រាជធានីភ្នំពេញ ៖ វិស័យដំឡូងមីកម្ពុជានឹងកាន់តែរីកចម្រើន បន្ទាប់ពីមានដៃគូវិនិយោគ និងភាគីពាក់ព័ន្ធ បានចូលមកអភិវឌ្ឍន៍វិស័យនេះជាបន្ដបន្ទាប់ ។ យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មបានឲ្យដឹងថា នៅថ្ងៃទី២៣ សីហា…
រាជធានីភ្នំពេញ ៖ វិស័យដំឡូងមីកម្ពុជានឹងកាន់តែរីកចម្រើន បន្ទាប់ពីមានដៃគូវិនិយោគ និងភាគីពាក់ព័ន្ធ បានចូលមកអភិវឌ្ឍន៍វិស័យនេះជាបន្ដបន្ទាប់ ។ យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មបានឲ្យដឹងថា នៅថ្ងៃទី២៣ សីហា នេះ អង្គការUNDP ប្រចាំកម្ពុជា និងក្រុមហ៊ុនGreen Leader ដែលជាក្រុមហ៊ុនបាននិងកំពុងវិនិយោគរោងចក្រកែច្នៃដំឡូងមីនៅខេត្តក្រចេះ នឹងចុះកិច្ចព្រមព្រៀងមួយក្នុងការជំរុញលើកកម្ពស់វិស័យដំឡូងមីកម្ពុជា ប្រកបដោយបរិយាប័ន្ន និងមាននិរន្តរភាព ស្របតាមគោលនយោ -បាយអភិវឌ្ឍន៍វិស័យដំឡូងមីរបស់កម្ពុជា ។ ក្នុងពិធីចុះហត្ថេលខានេះ នឹងមានការចូលរួមជាសាក្សីពីរដ្ឋមន្ត្រីក្រសួងពាណិជ្ជកម្មនៃប្រទេសកម្ពុជា, លោក Xiong Bo ឯកអគ្គរដ្ឋទូតប្រទេសចិនប្រចាំនៅកម្ពុជា, លោក Haoliang Xu នាយកអង្គការUNDPប្រចាំតំបន់អាស៊ីប៉ាស៊ីហ្វិក និងលោកស្រី Pauline Tamesis នាយិកាអង្គការសហប្រជាជាតិ ប្រចាំនៅកម្ពុជា ។
តាមរយៈកិច្ចព្រមព្រៀងមូលនិធិរួមគ្នានេះ គឺជាការចាប់ផ្តើមជាផ្លូវការនៃការបង្កើត និងអនុវត្តគម្រោងជំរុញការអភិវឌ្ឍទីផ្សារដំឡូងមី ប្រកបដោយបរិយប័ន្ន ក្នុងគោលបំណងបង្កើនការនាំចេញផលិតផលដំឡូងមីស្រស់ ទៅកាន់ទីផ្សារសកល ខណៈដែលគុណភាព និងតម្លៃបន្ថែម ត្រូវបានបង្កើតឡើងនៅក្នុងប្រទេសកម្ពុជា ។ លើសពីនេះទៀត គម្រោងនេះក៏មានគោលដៅធានានិរន្តរភាពទីផ្សារដ៏មានស្ថិរភាពមួយសម្រាប់កសិករកម្ពុជាផងដែរ ។
បើតាមលោក ឡុង កែមវិចិត្រ មន្ត្រីអ្នក ពាក្យរងនៃក្រសួងពាណិជ្ជកម្ម បានឲ្យដឹងថា ក្រុមហ៊ុនGreen Leader បានចូលមកបោះទុនវិនិយោគនៅកម្ពុជា ដោយបង្កើតរោងចក្រកែច្នៃដំឡូងមីក្នុងខេត្តក្រចេះ ហើយគោលដៅរបស់ពួកគេ នឹងពង្រីកបង្កើតរោងចក្រឲ្យបាន១០កន្លែងផ្សេងទៀតនៅកម្ពុជា ។
លោកបន្តថា ៖« តាមយុទ្ធសាស្ត្រពួកយើងកំពុងប្រឹងប្រែងធ្វើយ៉ាងម៉េចឈានទៅរកការលើកកម្ពស់ខ្សែសង្វាក់ផលិតផលដំឡូងមី ព្រោះកន្លងមក អ្វីដែលយើងនាំចេញភាគច្រើនជាដំឡូងមីចំណិត ។ អីចឹង អ្វីដែលយើងរៀបចំជាយុទ្ធសាស្ត្រ គឺយើងកំពុងលើកកម្ពស់ខ្សែសង្វាក់តម្លៃពីផលិតផលមិនទាន់កែច្នៃទៅជាផលិតផលកែច្នៃរួចដូចជា ម្ស៉ៅដំឡូងមី និងសម្បកថ្នាំពេទ្យជាដើម ដែលនេះជាអ្វីដែលយើងកំពុងជំរុញឱ្យមានការលូតលាស់ »។
