំញៀន និងកាបូបដៃផងដែរ ។ ចំណែកម្ចាស់បន្ទប់ខាងលើឈ្មោះ
ឆេង សង្ហារ ភេទប្រុស អាយុ២៦ឆ្នាំ ហើយសម្ភារៈដែលត្រូវជនសង្ស័យលួចនោះមានទូរស័ព្ទ២គ្រឿង និងលុយចំនួន៥៨ម៉ឺនរៀល។
តាមប្រភពព័ត៌មានបានឲ្យដឹងថា នៅវេលាម៉ោង៤ទៀបភ្លឺថ្ងៃទី២៦ ខែសីហា មុនពេលកើតហេតុ បុរសដែលជាម្ចាស់បន្ទប់បានចុះពីជាន់ទី១ទៅក្រោមដើម្បីបើកទ្វាររបង ហើយមុននិងចុះក្រោម ក៏បានបិទទ្វារបន្ទប់យ៉ាងត្រឹមត្រូវផងដែរ បន្ទាប់មកជនសង្ស័យបានចូលទៅធ្វើសកម្មភាពឆ្កឹះសោ និងគាស់ទ្វារបន្ទប់ចូលលួចយកលុយ និងទូរស័ព្ទរួចគេចខ្លួនបាត់ស្រមោល ។ លុះក្រោយពីធ្វើកិច្ចការរួច ម្ចាស់បន្ទប់ដែលជាជនរងគ្រោះបានឡើងទៅកាន់បន្ទប់វិញស្រាប់តែឃើញទ្វាររបើក និងបាត់បង់ទ្រព្យសម្បត្តិអស់ ទើបមានការផ្អើលឆោឡោឡើង ហើយបានសង្ស័យទៅលើឈ្មោះគឹម បូរិន្ទ យ៉ាងខ្លាំង។
ប្រភពដដែលបានបន្តថា ពេលនោះជនរងគ្រោះបានមកប្ដឹងសុំឲ្យនគរបាលជួយអន្តរាគមន៍ហើយរហូតដល់វេលាម៉ោង៨ព្រឹកថ្ងៃដដែលបានលេចមុខជនសង្ស័យ គឹម បូរិន្ទ ត្រឡប់ទៅកាន់ផ្ទះជួលវិញទើបនគរបាលឃាត់ខ្លួននាំយកទៅសាកសួរ។
ក្រោយមកនគរបាលបានធ្វើការឆែកឆេរក្នុងបន្ទប់ជួលរបស់ជនសង្ស័យ និងឃាត់ខ្លួនបក្ខពួកម្នាក់ទៀតគឺឈ្មោះផាន ពិសិដ្ឋ ហើយអ្នកទាំង២នាក់នេះពុំមែនគាស់តែបន្ទប់មួយនេះទេ គឺបានគាស់បន្ទប់ជាច្រើនទៀតដែលស្ថិតនៅជិតនោះពេលដែលម្ចាស់មិននៅ ។ បច្ចុប្បន្ន ជនសង្ស័យទាំង២នាក់ត្រូវបាននគរបាលកំពុងកសាងសំណុំរឿងដើម្បីចាត់ការតាមច្បាប់ហើយ៕
ចែករំលែកព័តមាននេះ