ខេត្តបន្ទាយមានជ័យ ៖ យ៉ាងហោចណាស់មនុស្សចំនួន៣នាក់បានស្លាប់ និងម្នាក់ផ្សេងទៀតបានរងបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ចំនួន២ករណីផ្សេងគ្នាបានកើតឡើងកាលពីយប់ថ្ងៃទី២២ សីហា ២០១៨ លើកំណាត់ផ្លូវជាតិលេខ៥ នៅក្រុងសិរីសោភ័ណ និងក្រុងប៉ោយប៉ែត ខេត្តបន្ទាយមានជ័យ។
ករណីទី១-កាលពីវេលាម៉ោង៨និង៤០នាទីយប់ថ្ងៃទី២២ ខែសីហា ឆ្នាំ២០១៨ នៅលើកំណាត់ផ្លូវជាតិលេខ៥ ចំណុចខាងត្បូងស្នងការដ្ឋាននគរបាលខេត្តបន្ទាយមានជ័យ មានករណីគ្រោះថ្នាក់ចរាចរណ៍បានកើតឡើងរវាងម៉ូតូបុកជាមួយម៉ូតូ បណ្តាលឲ្យមានមនុស្ស២នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតបានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកក្រុងសិរីសោភ័ណ។
លោកវរសេនីយ៍ទោសួន នីប៉ូ នាយរងការិយាល័យនគរបាលចរាចរណ៍ផ្លូវគោកខេត្តបានឲ្យដឹងថា ជនរងគ្រោះដែលបានស្លាប់ក្នុងហេតុការណ៍គ្រោះចរាចរណ៍នេះរួមមាន ម៉ូតូមួយគ្រឿងជិះគ្នា២នាក់ម៉ាកហុងដា
ឌ្រីម ពណ៌ខ្មៅ ស្លាកលេខ បន្ទាយមានជ័យ ១A-០៨០៥ ដែលបើកបរដោយឈ្មោះ ជួន សុគន្ធ ភេទប្រុស អាយុ ២៦ឆ្នាំ ជាមន្ត្រីនគរបាលបង្ការ-ពន្លត់អគ្គីភ័យនៃស្នងការដ្ឋាននគរបាលខេត្ត រស់នៅភូមិប្រឡាយហ្លួងក្រោម ស្រុកមង្គលបូរី ខេត្តបន្ទាយមានជ័យ បានស្លាប់នៅនឹងកន្លែង និងអ្នករួមដំណើរ ឈ្មោះ ឆុំ ចិន ភេទប្រុស អាយុ ២០ឆ្នាំ រស់នៅភូមិឃុំជាមួយគ្នា បានរងរបួសធ្ងន់ ។ ចំណែកភាគីម្ខាងទៀតជិះម៉ូតូម៉ាកហុងដាវ៉េវ ពាក់ស្លាកលេខ ១A-០៦៣៣ បើកបរដោយឈ្មោះ វ៉ឺង វ៉ាន់ ភេទប្រុស អាយុ២៤ឆ្នាំ រស់នៅភូមិក្បាលស្ពាន សង្លាត់ព្រះពន្លា សិរីសោភ័ណ្ឌ ខេត្តបន្ទាយមានជ័យ បានស្លាប់នៅនឹងកន្លែងកើតហេតុ ។
លោកនាយរងការិយាល័យបានបញ្ជាក់ថា នៅមុនពេលកើតហេតុ ឈ្មោះជួន សុគន្ធ បានបំពេញបេសសកម្មដោយជិះម៉ូតូមួយគ្រឿងមានឌុបបុរសម្នាក់ជាអ្នករួមដំណើរបានចេញពីផ្ទះមកកន្លែងធ្វើការ ដើម្បីរៀបចំរថយន្តពន្លត់អគ្គីភ័យដែលក្រ សួងមហាផ្ទៃទើបប្រគល់ឲ្យ តាមការណែនាំរបស់លោកវរសេនីយ៍ស្នងការរង ដោយបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ បន្ទាយមានជ័យ ១A-០៨០៥ ក្នុងទិសដៅពីត្បូងទៅជើង លុះមកដល់ចំណុចកើតហេតុ ស្រាប់តែមានម៉ូតូមួយគ្រឿងម៉ាក ហុងដាវ៉េវ ពាក់ស្លាកលេខ ១A-០៦៣៣ បើកបរក្នុងទិសដៅបញ្ច្រាសគ្នា បានបើកវ៉ាជែងរថយន្តខាងមុខ ក៏ជ្រុលចង្កូតទៅបុកនឹងម៉ូតូម៉ាកហុងដាឌ្រីម បណ្តាលឱ្យអ្នកបើកបរម៉ូតូម៉ាកហុងដាឌ្រីមស្លាប់ភ្លាមៗនៅនឹងកន្លែងកើតហេតុ រីឯអ្នករួមដំណើរបានរងរបួសធ្ងន់ត្រូវបានរថយន្តនគរបាលចរាចរណ៍ដឹកយកទៅសង្គ្រោះនៅមន្ទីរពេទ្យបង្អែកក្រុងសិរីសោភ័ណ។ ចំណែកអ្នកបើកបរម៉ូតូម៉ាកវ៉េវក៏បានស្លាប់នឹងនៅកន្លែងកើតហេតុផងដែរ ។