លោកបណ្ឌិត រីឆាត ម៉ាស្ហល សេដ្ឋវិទូនៃអង្គការUNDP ប្រចាំប្រទេសកម្ពុជា មានប្រសាសន៍ថា ៖« គោលនយោបាយដំឡូងមី នឹងប្រែក្លាយដំឡូងមី ទៅជាដំណាំដែលផ្តល់ទិន្នផល និងប្រាក់ចំណូលខ្ពស់ សម្រាប់ប្រជាកសិករក្រីក្រ និងជាផលិតផលដែលបម្រើការអភិវឌ្ឍឧស្សាហកម្មនៅក្នុងប្រទេសកម្ពុជា ។
លោកថ្លែងថា ៖« ដើម្បីបង្កើនប្រសិទ្ធភាពខ្ពស់ ការអនុវត្តគោលនយោបាយ, រចនាសម្ព័ន្ធ និងអភិបាលកិច្ចល្អ ត្រូវតែបង្កើតឡើង ហើយខ្សែសង្វាក់តម្លៃដំឡូងមី ត្រូវបានបែងចែកជាផ្នែកៗ ដើម្បីតភ្ជាប់ជាមួយវិស័យអាទិភាពផ្សេងទៀត »។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានគូសបញ្ជាក់ថា និន្នាការនិងការរំពឹងទុកបានបង្ហាញថា តម្រូវការដំឡូងមីសម្រាប់ទីផ្សារក្នុងតំបន់ និងពិភពលោក នឹងមានកំណើនកាន់តែខ្ពស់ ដែលនេះគឺជាកាលានុវត្តភាពថ្មីសម្រាប់កម្ពុជា ដើម្បីអភិវឌ្ឍន៍សង្វាក់តម្លៃដំឡូងមី តាមរយៈការពង្រឹង និងពង្រីកផលិតកម្ម ការកែច្នៃចំណិតដំឡូងមី និងសមត្ថភាពនាំចេញ សំដៅឆ្លើយតបនឹងតម្រូវការទីផ្សារនាពេលអនាគត ។
លោករដ្ឋមន្ត្រី បន្តថា ដើម្បីចាប់យកនូវកាលានុវត្តភាពនេះ កម្ពុជាចាំបាច់ត្រូវវិនិយោគបន្ថែម និងការឯកភាពជាធ្លុងមួយរវាងរាជរដ្ឋាភិបាល និងភាគីពាក់ព័ន្ធ ដើម្បីដោះស្រាយបញ្ហាប្រឈម និងហានិភ័យនានា ដូចជា ភាពទន់ខ្សោយខ្សែសង្វាក់តម្លៃ កង្វះព័ត៌មានទីផ្សារ ការផ្គត់ផ្គង់មិនទៀតទាត់ និងគុណភាពប្រែប្រួលនៃដំឡូងមី ដែលជាកត្តារាំងស្ទះដល់ការលូតលាស់នៃឧស្សាហកម្មដំឡូងមីនៅកម្ពុជា ។
យោងតាមរបាយការណ៍អគ្គនាយដ្ឋានកសិកម្មបានបង្ហាញថា កាលពីឆ្នាំ២០១៧ កន្លងទៅ ការនាំចេញផលិតផលចំណិតដំឡូងមីស្ងួតទៅកាន់ទីផ្សារបរទេសមានប្រមាណជាង២,៣លានតោន ខណៈដែលការនាំចេញដំឡូងមីស្រស់ មានចំនួនជាង៧៥ម៉ឺនតោន ក្នុងនោះប្រទេសថៃ និងវៀតណាម ត្រូវបានចាត់ទុកថា ជាទីផ្សារធំបំផុតក្នុងការនាំចេញ ខណៈទីផ្សារនាំចេញទៅប្រទេសចិនផ្ទាល់ ហាក់មានតិចតួចនៅ
ឡើយ ។ យោងតាមក្រសួងពាណិជ្ជកម្មបញ្ជាក់ថា កាលពីឆ្នាំ២០១៧ កម្ពុជាបានក្លាយជាប្រទេសស្ថិតនៅលំដាប់លេខរៀងទី៨ ក្នុងចំណោមប្រទេសផលិតដំឡូងមីធំៗទាំង១០ នៅលើពិភពលោក ។ ចាប់តាំងពីឆ្នាំ២០១១មក ផ្ទៃដីដាំដុះដំឡូងមីត្រូវបានពង្រីកពី៤០០ពាន់ហិកតា ដល់៥៧៤ពាន់ហិកតា នៅក្នុងឆ្នាំ២០១៥ ដោយផ្តល់ទិន្នផលសរុបជាង១៣លានតោន ៕
ចែករំលែកព័តមាននេះ