សហរដ្ឋអាមេរិក-ចិន ៖ ប្រទេសចិនកាលពីថ្ងៃទី២៥ សីហា បានបរិហារយ៉ាងម៉ឺងម៉ាត់ ការចោទប្រកាន់ទាំងឡាយរបស់ប្រធានាធិបតីអាមេរិកលោកដូណាល់ ត្រាំ ដែលលុបចោលទស្សនកិច្ចរបស់រដ្ឋមន្ត្រីការបរទេសលោក គឺលោក MIKE POMPEO ទៅកាន់កូរ៉េខាងជើងថា មកពីខ្វះកិច្ចសហការរបស់ចិនថា ជាការចោទប្រកាន់ពុំមានការទទួលខុសត្រូវ។
ក្នុងសេចក្ដីប្រកាសមួយអ្នកនាំពាក្យក្រសួងការបរទេសចិន លោកលូកាង គូសបញ្ជាក់ថា សេចក្ដីថ្លែងការណ៍របស់អាមេរិក គឺផ្ទុយពីការពិត ហើយគ្មានការទទួលខុសត្រូវ។យើងមានការព្រួយបារម្ភយ៉ាងខ្លាំង ហើយយើងតវ៉ាយ៉ាងម៉ឺងម៉ាត់ចំពោះសហរដ្ឋអាមេរិក។
លោកត្រាំកាលពីថ្ងៃទី២៤ សីហា បានលុបចោលទស្សនកិច្ចលើកទី៤ របស់លោក MIKE POMPEO នៅក្រុងព្យុងយ៉ាង ដែលគ្រោងធ្វើនាសប្ដាហ៍ខាងមុខ។ ជាលើកដំបូងដែលលោកលើកពីអវត្តមាននៃការរីកចម្រើនលើការរំសាយនុយក្លេអ៊ែរ ចាប់តាំងពីការជួបគ្នាកំពូលជាប្រវត្តិសាស្ត្ររបស់លោកជាមួយលោកគីមជុង អ៊ុន មក។
ក្នុងសារតាម TWITTER លោកត្រាំបានទម្លាក់ការទទួលខុសត្រូវមួយផ្នែកលើក្រុងប៉េកាំង ចំពោះការជាប់គាំងនោះ ខណៈអាមេរិកកំពុងតែធ្វើសង្គ្រាមពាណិជ្ជកម្មជាមួយចិន។ លោកនិយាយថា ដោយសារហេតុផលនៃជំហរកាន់តែតឹងតែងរបស់យើង លើពាណិជ្ជកម្មជាមួយចិន ខ្ញុំយល់ថា បែបនេះវាមិនជួយឲ្យដើរទៅមុខឡើយក្នុងដំណើរការនៃការរំសាយនុយក្លេអ៊ែរ ទោះមានទណ្ឌកម្មរបស់អង្គការសហប្រជាជាតិ។ ការគាបសង្កត់របស់ចិនត្រូវចាត់ទុកថា សំខាន់សម្រាប់ជម្រុញក្រុងព្យុងយ៉ាងមកកាន់តុចរចា។
លោកត្រាំបន្តថា អាស្រ័យហេតុនោះហើយបានជាលោកស្នើដល់រដ្ឋមន្ត្រីការបរទេសអាមេរិក កុំឲ្យទៅកាន់កូរ៉េខាងជើងក្នុងដំណាក់កាលនេះ។ ខ្ញុំមានអារម្មណ៍ថា យើងពុំបានធ្វើឲ្យមានការរីកចម្រើនគ្រប់គ្រាន់ឡើយក្នុងការរំសាយនុយក្លេអ៊ែរនៅឧបទ្វីបកូរ៉េ។
លោកគិតថា លោក POMPEO អាចរៀបចំឡើងវិញកម្មវិធីនៃដំណើរទស្សនកិច្ចរបស់លោកនៅក្រុងព្យុងយ៉ាង នាពេលខាងមុខឆាប់ៗ ប្រហែលនាពេលដែលយើងរកឃើញដំណោះស្រាយមួយនៃទំនាក់ទំនងពាណិជ្ជកម្មរបស់យើងជាមួយចិន៕
ចែករំលែកព័តមាននេះ