នាព្រឹកថ្ងៃទី២៣ ខែសីហា ឆ្នាំ២០១៨ លោកឧត្តមសេនីយ៍ទោអាត់ ខែម ស្នងការនគរបាលខេត្ត បានដឹកនាំកងកម្លាំងនគរបាលក្រោមឱវាទ ចូលរួមរំលែកទុក្ខដ៏ក្រៀមក្រំជាមួយក្រុមគ្រួសារ និងប្រគល់ថវិការបស់សមាគមមិត្តនគរបាលជាតិកម្ពុជាចំនួន៦លានរៀល ក្នុងនោះក៏បាននាំយកថវិការបស់ឧបនាយករដ្ឋមន្ត្រីកែ គឹមយ៉ាន ប្រធានក្រុមការងារថ្នាក់ជាតិ ចុះជួយខេត្តបន្ទាយមានជ័យចំនួន៤០ម៉ឺនរៀល, ថវិការបស់ផែនអាវុធជាតិផ្ទុះ-អគ្គីភ័យចំនួន១លាន២សែន៥ម៉ឺនរៀល, ថវិការបស់ផែនអត្តសញ្ញាកម្មចំនួន៣៨ម៉ឺនរៀល និងថវិការបស់អធិការដ្ឋាននគរបាលស្រុកមង្គលបូរី៣០ម៉ឺន រួមទាំងអង្ក២ការុង,ទឹកក្រូច៣កេស,មី៣កេស និងទឹកសុទ្ធ៥កេសរបស់លោកឧត្តមសេនីយ៍ស្នងការផ្ទាល់ ឧបត្ថម្ភក្នុងកម្មវិធីបុណ្យសពលោកជួន សុគន្ធ ផងដែរ។
ករណីទី២-លោកនាយរងការិយាល័យសួន នីប៉ូ បានឲ្យដឹងទៀតថា កាលពីវេលាម៉ោង៩និង៤០នាទីយប់ថ្ងៃទី២២ ខែ សីហា ឆ្នាំ២០១៨ នៅលើផ្លូវជាតិលេខ៥ ត្រង់ចំណុចខាងកើតស្ថានីយ៏ដឹកអ្នកដំណើរអន្តរជាតិស៊ូជីង ប្រហែល២០ម៉ែត្រ ស្ថិតក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមាន ជ័យ មានរថយន្តក្រុងដឹកអ្នកដំណើរមួយគ្រឿងម៉ាកហ៊ីយ៉ានដាយ ពណ៌ក្រហម ពាក់ស្លាកលេខ ភ្នំពេញ ៣A-៤៩៤០ (ជារថយន្តរបស់ក្រុមហ៊ុនវរៈប៊ុនថាំ) បើកបរពីលិចទៅកើត លុះដល់កន្លែងកើតហេតុ បានបុកម៉ូតូមួយគ្រឿង ពណ៌ខ្មៅ ពាក់ស្លាកលេខ បន្ទាយមានជ័យ ១Q-២៥៥៦ បើកបរពីកើតទៅលិច ក្នុងទិសដៅបញ្ច្រាសគ្នា បណ្តាលឱ្យអ្នកបើកបរម៉ូតូស្លាប់នៅកន្លែងកើតហេតុ។ ចំណែកអ្នកបើកបររថយន្តបានរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ ។
ជនរងគ្រោះរងគ្រោះដែលស្លាប់ឈ្មោះ វន សុភក្ត្រា ភេទប្រុស អាយុ៣៣ឆ្នាំ ជាបុគ្គលិកខារាអូខេអេហ្វផ្លាស់ រស់នៅក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
រថយន្តត្រូវបានសមត្ថកិច្ចយកទៅរក្សាទុកនៅអធិការដ្ឋានក្រុងប៉ោយប៉ែតដើម្បីរង់ចាំការដោះស្រាយតាមនីតិវិធី៕
ចែករំលែកព័តមាននេះ