អន្តរជាតិ ៖ តម្លៃប្រេងឆៅអន្តរជាតិបានហក់ឡើងលើស ១០០ ដុល្លារអាមេរិកនៅក្នុង១បារ៉ែល នៅរសៀលថ្ងៃទី៩ ខែកញ្ញា ឆ្នាំ២០២៦ ដោយទម្លុះតម្លៃ៣ខ្ទង់ជាលើកដំបូង ចាប់តាំងពីថ្ងៃទី២៤ ខែកក្កដា ឆ្នាំ២០២៦ ដោយសារតែជម្លោះកាន់តែខ្លាំងឡើងនៅក្នុងតំបន់មជ្ឈិមបូព៌ា បានបង្កឱ្យមានការព្រួយបារម្ភកាន់អំពីផលរំខាននៃការដឹកជញ្ជូនប្រេងចេញពីតំបន់នោះ។ នេះបើតាមការចេញផ្សាយពី Reuters។ គួររំលឹកថា តម្លៃប្រេងឆៅឡើងដល់ជិត ១០០ដុល្លារ ក្នុង១បារ៉ែល ដោយសារកម្តៅនៃភាពតានតឹងនៅមជ្ឈិមបូព៌ា
តម្លៃប្រេងឆៅប្រភេទ Brent បានកើនឡើង ២,១៥ ដុល្លារ ឬ ២,២% ដល់ ១០០,០៧ ដុល្លារក្នុងមួយបារ៉ែល ត្រឹមម៉ោង ២ និង ២០ នាទីរសៀល ខណៈដែលប្រេងឆៅរបស់សហរដ្ឋអាមេរិក West Texas Intermediate (WTI) បានកើនឡើង ១,៧០ ដុល្លារ ឬ ១,៨៣% ដល់ ៩៤,៧៣ ដុល្លារក្នុងមួយបារ៉ែល។ តម្លៃប្រេងឆៅ Brent បានកើនឡើង ២៥% ចាប់តាំងពីដើមខែមុនមក ដោយសារតែសង្ឃឹមលើការដោះស្រាយជម្លោះរយៈពេល៦ខែរវាងសហរដ្ឋអាមេរិក និងអ៊ីរ៉ង់ ត្រូវបានរលាយបាត់ទៅវិញ ។
ការវាយប្រហាររបស់ក្រុមហ៊ូធីនៅក្នុងប្រទេសយេម៉ែន ដែលគាំទ្រដោយអ៊ីរ៉ង់ អាចគំរាមកំហែងដល់ការដឹកជញ្ជូនប្រេងតាមរយៈសមុទ្រក្រហម ដែលជាផ្លូវដ៏សំខាន់មួយជំនួសច្រកសមុទ្រហ័រមូស (Hormuz) ដែលនៅទីនោះការដឹកជញ្ជូនប្រេងត្រូវបានកាត់បន្ថយយ៉ាងខ្លាំង ចាប់តាំងពីការចាប់ផ្តើមសង្គ្រាម កាលពីថ្ងៃទី ២៨ ខែកុម្ភៈ កន្លងទៅ។
ការកើនឡើងកម្តៅយ៉ាងគំហុកនៃសង្គ្រាមរយៈពេល៦ខែនេះ កងកម្លាំងសហរដ្ឋអាមេរិកបានវាយប្រហារលើកប៉ាល់ដឹកប្រេងរបស់អ៊ីរ៉ង់ជាច្រើនគ្រឿង ហើយអ៊ីរ៉ង់បានឆ្លើយតបដោយការវាយប្រហារលើមូលដ្ឋានទ័ពអាមេរិកក្នុងប្រទេសហ្សកដានី ព្រមទាំងបានវាយប្រហារលើបណ្តាកប៉ាល់ដឹកជញ្ជូនផ្សេងទៀតផងដែរ។
ការវាយប្រហារចុងក្រោយបង្អស់ទាំងនេះ គំរាមកំហែងកាន់តែខ្លាំងដល់ការផ្គត់ផ្គង់ប្រេងនៅមជ្ឈិមបូព៌ា ដែលកំពុងតែមានភាពតានតឹងស្រាប់ទៅហើយ ដោយសារតែការវាយប្រហារទៅលើហេដ្ឋារចនាសម្ព័ន្ធថាមពលក្នុងតំបន់ និងផ្លូវដឹកជញ្ជូនសំខាន់ៗ៕
ចែករំលែកព័តមាននេះ