រាជធានីភ្នំពេញ ៖ យុវជន២នាក់ជិះម៉ូតូមួយគ្រឿងត្រូវរថយន្តម៉ាកហាយឡេនឌ័របើកបុកពីក្រោយ បណ្តាលឱ្យរងរបួសធ្ងន់ម្នាក់ និងស្រាលម្នាក់ ចំណែករថយន្តបង្កបើកគេចបាត់ តែបានធ្លាក់កាងជាប់ស្លាកលេខនៅកន្លែងកើតហេតុ បង្កឱ្យមានការភ្ញាក់ផ្អើលកាលពីវេលាម៉ោង១១និង២០នាទីយប់ថ្ងៃទី២២ ខែសីហា ឆ្នាំ២០១៨…
រាជធានីភ្នំពេញ ៖ យុវជន២នាក់ជិះម៉ូតូមួយគ្រឿងត្រូវរថយន្តម៉ាកហាយឡេនឌ័របើកបុកពីក្រោយ បណ្តាលឱ្យរងរបួសធ្ងន់ម្នាក់ និងស្រាលម្នាក់ ចំណែករថយន្តបង្កបើកគេចបាត់ តែបានធ្លាក់កាងជាប់ស្លាកលេខនៅកន្លែងកើតហេតុ បង្កឱ្យមានការភ្ញាក់ផ្អើលកាលពីវេលាម៉ោង១១និង២០នាទីយប់ថ្ងៃទី២២ ខែសីហា ឆ្នាំ២០១៨ នៅមុខព្រលានយន្តហោះអន្តរជាតិភ្នំពេញ ដែលស្ថិតនៅតាមបណ្ដោយផ្លូវសហព័ន្ធរុស្ស៊ី ភូមិក្បាលដំរី២ សង្កាត់កាកាបទី២ ខណ្ឌពោធិ៍សែន ។
ជនរងគ្រោះទាំង២នាក់ខាងលើ ម្នាក់ឈ្មោះ កែវ ឧត្តម ភេទប្រុស អាយុ២៨ឆ្នាំ មុខរបរជាងដំឡើងអង់តែន រស់នៅភូមិច្រេះ សង្កាត់ភ្នំពេញថ្មី ខណ្ឌសែនសុខ បានរងរបួសស្រាល ។ ចំណែកជនរងគ្រោះម្នាក់ទៀតដែលរងរបួសធ្ងន់មិនត្រូវបានស្គាល់អត្តសញ្ញាណ ។ ម៉ូតូរបស់ជនរងគ្រោះ ម៉ាកឌូក ពណ៌សលាយក្រហម ពាក់ស្លាកលេខ ភ្នំពេញ ១CW-០១១១ ។ រីឯរថយន្តបង្កម៉ាកហាយឡេនឌ័រ ពណ៌ស ពាក់ស្លាកលេខ ភ្នំពេញ ២AV-១១៥២ អ្នកបើកបរមិនត្រូវបានស្គាល់អត្តសញ្ញាណឡើយ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេបានឃើញបុរសពីរនាក់ជិះម៉ូតូមួយគ្រឿងបើកបរក្នុងទិសដៅពីកើតទៅលិចក្នុងល្បឿនមធ្យម លុះមកដល់មុខព្រលានយន្តហោះ ស្រាប់តែមានរថយន្តមួយគ្រឿងម៉ាកហាយឡែនឌ័រ ពណ៌ស មិនដឹងជាអ្នកបើកបរបុរស ឬស្ត្រីឡើយ បានបើកបរក្នុងល្បឿនយ៉ាងលឿនក្នុងទិសដៅស្របគ្នាជាមួយជនរងគ្រោះខាងលើ ហើយរថយន្តបានរេចង្កូតទៅបុកម៉ូតូជនរងគ្រោះពីក្រោយបណ្ដាលឲ្យដួលអូសជនរងគ្រោះប្រមាណជាច្រើនម៉ែត្រ បន្ទាប់មករថយន្តខាងលើបានបើក គេចខ្លួនបាត់ស្រមោល បន្សល់ទុកកាងថយន្តនិងស្លាកលេខនៅកន្លែងកើតហេតុតែប៉ុណ្ណោះ ។
ចំណែកបុរសម្នាក់ខាងលើដែលរងរបួសធ្ងន់ត្រូវបានរថយន្តសង្គ្រោះរបស់គ្លីនិកឯកជន ដឹកយកទៅសង្គ្រោះភ្លាមៗផងដែរ ចំណែកឯបុរសម្នាក់រងរបួសស្រាលនៅចាំម៉ូតូនៅកន្លែងកើតហេតុ។
ក្រោយពេលកើតហេតុ កម្លាំងនគរបាលប៉ុស្តិ៍ខាងលើបានមកដល់កន្លែងកើតហេតុ ហើយបានទាក់ទងទៅជំនាញចរាចរខណ្ឌពោធិ៍សែនជ័យដើម្បីមកពិនិត្យនៅកន្លែងកើតហេតុ និងវាស់វែងនៅកន្លែងកើតហេតុ ហើយយកម៉ូតូរបស់ជនរងគ្រោះ ព្រមទាំងស្លាកលេខរថយន្តខាងលើយកទៅទុកដើម្បីឲ្យជនរងគ្រោះដាក់ពាក្យបណ្ដឹងនៅផ្នែកជំនាញស្រាវជ្រាវរកម្ចាស់រថយន្តខាងលើមកដោះស្រាយតាមផ្លូវច្បាប់ ៕
ចែករំលែកព័តមាននេះ