រាជធានីភ្នំពេញ៖មនុស្សតិចណាស់ដែលបានស្គាល់ឈ្មោះ និងមុខមាត់អ្នកចម្រៀងប្រពៃណីដែលមានសំឡេងដ៏ក្រអួនក្រដអៅ គឺអ្នកស្រី សាត សេរីយ៉ង់ បើទោះបីជាភាគច្រើនសុទ្ធបានស្តាប់បទចម្រៀងរបស់គាត់ស្ទើររាប់មិនអស់ក៏ដោយ ។ ចម្រៀងរបស់អ្នកស្រីសាត សេរីយ៉ង់តែងតែចាក់នៅតាមពិធីមង្គលការ ។
ម្ចាស់ទឹកដមសំឡេងដ៏ពីរោះអ្នកស្រីសាត សេរីយ៉ង់ ថ្វីបើសំឡេងសំនៀងអ្នកស្រីនៅតែជាទីពេញនិយម ហើយតែងតែចាក់តាមពិធីរៀបអាពាហ៍ពិពាហ៍ក្តី តែអ្នកស្រីបានទទួលមរណភាពទៅហើយដោយស្ងៀមស្ងាត់ មិនមានលេចលឺព័ត៌មានទូលំទូលាយទេ ។
អ្នកស្រីសាត សេរីយ៉ង់ ដែលជាដៃគូចម្រៀងភ្លេងការមានសំឡេងពីរោះមិនចាញ់គ្នាគឺលោកសុត សាវុធ ត្រូវបានប្រភពមួយឲ្យដឹងថា អ្នកស្រីបានទទួកមរណភាពកាលពីពេល៤ទៅ៥ឆ្នាំកន្លងទៅ ។
អ្នកសាត សេរីយ៉ង់ មានដើមកំណើតនៅខេត្តបាត់ដំបង ប៉ុន្តែគ្មានអ្នកណាដឹងទេថា អ្នកស្រីមានគ្រួសារ និងមានកូនចៅប៉ុន្មាននាក់ទេ ។ ដៃគូចម្រៀងរបស់អ្នកស្រី គឺលោកសុត សាវុត ត្រូវគេឲ្យដឹងថា លោកនៅរស់រានមានជីវិតនៅឡើយ ។
ដ្បិតជាអ្នកចម្រៀងភ្លេងការដែលបានបញ្ចេញសូរសៀងសំនៀងច្រើនជាងការបញ្ចេញមុខក៏ដោយ ប៉ុន្តែអ្នកស្រីសាត សេរីយ៉ង់ បានបង្ហាញស្នាដៃដោយការចូលរួមថតជាស៊ីឌីឲ្យផលិតកម្មក្រៅស្រុកជាច្រើនបទ ជាពិសេសផលិតកម្មសំឡេងខ្មែរ(SK)។ ផលិតកម្មនេះបានថតសំឡេងរបស់អ្នកស្រីជាមួយលោកសុត សាវុត បានជាច្រើនវ៉ុល ដើម្បីដាក់លក់ទាំងក្នុងស្រុកនិងក្រៅស្រុក ហើយភាគច្រើនបទចម្រៀងទាំងនោះជាបទភ្លេងការ ។
ទាំងអ្នកចម្រៀងប្រពៃណី ទាំងមហាជនជាច្រើនបានសម្តែងការកោតសរសើរពីទឹកដមសំឡេងរបស់អ្នកស្រីសាត សេរីយ៉ង់ ដែលពីរោះពីធម្មជាតិសក្តិសមក្នុងលក្ខណៈជាចម្រៀងប្រពៃណីខ្មែរ ។ មហាជនប្រាកដជាធ្លាប់បានស្តាប់បទចម្រៀងរបស់អ្នកស្រីសេរីយ៉ង់ ដែលចាក់តាមឧឃោសនស័ព្ទក្នុងពិធីមង្គលការនានា មានបទ កាត់ត្រើយ ផាត់ជាយ និងបទជាច្រើនទៀតដែលអ្នកស្រីបានច្រៀងបង្ហាញពីទំនៀមទម្លាប់ប្រពៃណីនៃពិធីមង្គលការរបស់ខ្មែរ ។
កាលពីពេល ថ្មីៗកន្លងមកលោកយាយស្រី ដាំ សុខន វ័យប្រមាណជាង៧០ឆ្នាំរស់នៅភូមិព្រែកតានប់ ឃុំកំពង់ស្វាយ ខេត្តកណ្តាល មានប្រសាសន៍ថា «ជាធម្មតាកន្លងមកនៅពេលមានគេចាក់ភ្លេងការនៅក្នុងភូមិ ម្តងៗគឺលឺតែបទចម្រៀងរបស់អ្នកស្រីសាត ស្រីយ៉ង់ និងលោក សុត សាវុត នេះតែម្តង ។ ប៉ុន្តែទាំងខ្ញុំ និងមនុស្សជាច្រើនទៀតហាក់មិនបានស្គាល់មុខមាត់អ្នកទាំងពីរឡើយ ប៉ុន្តែទាំងខ្ញុំ និងអ្នកភូមិជាច្រើនទៀតតែងសរសើរទឹកដមសំឡេដ៏ពីរោះរបស់អ្នកទាំងពីរ»៕
ចែករំលែកព័តមាននេះ