អន្តរជាតិ ៖ ប្រេងឆៅអន្តជាតិបានជួញដូរនៅក្នុងតម្លៃជិត ១០០ ដុល្លារអាមេរិក ក្នុង១បារ៉ែល នៅថ្ងៃទី៩ ខែកញ្ញា ឆ្នាំ២០២៦ និងជាលើកដំបូងបង្អស់ ចាប់តាំងពីខែកក្កដាមក ដោយសារការវាយប្រហារដែលកំពុងកើនឡើងកម្តៅខ្លាំងទូទាំងតំបន់មជ្ឈិមបូព៌ា បានជំរុញឱ្យមានការព្រួយបារម្ភអំពីការរំខានដល់ការផ្គត់ផ្គង់ប្រេងពីតំបន់នោះ។ នេះបើតាមការចេញផ្សាយពី Reuters។
តម្លៃប្រេងឆៅប្រភេទ Brent ស្តង់ដាអន្តរជាតិ បានកើនឡើង ១,៣% ដល់ ៩៩,២២ ដុល្លារក្នុង១បារ៉ែល គិតត្រឹមម៉ោង ១ និង ១៥ នាទីរសៀល (ម៉ោងនៅកម្ពុជា)។ រីឯប្រេងឆៅ West Texas Intermediate របស់សហរដ្ឋអាមេរិកបានកើនឡើង ១,២% ដល់តម្លៃ ៩៤,១៣ ដុល្លារក្នុង១បារ៉ែល។ តម្លៃប្រេងឆៅ Brent បានហក់ឡើង ២៥% ចាប់តាំងពីដើមខែសីហាមក ដោយសារតែក្តីសង្ឃឹមលើដំណោះស្រាយជាអចិន្ត្រៃយ៍ចំពោះសង្គ្រាមដែលមានរយៈពេល៦ខែមកហើយនោះ ស្រាប់តែបានរលាយបាត់ទៅវិញ ហើយការប្រយុទ្ធគ្នាបានផ្ទុះឡើងជាថ្មីម្តងទៀត។
សង្គ្រាមនៅមជ្ឈិមបូព៌ាបានកើនកម្តៅកាន់តែខ្លាំង កាលពីថ្ងៃទី៨ ខែកញ្ញា ខណៈពេលដែលក្រុមហ៊ូធីក្នុងប្រទេសយេម៉ែន ដែលគាំទ្រដោយអ៊ីរ៉ង់ បានបើកការវាយប្រហារទៅលើទីក្រុងជាច្រើនរបស់ប្រទេសអារ៉ាប៊ីសាអូឌីត ដែលនេះកាន់តែទាញសម្ព័ន្ធមិត្តរបស់សហរដ្ឋអាមេរិកមួយនេះឱ្យចូលក្នុងជម្លោះកាន់តែជ្រៅ។
ការកើនឡើងកម្តៅយ៉ាងគំហុកនៃសង្គ្រាមរយៈពេល៦ខែនេះ កងកម្លាំងសហរដ្ឋអាមេរិកបានវាយប្រហារលើកប៉ាល់ដឹកប្រេងរបស់អ៊ីរ៉ង់ជាច្រើនគ្រឿង ហើយអ៊ីរ៉ង់បានឆ្លើយតបដោយការវាយប្រហារលើមូលដ្ឋានទ័ពអាមេរិកក្នុងប្រទេសហ្សកដានី ព្រមទាំងបានវាយប្រហារលើបណ្តាកប៉ាល់ដឹកជញ្ជូនផ្សេងទៀតផងដែរ។
ការវាយប្រហារចុងក្រោយបង្អស់ទាំងនេះ គំរាមកំហែងកាន់តែខ្លាំងដល់ការផ្គត់ផ្គង់ប្រេងនៅមជ្ឈិមបូព៌ា ដែលកំពុងតែមានភាពតានតឹងស្រាប់ទៅហើយ ដោយសារតែការវាយប្រហារទៅលើហេដ្ឋារចនាសម្ព័ន្ធថាមពលក្នុងតំបន់ និងផ្លូវដឹកជញ្ជូនសំខាន់ៗ៕
ចែករំលែកព័តមាននេះ