ខេត្តកំពង់ធំ ៖ គ្រោះថ្នាក់ចរាចរណ៍ចំនួន២ករណីផ្សេងគ្នាបានកើតឡើងក្នុងថ្ងៃតែមួយ ក្នុងនោះរួមមាន ៖ ករណីទី១-រថយន្តឡិចស៊ីស៤៧០របស់បានបុកជាមួយម៉ូតូមួយគ្រឿងដែលជិះគ្នា២នាក់ បណ្តាលឱ្យស្លាប់ពីរនាក់ បានកើតឡើងកាលពីលាម៉ោ៤និង៥៥នាទីល្ងាចថ្ងៃ២៥ ខែសីហា ឆ្នាំ២០១៨…
ខេត្តកំពង់ធំ ៖ គ្រោះថ្នាក់ចរាចរណ៍ចំនួន២ករណីផ្សេងគ្នាបានកើតឡើងក្នុងថ្ងៃតែមួយ ក្នុងនោះរួមមាន ៖
ករណីទី១-រថយន្តឡិចស៊ីស៤៧០របស់បានបុកជាមួយម៉ូតូមួយគ្រឿងដែលជិះគ្នា២នាក់ បណ្តាលឱ្យស្លាប់ពីរនាក់ បានកើតឡើងកាលពីលាម៉ោ៤និង៥៥នាទីល្ងាចថ្ងៃ២៥ ខែសីហា ឆ្នាំ២០១៨ ស្ថិតនៅលើផ្លូវទំនប់ ចំណុចទឹកវឹល ក្នុងភូមិផ្លុង ឃុំទីពោធិ៍ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ជនរងគ្រោះក្នុងហេតុការណ៍រថយន្តបុកជាមួយម៉ូតូ ឈ្មោះ គង់ មករា ភេទប្រុស អាយុ១៨ឆ្នាំ ជាអ្នកបើកបរម៉ូតូ រស់នៅភូមិតាំងក្រសាំង ឃុំតាំងក្រសាំង ស្រុកសន្ទុក បានស្លាប់នៅកន្លែងកើតហេតុ និងអ្នករួមដំណើរម្នាក់ឈ្មោះ ហេង គឹមហាន ភេទប្រុស អាយុ១៩ឆ្នាំ រស់នៅភូមិវាំងខាងត្បូង ឃុំតាំងក្រសាំង ស្រុកសន្ទុក បានស្លាប់នៅកន្លែងកើតហេតុ ។ ជនរងគ្រោះទាំង២នាក់ជិះម៉ូតូមួយគ្រឿង ម៉ាកហុងដា ធុន C125 ពណ៌ខ្មៅ ពាក់ស្លាកលេខ កំពង់ធំ ១J-៥១២០ ។ ចំណែករថយន្តម៉ាកឡិចស៊ីច៤៧០ ពណ៌ស ពាក់ស្លាកលេខ កំពង់ធំ ២B-០៦០១ បើកបរដោយឈ្មោះ សួស សុវណ្ណា ភេទប្រុស អាយុ៤៩ឆ្នាំ ជាមេបញ្ជាការងអាវុធហត្ថប្រធានស្នាក់ការសន្តិសុខ៦០១ នៅភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ក្រោយពីកើតហេតុបានបើករថយន្តគេចខ្លួនបាត់ពីកន្លែងកើតហេតុ។
សមត្ថកិច្ចបានបញ្ជាក់ថា មូលហេតុបឋមបង្កឡើងដោយម៉ូតូមួយគ្រឿងដែលជិះគ្នា២នាក់ក្នុងទិសដៅលិចទៅកើត បានដួលម៉ូតូលើទ្រូងផ្លូវ ហើយក៏ត្រូវបានរថយន្តបើកបរទិសដៅពីកើតទៅលិចក្នុងផ្ទុយទិសគ្នា ដែលមានល្បឿនយ៉ាងលឿនកិនចំ បណ្តាលឲ្យឱ្យអ្នកបើកបរម៉ូតូ និងអ្នករួមដំណើរស្លាប់ភ្លាមៗទាំងពីរនាក់នៅនឹងកន្លែងកើតហេតុតែម្តង ចំណែកអ្នកបើកបររថយន្តបានបើកគេចខ្លួនបាត់ស្រមោល ។
ករណីនេះសមត្ថកិច្ចកំពុងតែស្វែងរកភាគីខាងរថយន្តដើម្បីមកធ្វើការដោះស្រាយតាមច្បាប់ ។
ករណីទី២-គ្រោះថ្នាក់ចរាចរណ៍រវាងម៉ូតូបុកជាមួយរថយន្ត បណ្តាលឱ្យរបួសធ្ងន់ម្នាក់បានកើតឡើងកាលពីវេលាម៉ោង៣និង១នាទីរសៀលថ្ងៃទី២៥ ខែសីហា ឆ្នាំ២០១៨ ស្ថិតនៅលើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១៧៣-១៧៤ ភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ជនរងគ្រោះខាងលើឈ្មោះ ស៊ឹម សំណាង ភេទប្រុស អាយុ២៣ឆ្នាំ នៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ជាអ្នកបើកបរម៉ូតូមួយគ្រឿងម៉ាកវ៉េវ ពណ៌ខ្មៅ គ្មានស្លាកលេខ បានរងរបួសធ្ងន់ ចំណែករថយន្តម៉ាកសាំងយ៉ុង ពណ៌ស ពាក់ស្លាកលេខ កោះកុង ២A-០៤៣៥ អ្នកបើកបរមិនស្គាល់អត្តសញ្ញាណ បន្ទាប់ពីកើតហេតុបានរត់គេចខ្លួនបាត់ ។
សមត្ថកិច្ចបញ្ជាក់ថា គ្រោះថ្នាក់ចរាចរណ៍ខាងលើនេះ មូលហេតុជាបឋមបង្កឡើងដោយអ្នកបើកបររថយន្តសាំងយ៉ុងធ្វើដំណើរក្នុងទិសដៅពីត្បូងទៅជើង បានបត់ឆ្វេងខ្វះការប្រុងប្រយ័ត្ន បានបុកម៉ូតូមួយគ្រឿងបើកបរក្នុងទិសដៅពីជើងទៅត្បូងក្នុងល្បឿនយ៉ាងលឿន បណ្តាលឱ្យអ្នកបើកបរម៉ូតូរងរបួសត្រូវ ចំណែកអ្នកបើកបររថយន្តបានរត់គេចខ្លួនបាត់ស្រមោល ។
ក្រោយពេលកើតហេតុ រថយន្តនិងម៉ូតូត្រូវបានសមត្ថកិច្ចយកមរក្សាទុកនៅអធិការដ្ឋាននគរបាលស្រុកកំពង់ស្វាយ ដើម្បីដោះស្រាយតាមនីតិវិធី៕
ចែករំលែកព័តមាននេះ