រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរស៥នាក់មានខ្លះក្បាលទំពែក ខ្លះទៀតសក់ស្កូវហើយ នៅដើរប្រព្រឹត្តគ្រឿងញៀនជាមួយក្មេងៗ កាលពីវេលាម៉ោង១១និង៤៥នាទី ថ្ងៃទី២០ ខែសីហា ហើយត្រូវបានកម្លាំងសមត្ថកិច្ចនគរបាលការិយាល័យប្រឆាំងគ្រឿងញៀន បង្ក្រាប និងឃាត់ខ្លួនបាននៅចំណុចបន្ទប់ជួលផ្ទះលេខ៥៣៥ ផ្លូវលំ ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ ។
សេចក្តីរាយការណ៍បន្តថា ជនសង្ស័យខាងលើ១-ឈ្មោះ សក់ វិច្ឆិកា ភេទប្រុស អាយុ៤២ឆ្នាំ ២-ឈ្មោះ វ៉ាន់ សាលៀប ភេទប្រុស អាយុ២៣ឆ្នាំ ៣-ឈ្មោះ ហូ សាន់រ៉ូហ្វី ភេទប្រុស អាយុ២២ឆ្នាំ ៤-ឈ្មោះ ថុង សាលឿន ភេទប្រុស អាយុ២៤ឆ្នាំ និង៥-ឈ្មោះ អ៊ុក ធារ៉ា ភេទប្រុស អាយុ២៥ឆ្នាំ ។
បើតាមមន្ត្រីនគរបាលការិយាល័យប្រឆាំងគ្រឿងញៀន បានឲ្យដឹងថា នៅពេលឃាត់ខ្លួនជនសង្ស័យទាំង៥នាក់ខាងលើនេះ គឺសមត្ថកិច្ចបានធ្វើការដកហូតវត្ថុតាងបានរួមមាន ១-ថ្នាំញៀនប្រភេទ (ICE) ចំនួន១កូនកញ្ចប់ធំល្មម ២-ទូរស័ព្ទ១គ្រឿង ៣-ដបជក់គ្រឿងញៀនចំនួន២ ៤-ដែកកេះសម្រាប់ជក់ថ្នាំញៀន៨ និង ៥-ដែកកាច់កម៉ូតូ១ ។
ក្រោយពេល ឃាត់ខ្លួនជនសង្ស័យទាំង៥នាក់ សមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ក្រោមការចោទប្រកាន់ពីបទ ជួញដូរ និងប្រើប្រាស់គ្រឿងញៀន ដោយខុសច្បាប់ ៕
ចែករំលែកព័តមាននេះ