ទីក្រុងញូវដែលី ៖ ប្រទេសឥណ្ឌា កាលពីថ្ងៃទី១៧ កញ្ញា បានប្រាប់សហរដ្ឋអាមេរិកថា វិធានការថ្មីៗក្នុងការដាក់ពន្ធលើការទិញប្រេងពីរុស្ស៊ី អាចនឹងជះឥទ្ធិពលដល់ទំនាក់ទំនងទ្វេភាគី។ នេះបើតាមការលើកឡើងរបស់ក្រសួងការបរទេសឥណ្ឌា ប៉ុន្មានម៉ោងក្រោយសហរដ្ឋអាមេរិកបានចាត់វិធានការថ្មី ដាក់ទណ្ឌកម្មលើអ្នកទិញទាំងនោះ។
សភាតំណាងរាស្ត្រសហរដ្ឋអាមេរិក កាលពីថ្ងៃទី១៦ កញ្ញា (ម៉ោងនៅសហរដ្ឋអាមេរិក) បានអនុម័តច្បាប់មួយផ្តល់អំណាចដល់លោកប្រធានាធិបតី Donald Trump ក្នុងការដាក់ទណ្ឌកម្មលើរុស្ស៊ី និងការដំឡើងពន្ធដល់ ១០០% លើបណ្តាប្រទេសទាំងឡាយណាដែលបានទិញប្រេង និងហ្គាសរុស្ស៊ី។ ច្បាប់នេះនឹងត្រូវបញ្ជូនទៅលោក ត្រាំ ដើម្បីចុះហត្ថលេខាឱ្យក្លាយជាច្បាប់ធរមាន។
ងាកមកឥណ្ឌា និងចិន ស្ថិតក្នុងចំណោមប្រទេសប្រឈមមុខខ្លាំងជាងគេ ព្រោះប្រទេសទាំងពីរនេះ គឺជាអតិថិជនធំរបស់រុស្ស៊ី។ តាមវិទ្យាស្ថានស្រាវជ្រាវថាមពល និងខ្យល់ស្អាត (CREA) បានឱ្យដឹងថា ចាប់ពីខែធ្នូ ឆ្នាំ២០២២ ទៅដល់ខែសីហា ឆ្នាំ២០២៦ ប្រទេសចិនបានរួមចំណែកដល់ទៅពាក់កណ្តាលនៃការនាំចេញប្រេងឆៅរបស់រុស្ស៊ី បន្ទាប់មកគឺឥណ្ឌា ៣៧% តួកគី ៥% និងសហភាពអឺរ៉ុប (EU) ៥%។
ក្រសួងការបរទេសឥណ្ឌាបានកត់សម្គាល់ពីការអនុម័តសេចក្តីព្រាងច្បាប់ថ្មី ដោយលើកឡើងថា ទីក្រុងញូវដេលីបានលើកឡើងពីបញ្ហានេះជាមួយអាមេរិកក្នុងរយៈពេលប៉ុន្មានខែថ្មីៗនេះ និងបានពន្យល់យ៉ាងច្បាស់អំពីផលប៉ះពាល់ដែលអាចកើតមានចំពោះទំនាក់ទំនងទ្វេភាគី និងទីផ្សារថាមពលអន្តរជាតិ។ ក្រសួងបញ្ជាក់នៅក្នុងសេចក្តីថ្លែងការណ៍ថា ទីក្រុងញូវដេលីនៅតែប្តេជ្ញាចិត្តយ៉ាងមុតមាំធានាសន្តិសុខថាមពលសម្រាប់ប្រជាជនរបស់ខ្លួន ហើយនឹងបន្តស្វែងរកការផ្គត់ផ្គង់ពីអ្នកលក់ចម្រុះផ្អែកលើសក្ដានុពលទីផ្សារ។
តាមវិទ្យាស្ថានស្រាវជ្រាវពាណិជ្ជកម្មសកល (GTRI) ដែលជាក្រុមអ្នកស្រាវជ្រាវមានមូលដ្ឋាននៅទីក្រុងញូវដេលីបង្ហាញថា រុស្ស៊ីគឺជាអ្នកផ្គត់ផ្គង់ ៣០,៣% នៃការនាំចូលប្រេងឆៅរបស់ឥណ្ឌាក្នុងឆ្នាំ ២០២៦ ដែលមានតម្លៃដល់ ៤០,៨ ពាន់លានដុល្លារអាមេរិក នៅក្នុងចំណោមការនាំចូលសរុបចំនួន ១៣៤,៧ ពាន់លានដុល្លារ។
លុះនៅក្នុងខែកក្កដា ប្រេងឆៅរបស់រុស្ស៊ីមានចំនួនច្រើនជាងពាក់កណ្តាលនៃការនាំចូលសរុបរបស់ឥណ្ឌា ធៀបនឹងប្រទេសផ្គត់ផ្គង់ផ្សេងទៀត ដូចជា អេមីរ៉ាតអារ៉ាប់រួម ១០,៨% អារ៉ាប៊ីសាអូឌីត ៩,៦%, វ៉េណេស៊ុយអេឡា ៦,៣% ប្រេស៊ីល ៥,៥%, អូម៉ង់ ៥,៣% និងសហរដ្ឋអាមេរិក ២,៩% ដោយគិតតែរុស្ស៊ីមួយ បានផ្គត់ផ្គង់ប្រេងឆៅច្រើនជាងប្រទេសទាំង៦នេះបូកបញ្ចូលគ្នាទៅទៀត៕ ប្រភព ៖ Reuters និង BBC
ចែករំលែកព័តមាននេះ